Marku 1 - NOVO TESTAMENTO EM NDAU

Chumairo ra Johani Mubhapatisi

¹ Kutanga kwo vhangeri ra Jesu Kristu, Mwana wa Mwari.

² Kudari ngo zvakatahwa mu tshamba ya Isaya muprofeti: “Ringiranyi, ndinotuma mutumwa wangu pamberi po hope yako, uwo unozonasirira njira yako.

³ Izwi ro unodanijira mu bani, kuti: Nasiriranyi njira ya Mambo, rungamisanyi makwanja ake.”

⁴ Wakaviya Johani uwo waibhapatisa mu bani, echichumaira rubhapatiso rwo kutenderuka kwo kuregerehwa zvishaishi.

⁵ Vakabuda kuenda kwaari vo nyika yese yo Judhiya, navo vese vo Jerusarema; navo vakabhapatiswa ndiye mu murambo wo Jordhani, vechitenda zvishaishi zvavo.

⁶ Na Johani wayinga wakasimira nguvo jo mamviri wo kamera uno bhande ro dovo muchiunu chake, naye waiha ndongwe no uchi hwo mushango.

⁷ Naye waichumaira, echiti: “Iye unoviya uri sure kwangu uno simba kupinda inini, andisisiri kuti ndikotame ndisunungure rusinga rwo magwada ake.

⁸ Inini ndakamubhapatisa ngo kumwa; asi iye unozomubhapatisa ngo Mweya Wakachena.”

Kubhapatiswa no kuejwa kwa Jesu

⁹ Kwakaitika ngo mazuva ao, kuti Jesu wakabva Nazaretha ro Garire, akabhapatiswa ndi Johani mu Jordhani.

¹⁰ Paripo naabuda kubva mu kumwa wakavona denga rakabewuka, no Mweya wakadari ngo njiva uchibzuka panyezuru pake.

¹¹ No izwi rechibva mu gore, rechiti: “Iwewe uri Mwana wangu unodikana, uwo wondinonasa kudakara ndiye.”

¹² Paripo Mweya wakamundundira mu bani.

¹³ Wakagaremwo mu bani mazuva ari makumi marongomuna, echiejwa ndi Sathani, naye wayiva pamwepo no zvikara, no ngirosi jakamushandira.

Jesu unodanija vajiji vake vo kutanga

¹⁴ Ngosure kwo kusungwa kwa Johani, Jesu wakaviya mu Garire echichumaira vhangeri ra Mwari,

¹⁵ echiti: “Nguva yaguma no Umambo hwa Mwari hwa phedo. Tenderukanyi mutende vhangeri.”

¹⁶ Achipinda ngo mumbhiripiri mwo jombe ro Garire, wakavona Simoni no munukuna wake Andreu vechikandira juya mu jombe; ngokuti vayiva vatandi vo hove.

¹⁷ Jesu wakati kwavari: “Nditeverenyi, neni ndinozomuita vatandi vo vandhu.”

¹⁸ Paripo vakasiya majuya avo vakamutevera.

¹⁹ Echienda mberi padoko wakavona Jakobe mwana wa Zebhedhi, na Johani munukuna wake, vayiva mungarava vechisonera majuya avo.

²⁰ Paripo wakavadanija. Vakasiya baba wavo Zebhedhi no varanda vari mungarava, navo vakamutevera.

Jesu unorapa mundhu uno mweya wakashata

²¹ Vakafamba kuenda mu Kaperanaume; paripo ngo zuva ro sabatha wakanghwina mu nyumba yo kudira, wakajijisa.

²² Vakashamiswa ngo kujijisa kwake; ngokuti wakavajijisa kudari ngo uno simba echikaiti kudari ngo vatari.

²³ Paripo wayivapo mundhu mu nyumba yo kudira wayiva no mweya yakashata;

²⁴ naye wakadanijira echiti: “Tinenyi isisu newe, iwewe Jesu wo Nazaretha? Waviya kwotiparaja here? Ndinokuziva kuti uriyani, uri Wakachena wa Mwari.”

²⁵ Jesu wakamuthusa, echiti: “Nyarara, buda kubva kwaari.”

²⁶ No mweya wakashata wakamusukumija, ukamima ngo izwi guru, ukabuda kubva kwaari.

²⁷ Navo vese vakashamiswa, kwokuti vakabvunjisana vechiti: “Ichinyi ichi? Kujijisa kupsha here? Ngo simba unopanga nokuti pikija mweya yakashata, nayo inomupurukira.”

²⁸ Paripo mbiri yake yakaparajika ku nyika jese jakatendeneja Garire.

Jesu unorapa vandhu vazhinji

²⁹ Naabuda kubva mu nyumba yo kudira, wakaenda ku nyumba ya Simoni na Andreu, na Jakobe, na Johani.

³⁰ Vambiya va Simoni vayinga vakavata vechihwara ngo kupisa muviri; paripo vakamubvunja ngo ndava yavo.

³¹ Naye wakaviya kwavari wakavabata ngo nyara, wakavamusa; no kupisa muviri kwakapera, navo vakavashandira.

³² Kwooita madekoni, zuva rabira vakazisa kwaari vese vaihwara, no vayinga no mabzoka.

³³ No vo dhoropa rese vakaungana pamusuvo.

³⁴ Naye wakaponesa vazhinji vaihwara ngo ndhenda jakaparajana, wakambirimbija mabzoka mazhinji; asikatenderi kuti mabzoka averekete, ngokuti ayimuziva.

Jesu unochumaira masoko mapsha

³⁵ No mangwanani mavishi kuchakasvipa wakamuka, wakabuda, wakaenda ku bani, kwookumbira.

³⁶ Simoni naavo vayiva naye vakamutevera;

³⁷ vakamuvona, vakati kwaari: “Vese vanokupshaka.”

³⁸ Wakati kwavari: “Ngatiende ku ndau jimweni, kuti ndichumairezve iyo; ngokuti ngo zvondakaviira.”

³⁹ Wakafamba echichumaira mu nyumba javo jo kudira, mu Garire mwese, echimbirimbija mabzoka.

Kurapwa kwo mundhu uno mapere

⁴⁰ Wakaviya kwaari mundhu wayiva no mapere, echimupota, echimugwadamira, echiti kwaari: “Kudari wechida ungandiponesa.”

⁴¹ Naye wakamuzwira urombo, wakatambanuja nyara yake, wakamupshasa, wakati kwaari: “Ndinoda; poneswai.”

⁴² Paripo mapere akabva kwaari, naye wakaponeswa.

⁴³ Wakamupangisisa, akamuendesa paripo,

⁴⁴ wakati kwaari: “Ngwarayi kuti uchazobvunja mundhu ngo izvi: Asi endayi kwojitatija kuno mupristi, upekeje ngo ndava yo kuponeswa kwako izvo zvaakaemesa Mosi, kuyita chapupu kwavari.”

⁴⁵ Asi iye wakabuda, wakatanga kuchumayira kakurutu no kuvereketa ngo izvi kwokuti Jesu inga echikakonizve kunghwina mu dhoropa pambhene, asi wayiva kunja mu bani; navo vakaviya kwaari kubva kumativi ese.