Johani 9 - NOVO TESTAMENTO EM NDAU

Kurapwa kwo mundhu wakabahwa ari bofu

¹ Kwakati achipinda wakavona mundhu wayiva bofu kubvira mukubahwa kwake.

² No vajiji vake vakamubvunjisa vechiti: “Mujijisi, ndiyani wakashaisha, uwu mundhu nokuti vabari vake, kuti abahwe ari bofu?”

³ Jesu wakapingura, akati: “Uwu mundhu aazivi kushaisha nokuti vabari vake, asi kwokuti mishando ya Mwari ivoniswe ndiye.

⁴ Kunosisira kuti tishande mishando yo uwo wakandituma achiri masikati, ngokuti usiku hunoviya apo apana ungazokona kushanda.

⁵ Apo ndichindori mu nyika, ndiri kujeka kwo nyika.”

⁶ Apo ayinga avereketa izvi, wakapfira pa mabvu, wakakanya matope ngo mata, wakazoja majiso aro ngo dope.

⁷ Wakati kweriri: Enda, ushambe mugandwa ro Siroma (ngo kukhumuchwa kunoti, Wakatumwa). Ndizvo wakaenda, akashamba, wakaviya ovona.

⁸ Ndizvo avo vakavakirana naye, naavo vaimuvona kare, kuti wayiva mupembhi, vakati: “Uwu andiyepi here uwo waigara echipembha?”

⁹ Vamweni vakati: “Ndiye.” Vamweni vakati. “Haiwa asi unotojana naye.” Asi iye wakati: Ndini.

¹⁰ Ndizvo vakati kwaari: “Majiso ako akaita mapembenujihwenyi?”

¹¹ Wakati: “Mundhu unozwi ndi Jesu wakakanya matope, akazoja majiso angu, akati kwendiri: Enda Siroma, ushambe: Ndizvo ndakaenda, ndikashamba, ndikavona.”

¹² Navo vakati kwaari: “Uri kwapi?” Iye wakati: “Andizivi.”

Vafarisi vanoramba simba ra Jesu

¹³ Ndizvo vakamuzisa ku vafarisi uwo wayiva bofu.

¹⁴ Rayiva sabatha ngo zuva iro Jesu wakakanya matope akapembenuja majiso aro.

¹⁵ Ndizvo vafarisi vakahwirijira kumubvunjisazve, kuti, wakayita mapembenujihwenyi. Asi wakati kwavari: “Iye wakadira matope pa majiso angu, neni ndakashamba, zvino ndinovona.”

¹⁶ Ndizvo vamweni vo vafarisi vakati: “Uwu mundhu aabvi kuna Mwari akadi, ngokuti aangwariri sabatha.” Vamweni vakati: “Mundhu uri mushaishi ungaita maitirenyi iyi mishamiso?” Kwakavapo kuparajana mukati mwavo.

¹⁷ Ndizvo vakatizve kuno bofu: “Unoti kudini ndiye iwewe, ngo ndava yokuti wakapembenuja majiso ako?” Naye wakati: “Uri muprofeti.”

¹⁸ Ndizvo vajudha avazivi kutenda kuti ndiye wayiva uri bofu, nokuti wakapembenujwa, mbhera vakadanija vabari vo wakapembenujwa.

¹⁹ Navo vakavabvunjisa, vechiti: “Uwu uri mwana wenyu here, womunoti, kuti wakabahwa ari bofu? Ndizvo zvino unoyita mavonerenyi?”

²⁰ Ndizvo vabari vake vakapingura vakati: “Chotinoziva ngo chokuti uwu uri mwana wedu, nokuti wakabahwa ari bofu:

²¹ Hino kuti unoyita mavonerenyi atizivi, nokuti ndiyani wakamupembenuja majiso ake, atizivi: Mubvunjisenyi, wabva mundanga, unozojivereketera pachake.”

²² Vabari vake vakavereketa izvi ngokuti vaitya vajudha ngokuti vajudha inga vakatenderana kuti pikija ndiyani unozomutenda kuti iye uri Kristu, unozombirimbijwa kubva mu nyumba yo kudira.

²³ Ngo iyi ndava vabari vake vakati: “Wabva mundanga, mubvunjisenyi.”

²⁴ Ndizvo vakamudanija ngo kwo chipiri uwo wayiva bofu, vakati kwaari: “Irikija Mwari iwewe, isisu tinoziva kuti uwu mundhu uri mushaishi.”

²⁵ Ndizvo iye wakapingura: “Pikija uri mushaishi nokuti asiri, andizivi; asi chiro chimwe chega chendinoziva, ngo chokuti inini ndayiva bofu, zvino ndinovona.”

²⁶ Ndizvo vakati kwaari: “Wakaitenyi kwouri? Wakaita mapembenujirenyi majiso ako?”

²⁷ Iye wakapingura: “Ndakamubvunja, asi amuzivi kutenda; munoda kuchayita mazwirenyi? Nemwivo munoda kuyita vajiji vake?”

²⁸ Ivo vakamutuka, vechiti: “Iwewe uri mujiji wake, asi isisu tiri vajiji va Mosi.

²⁹ Tinoziva kuti Mwari wakavereketa kuna Mosi, asi uwu mundhu, atizivi paanobva.”

³⁰ Mundhu uwu wakapingura, akati kwavari: “Ichishamiso kuti amuzivi paanobva, asi wakapembenuja majiso angu?

³¹ Tinoziva kuti Mwari aazwi vashaishi: Asi pikija ndiyani unomureremeja, nokuita kuda kwake, iye unomuzwa.

³² Kubvira mukutanga akuzivi kumbozwika kuti mundhu wakambopembenuja majiso o wakabahwa ari bofu.

³³ Kudari uwu mundhu asiri unobva kuna Mwari, aangavi naro simba rokuita chiro.”

³⁴ Vakamupingura vakati kwaari: “Iwewe wakabahwa aembho mukushaisha, newe unotijijisa here?” Vakamumbirimbija kunja.

Upofu wo vafarisi

³⁵ Jesu wakazwa kuti vayinga vamumbirimbija kunja, amuvona, wakati: “Unotenda here Mwana wa Mwari?”

³⁶ Naye wakapingura akati: “Uriyani, Mambo, kuti nditende kwaari?”

³⁷ Jesu wakati kwaari: “Wamuvona, ndiyezve unovereketa newe.”

³⁸ Wakati: “Mambo ndinotenda.” Naye wakamudira.

³⁹ Na Jesu wakati: “Ndakaviyira kutonga mu nyika muno, kwokuti vasikavoni vavone, no vanovona vaitwe mapofu.”

⁴⁰ No vamweni vo vafarisi, avo vayiva naye vakazwa izvi, vakati kwaari: “Nesuvo tiri mapofu here?”

⁴¹ Jesu wakati kwavari: “Kudari mwayiva mapofu, amusaizova no kushaisha, asi zvino munoti: Tinovona, ndizvo kushaisha kwenyu kunondogara.”