Marku 10 - NOVO TESTAMENTO EM NDAU

Ndava yo kurambana

¹ Wakabvapo, wakaenda ku nyika yo Judhiya mwombera mwo Jordhani. Mbungano yakaunganazve kwaari; kudari ngokuyita kwake, wakavajijisazve.

² Vafarisi vakaviya kwaari, vechimubvunjisa, kuti: “Kunotendehwa here kuti mwamuna arambe mukaji wake?” Vechimueja.

³ Wakapingura, wakati kwavari: “Ichinyi chaakapanga Mosi kwomuri?”

⁴ Navo vakati: “Mosi wakatenda kuti kutahwe tshamba yo kumuramba no kuparajana.”

⁵ Asi Jesu wakati kwavari: “Ngo ndava yo kupata kwo mwoyo yenyu iye wakamutarira uwu mupango.

⁶ Asi kubvira mukutanga kwo kusikwa, Mwari wakavasika mwanarume no mwanakaji.

⁷ Ngo iyi ndava mwanarume unozosiya baba wake na mayi, abatirire kumukaji wake;

⁸ navo vaviri vanozoita nyama imwe. Kwokuti avachaiti vaviri, asi nyama imwe.

⁹ Ndizvo chaakasunganisa Mwari, mundhu usazosunungura.”

¹⁰ Vaa mu nyumba vajiji vake vakamubvunjisazve ngo iyi ndava.

¹¹ Wakati kwavari: “Iye unoramba mukaji wake arovore umweni, unoomba echishaishira mukaji wake.

¹² Pikija mukaji naye akaramba mwamuna wake, arovohwe ngo umweni, iye unoomba.”

Jesu unokhomborera vana vadoko

¹³ Vayinga vechizisa vana vadoko kwaari kuti avapshase, asi vajiji vakavathusa.

¹⁴ Asi Jesu echivona wakahwajihwa, wakati kwavari: “Tenderanyi vana vadoko vaviye kwendiri, musavarambija; ngokuti Umambo hwa Mwari ngo hwavakadari ngaava.

¹⁵ Ngozvirokwazvo ndinoti kwomuri; iye usikaashiri Umambo hwa Mwari kudari ngo mwana mudoko aatongozonghwini kwohuri.”

¹⁶ Naye wakavatakura, akavakomborera, echidira nyara jake panyezuru pavo.

Vapfumi no Umambo wa Mwari

¹⁷ Naapo echitanga hwendo hwake, kwakagogoma umwe echiviya kwaari, wakamugwadamira, wakamubvunjisa, kuti: “Mujijisi wakanaka, chinyi chondingaita kuti, ndigare ndhaka yo kupona kusikaperi?”

¹⁸ Jesu wakati kwaari: “Unondidanija ngenyi kuti, wakanaka? Akuna wakanaka, asi umwe ega, ndi Mwari.

¹⁹ Unoiziva mipango, usauraya, usaomba, usaba, usaita uchapupu hwo kunyepa, usachengejera, reremeja baba wako na mayi wako.”

²⁰ Wakati kwaari: “Mujijisi, izvi zvese ndakazvingwarira kubvira muudoko hwangu.”

²¹ Jesu echimuringira, wakamuda, wakati kwaari: “Chiro chimwe chinotamika kwouri: Endai, utengese zvese zvounazvo, upe varombo, newe unozova no pfuma mu gore; uviye, unditevere.”

²² Iye wakatambujika ngo izwi iro, wakaenda echisvipa mwoyo, ngokuti wayiva no pfuma zhinji.

²³ Jesu aringaringa wakati ku vajiji vake: “A, kwakapinda kunesa kwavari avo vano upfumi kunghwina mu Umambo hwa Mwari!”

²⁴ Vajiji vakashamiswa ngo mazwi ake; asi Jesu wakavabvunjazve wakati kwavari: “Vana, kwakapinda kunesa kwavari avo vanogonda pfuma kunghwina mu umambo hwa Mwari!

²⁵ Kwakapinda kureruka kuti kamera ringhwine ngo pa bovo ro njingano kuno kuti mupfumi anghwine mu Umambo hwa Mwari.”

²⁶ Vakashamiswa zvikuru, vechiti pakati pavo: “Ndiyani ungaponeswa?”

²⁷ Na Jesu echivaringira, wakati: “Ku vandhu azvingaitiki, asi haiwa kuna Mwari, ngokuti zviro zvese zvinoitika kuna Mwari.”

²⁸ Pedru wakatanga kumubvunja kuti: “Vonayi, isisu takasiya zvese, tikakutevera.”

²⁹ Jesu wakati: “Ngozvirokwazvo ndinoti kwomuri; akuna mundhu wakasiya nyumba, nokuti vanukuna, nokuti hanzvaji, nokuti mayi, nokuti baba, nokuti vana, nokuti minda, ngo ndava yangu, no yo vhangeri,

³⁰ asikazoashiri zvakahwirijihwa kupetwa kuyita zana, zvino ngo nguva iyi, nyumba, no vanukuna, no hanzvaji, no majimayi, no vana, no minda, pamwepo no kuteverehwa; no ku nguva inozoviya, unozoashira kurarama kusikaperi.

³¹ Asi vazhinji vokutanga vanozoita vokugumisira; naavo vokugumisira vanozoita vokutanga.”

Jesu unovereketazve ngo kufa no kumuka kwake

³² Vayiva mu njira vechikwira kuenda Jerusarema; na Jesu waitungamira pamberi pavo. Vakashamiswa, naavo vakamutevera vakatya. Naye wakatorazve vari gumi na vaviri, wakatanga kuvabvunja zvinozomugumira,

³³ echiti: “Vonanyi, tinokwira Jerusarema; no Mwana wo Mundhu unozopihwa ku vapristi vakuru no vatari; navo vanozomutongera rufu, vanozomupira kuno vo majinja;

³⁴ navo vanozomuitira jee, no kumupfirira, no kumurova, no kumuuraya; asi ngosure kwo mazuva matatu unozomukazve.”

Chikumbiro cho vana va Zebhedhi

³⁵ Jakobe na Johani vana va Zebhedhi vakakhwedera kwaari, vechiti kwaari: “Mujijisi, tinoda kuti, utiitire pikija, chinyi chotinozokumbira.”

³⁶ Wakati, kwavari: “Munoda kuti, ndimuitirenyi?”

³⁷ Navo vakati kwaari: “Titendere isisu kuti tigare umwe ngo kumuho kwako, no umweni ngo kuboshwe kwako mu uthende hwako.”

³⁸ Asi Jesu wakati kwavari: “Amuzivi chomunokumbira. Munokona here kumwa mukheyo wondinomwa? Nokuti, kubhapatiswa ngo rubhapatiso rwondinobhapatiswa ndirwo?”

³⁹ Navo vakati kwaari: “Tinokona.” Na Jesu wakati kwavari: “Mukheyo wondinomwa, munozoumwavo; no rubhapatiso rwendinozobhapatiswa ndirwo munozobhapatiswa ndirwo.

⁴⁰ Asi kugara ngo kumuho kwangu na ngo kuboshwe kwangu andinipi ndinopa, asi ngo kwaavo vakakunasirihwa.”

⁴¹ Naapo vari gumi vazwa vakatanga kuhwajihwa ndi Jakobe na Johani.

⁴² Naapo Jesu wakavadanija kwaari, wakati kwavari: “Munoziva kuti avo vakaemeswa kutonga vo majinja vano simba panyezuru pavo, no vakuru vavo vano simba panyezuru pavo;

⁴³ Asi azvizoiti kudaro kwomuri; asi pikija ndiyani uwo unoda kuyita mukuru kwomuri ngaaite mushandiri wenyu,

⁴⁴ no uwo unoda kujiita wokutanga pakati penyu ngaajiite muranda wavo vese.

⁴⁵ Ngokuti no Mwana wo Mundhu aazivi kuviya koshandihwa, asi koshandira, no kupa kupona kwake kuti kuite muripo wo vazhinji.”

Kurapwa kwo bofu Bhartimeu

⁴⁶ Vakaguma mu Jeriko. Naapo echibva mu Jeriko no vajiji vake, no mbungano huru, Bhartimeu, mwana wa Timeu, bofu, mupembhi, inga wakagara ngo pambhiri po njira.

⁴⁷ Naazwa kuti ndi Jesu wo Nazaretha, wakatanga kumima, echiti: “Jesu Mwana wa Dhavhidha ndiyitire nyasha.”

⁴⁸ Vazhinji vakamuthusa kuti anyarare; asi iye wakapindisisa kumima kukuru, echiti: “Mwana wa Dhavhidha, ndiyitire nyasha.”

⁴⁹ Naapo Jesu wakayima, wakati: “Mudanijenyi.” Vakadanija bofu, vechiti kweriri: “Chunga, mukayi, unokudanija.”

⁵⁰ Iro rechikhandira no jira raro rakamuka, rakaguma kuna Jesu.

⁵¹ Jesu wakamubvunjisa, kuti: Chinyi chounoda kuti ndikuitire? No bofu rakati kwaari. Rabhoni, kuti ndivone.

⁵² Jesu wakati kweriri: “Enda, kutenda kwako kwakuponesa.” Paripo rakavona rakamutevera mu njira.