Johani 8 - NOVO TESTAMENTO EM NDAU

¹ Asi Jesu wakaenda kudundhu ro Maorivhe.

² Mangwanani mavishi wakaviyazve mu themperi, no vandhu vese vakaviya kwaari, naye wakagara pasi, akavajijisa.

³ Vatari no vafarisi vakazisa kwaari jimayi rakabatwa rechiomba, naapo vayinga varigajika pakati,

⁴ vakati kwaari: “Mujijisi, iri jimayi rakabatwa mukuomba, rechiomba yambo.

⁵ Zvino Mosi wakatipanga mumipango kuti vakadaro vafuhwe ngo mapuwe: Asi iwewe unoti kudini?”

⁶ Izvi vakazvivereketa vechimueja, kuti vawane chokumuparisa ndava ndicho. Asi Jesu wakakotama pasi, wakatara ngo chikunwe pamavhu.

⁷ Asi apo vavangirira kumubvunjisisa, wakajirungamisa, akati kwavari: “Iye usina kushaisha pakati penyu, ngaatange kukandira buwe kumufura.”

⁸ Wakakotamazve pasi, wakatara pamavhu.

⁹ Navo vazwa vechiyitihwa ndava ngo murangarijo yavo, vakabuda umwe ngaumwe, kubvira kuvasharuka mbhera kuvadoko: Na Jesu wakasara ari ega no jimayi rakagara pakati.

¹⁰ Naapo Jesu ayinga ajiruramisa, wakavona jimayi rega akati kweriri: “Jimayi, vari kwapi avo vakakuitira ndava? Apana here wakakurasha?”

¹¹ Rakati: “Akuna, Mambo.” Jesu wakati kweriri: “Neni andikurashi. Enda, usachazoshaishazve.”

Jesu ikujeka kwo nyika

¹² Ndizvo Jesu wakavereketazve kwavari, echiti: “Inini ndiri kujeka kwo nyika; uwo unonditevera, aazofambi muchidima, asi unozova mukujeka kwo kupona.”

¹³ Ndizvo vafarisi vakati kwaari: “Unojipupurira; uchapupu hwako ahuna gwinyiso.”

¹⁴ Jesu wakapingura akati kwavari: “Pikija ndechijipupurira uchapupu hwangu huno gwinyiso, ngokuti ndinoziva pondakabva, no pondinoenda: Asi imwimwi amuzivi pondakabva, no pondinoenda.

¹⁵ Imwimwi munotonga ngo kwenyama, inini anditongi mundhu.

¹⁶ Pikija ndechinyatonga, kutonga kwangu kuno gwinyiso, ngokuti andiri ndega akadi, asi inini ndiri pamwepo na Baba vakandituma.

¹⁷ Kwakatahwa mumipango yenyu kuti uchapupu hwo vandhu vaviri huno gwinyiso.

¹⁸ Inini ndiri iye unojipupurira, na Baba vakandituma ivo vanopupura ndini.”

¹⁹ Ndizvo vakati kwaari: “Vari kwapi Baba wako?” Jesu wakapingura, akati: “Imwimwi amundizivi, nokuti Baba wangu; kudari mwaindiziva, mwaizozivazve Baba wangu.”

²⁰ Jesu wakavereketa aya mazwi muugaro hwozvipo, echijijisa ari mu themperi: Apana wakamubata ngokuti nguva yake yayinga isati yaguma.

Ndiyani Jesu

²¹ Ndizvo wakatizve kwavari: “Inini ndinoenda, nemwi munozondipshaka nemwi munozofira muzvishaishi zvenyu: No pondinoenda amuna simba ro kuviya apo.”

²² Ndizvo vajudha vakati: “Unojiuraya here? Ngokuti unoti: Pondinoenda, imwimwi amuna simba ro kuviya apo.”

²³ Wakati kwavari: “Imwimwi muri vo pasi inini ndinobva mu denga; imwimwi muri vo nyika iyi, asi inini andiripi wo nyika iyi akadi.”

²⁴ Ndizvo ndakati kwomuri kuti: Munozofira muzvishaishi zvenyu, ngokuti kudari musikatendi kuti ndiri iye.

²⁵ Ndizvo vakati kwaari: “Uriyani iwewe?” Jesu wakati kwavari: “Ndiri uwo wo ndakamubvunja mukutanga.

²⁶ Ndino zvakawanda zvo kuvereketa ndimwi no kutonga, asi iye wakandituma uri gwinyiso; neni ndinovereketa ku nyika izvo zvondakazwa kubva kwaari.”

²⁷ Avazivi kuziva kuti waivereketa kwavari ndi Baba.

²⁸ Ndizvo Jesu wakati kwavari: “Apo mwazomukwija Mwana wo Mundhu, naapo munozoziva kuti inini ndiri iye, nokuti andiyiti chiro ndenga, asi kudari ngo zvondakajijiswa ndi Baba, izvi ndizvo zvondakavereketa.

²⁹ No uwo wakandituma undori neni: Aazivi kundisiya ndega, ngokuti ndinoita mukuvo wese izvi zvinomudakaja.”

³⁰ Achavereketa, vazhinji vakatenda kwaari.

Gwinyiso rinosunungura

³¹ Ndizvo Jesu wakati kuna avo vajudha vakatenda kwaari: “Kudari mwechigara mumazwi angu ngo gwinyiso muri vajiji vangu.

³² Nemwi munozoziva gwinyiso no gwinyiso rinozomusunungura.”

³³ Vakapingura: “Isisu tiri mubarihwana ya Abrahama, atizivi kumboitwa varanda ngo mundhu naumwe; unodaro ngenyi kuti munozosununguhwa?”

³⁴ Jesu wakapingura: “Zvirokwazvo, ndinoti kwomuri, kuti, pikija ndiyani unoyita kushaisha, uri muranda wo kushaisha.

³⁵ No muranda aagari mu nyumba mbhera narini, asi Mwana unogaremwo mbhera narini.

³⁶ Ndizvo kudari Mwana echizomusunungura, munozosununguhwa aembho.

³⁷ Ndinoziva kuti imwimwi muri mubarihwana wa Abrahama: Asi munopshaka kundiuraya, ngokuti izwi rangu arina ndau mukati mwenyu.

³⁸ Inini ndinovereketa izvo zvondakavona kuna Baba wangu, nemwivo munoyita zvo mwakazwa kuna baba wenyu.”

Vana va Abrahama no vana va dhiyabhorosi

³⁹ Vakamupingura, vakati kwaari: “Baba wedu ndi Abrahama.” Jesu wakati kwavari: “Kudari mwayiva vana va Abrahama, mwaizoyita mishando ya Abrahama.

⁴⁰ Asi zvino munopshaka kundiuraya ndiri mundhu wakavereketa gwinyiso kwomuri, iro rondakazwa kuna Baba wangu: Abrahama aazivi kuyita zvakadari.

⁴¹ Imwimwi munoyita mishando ya baba wenyu.” Vakati kwaari: “Isisu atizivi kubahwa ngo kuomba, tina Baba umwe ndi Mwari.”

⁴² Jesu wakati kwavari: “Kudari Mwari wayiva Baba wenyu, mwaizondida; ngokuti ndakabuda ndechibva kuna Mwari, ngokuti andizivi kuviya ngo kwangu, asi iye wakandituma.

⁴³ Amuzwisisi ngenyi kuvereketa kwangu? Ngokuti amuna simba ro kuzwisisa izwi rangu.

⁴⁴ Imwimwi muri va baba wenyu dhiyabhorosi, no kuemura kwa baba wenyu munoda kukuyita. Uwo wayiva muurayi kubvira pakutanga, naye aazivi kuema mugwinyiso, ngokuti gwinyiso amuna mukati mwake, apo echivereketa manyepo, unojivereketera, ngokuti iye uri munyepi na baba wo manyepo.

⁴⁵ Asi ngokuti inini ndinovereketa gwinyiso amunditendi.

⁴⁶ Ndiyani kwomuri ungandivonisa ndava yo ndakashaisha? Kudari ndechivereketa gwinyiso amunditendi ngenyi?

⁴⁷ Iye uri wa Mwari unozwa mazwi a Mwari; ngo iyi ndava imwimwi amundizwi, ngokuti amuri va Mwari akadi.”

Jesu na Abrahama

⁴⁸ Vajudha vakamupingura, vakati kwaari: “Atinasi kunanga here kuti uri muSamariya, newe uno bzoka?”

⁴⁹ Jesu wakapingura: “Inini andina bzoka, asi ndinoreremeja Baba wangu, nemwi amundireremeji.

⁵⁰ Asi andipshaki kuirikijwa kwangu, uripo umwe unopshaka, no unotonga.

⁵¹ Zvirokwazvo, zvirokwazvo, ndinoti kwomuri, pikija ndiyani unongwarira mazwi angu, aatongozovoni kufa.”

⁵² Vajudha vakati kwaari: “Zvino tinoziva kuti uno bzoka, Abrahama wakafa, no vaprofeti; newe unoti. Pikija ndiyani unongwarira mazwi angu, aatongozovoni kufa.

⁵³ Iwewe uri mukuru here kuna baba wedu Abrahama, vakafa, no vaprofeti vakafa; unojiyita iyani?”

⁵⁴ Jesu wakapingura: “Kudari ndechijiirikija, kuirikijwa kwangu kuri kusina shwiro: Ndi Baba wangu anondiirikija, vomunoti ndivo kuti vari Mwari wenyu:

⁵⁵ Nemwi amuzivi kuvaziva, asi inini ndinovaziva, nokudari ndechiti: Andivazivi, ndingayita munyepi kudari ndimwi; asi ndinovaziva, ndinongwarira mazwi avo.

⁵⁶ Abrahama baba wenyu wakadakara ngo kurivona zuva rangu; naye wakarivona, wakadakara.”

⁵⁷ Ndizvo vajudha vakati kwaari: “Ausati waano makore ari makumi mashanu, newe wakavona Abrahama here?”

⁵⁸ Jesu wakati, kwavari: “Zvirokwazvo, zvirokwazvo, ndinoti kwomuri, Abrahama asati abahwa, ndaindovapo.”

⁵⁹ Ndizvo vakatora mapuwe kuti vamufure, asi Jesu wakangarangaka, akabuda kubva mu themperi.