Johani 7 - NOVO TESTAMENTO EM NDAU

Vanukuna va Jesu avazivi kumutenda

¹ Ngosure kwo izvo Jesu wakafamba mu Garire, ngokuti inga asikachadi kufamba mu Judhiya, ngokuti vajudha vaipshaka kumuuraya.

² Zvino mushongano wo kuha kwo vajudha, mushongano wo kugara mumichacha, wayiva phedo.

³ Ndizvo vanukuna vake vakati kwaari: “Ibva pano uende mu Judhiya, kuti vajiji vako vavonezve mishando yako younoita.

⁴ Ngokuti akuna mundhu unoyita chiro ngo kufishika, echipshaka kuti azivikane pambhene. Kudari wechiyita izvi zviro jipangijire kuna vese vo mu nyika.”

⁵ Ngokuti vanukuna vake inga vasati vatenda kwaari.

⁶ Ndizvo Jesu wakati kwavari: “Nguva yangu aisati yaguma akadi, asi nguva yenyu yakandonaka mukuvo wese.

⁷ Nyika aingamunyenyi akadi, asi inondinyenya inini ngokuti ndinopupura ndiyo, kuti mishando yayo yakashata.

⁸ Kwiranyi imwimwi kumushongano uwu wo kuha; inini andikwiriyo zvino kumushango uwu wo kuha, nguva yangu aisati yaguma.”

⁹ Apo avereketa izvi kwavari wakagara mu Garire.

Jesu unovereketa mu mushongano wo michacha

¹⁰ Asi apo vanukuna vake vayinga vakwira ku mushongano wo kuha, wakakwiravo, haiwa pambhene, asi ngo kufishika.

¹¹ Ndizvo vajudha vakamupshaka mu mushongano wo kuha, vakati: “Umbori kwapi?”

¹² Kwayivapo kun'un'uta kukurutu pakati po mbungano ngo ndava yake. Vamweni vakati: Uri mundhu kwaye: Asi vamweni vakati: “Haiwa asi unopaukisa mbungano.”

¹³ Asi apana mundhu wakavereketa ndiye pambhene ngo ndava yo kutya vajudha.

¹⁴ Asi apo mushongano wo kuha waapakati, Jesu wakakwira mu themperi wakajijisa.

¹⁵ Ndizvo vajudha vakashama vechiti: “Uwu unoyita mazivirenyi matahwa, asikazivi kujija?”

¹⁶ Ndizvo Jesu wakavapingura, akati: “Kujijisa kwangu asipi kwangu akadi, asi ngo kwo uwo wakandituma;

¹⁷ pikija ndiyani unoda kuyita kuda kwake, unozoziva ngo ndava yo chijijiso, kuti chinobva kuna Mwari here nokuti ndinojivereketera.

¹⁸ Iye unojivereketera unopshaka kuirikijwa kwake, asi iye unopshaka kuirikija uwo wakandituma, ndiye uri wo gwinyiso, apana kusikarurami mukati mwake.

¹⁹ Mosi aazivi kumupa here mipango, asi apana pakati penyu unongwarira mipango. Munopshakirenyi kundiuraya?”

²⁰ Mbungano yakapingura: “Uno bzoka; ndiyani unopshaka kukuuraya?”

²¹ Jesu wakapingura akati kwavari: “Ndakaita mushando umwe, nemwi mwese mwakashamiswa.

²² Ngo iyi ndava Mosi wakamupa kuti muchekwe (asi akuzivi kubva kuna Mosi akadi, asi kwakabva ku majibaba), nemwi ngo zuva ro sabatha munocheka mundhu.

²³ Kudari mundhu echiashira kuchekwa ngo zuva ro sabatha, kuti mupango wa Mosi usaguhwa, hino munondichenekera ngenyi ngokuti ndakaponesa mundhu ngo sabatha?

²⁴ Musatonga ngo kuvoneka kwo kunja, asi tonganyi kutonga kwakarurama.”

Uwu ndiye Kristu here

²⁵ Ndizvo vamweni vakatikuti vo Jerusarema vakati: “Uwu andiyepi here uwo wo vanopshaka kuuraya?

²⁶ Ringiranyi unovereketa pambhene, navo avavereketi chiro kwaari. Vatongi avazivi here ngo chokwadi kuti uwu ndi Kristu?

²⁷ Asi uwu tinomuziva paanobva; asi apo Kristu oozoviya apana naumwe unozoziva kuti unobva kwapi.”

²⁸ Ndizvo Jesu wakadanijira ari mu themperi echijijisa wakati: “Munondiziva, munozivazve pondinobva, neni andizivi kuviya ngo kwangu, asi uwo wakandituma uno gwinyiso, nemwi amumuzivi.

²⁹ Asi inini ndinomuziva; ngokuti ndinobva kwaari, naye wakandituma.”

³⁰ Ndizvo vakapshaka kumubata, asi apana naumwe wakadira nyara panyezuru pake, ngokuti nguva yake inga isati yaguma.

³¹ No vazhinji no mbungano vakatenda kwaari, vakati: “Apo Kristu oviya unozokona here kuyita mishando inopinda iyi yakaitwa ngo uwu mundhu?”

³² Vafarisi vakazwa kuti mbungano yain'unu'ta ngo izvi zviro ndiye; no vapristi vakuru no vafarisi vakatuma vangwariri kuti vamubate.

³³ Ndizvo Jesu wakati: “Inguva doko ndichinemwi, neni ndinozoenda kwo uwo wakandituma.

³⁴ Munozondipshaka, asi amuzondiwani: No pendiri, amuna simba ro kugumapo.”

³⁵ Ndizvo vajudha vakavereketa pakati pavo, vechiti: “Unozoenda kwapi kwotisikazomuwani isisu? Unozoenda here kuno vakaparajika pakati po vaGiriki, no kuvajijisa vaGiriki?

³⁶ Rinonangenyi izwi iri raanovereketa, kuti, Munozondipshaka, asi amuzondiwani, nependiri amuna simba ro kugumapo?”

³⁷ Ngo zuva ro kupejisira, zuva guru ro mushongano wo kuha, Jesu wakamuka, wakadanijira, echiti: “Pikija ndiyani uno nyota ngaaviye kwendiri, amwe.

³⁸ Iye unotenda kwendiri, kudari ngo kunanga kwo matahwa, murambo jo kupona jinozopopoma kubva mu ndani mwake:”

³⁹ Asi wakavereketa izvi ngo ndava yo Mweya wo vanozoashira avo vanotenda kwaari: Ngokuti Mweya wayinga usati wapuwa, ngokuti Jesu inga asati wairikijwa.

⁴⁰ Ndizvo vamweni vo mbungano, apo vazwa aya mazwi, vakati: “Ngochakwadi uwu ndiye Muprofeti.”

⁴¹ Vamweni vakati: “Uwu ndiye Kristu.” Asi vamweni vakati: “Kristu ungabva Garire here?

⁴² Matahwa aanangi here kuti Kristu unobva kujinja ra Dhavhidha, nokubva Bhetherehema, muguta apo paaigara Dhavhidha?”

⁴³ Ndizvo kwayivapo kuparajana pakati po mbungano ngo ndava yake.

⁴⁴ Vamweni pakati pavo vakada kuti vamubate, asi apana wakadira nyara panyezuru pake.

Vatongi vanorwisana na Jesu

⁴⁵ Ndizvo vangwariri vakaviya ku vapristi vakuru no vafarisi, navo vakati kwavari: “Mwarega kuviya naye ngenyi?”

⁴⁶ No vangwariri vakapingura: “Narini, akuna mundhu wakambovereketa kudari ngo uwu mundhu.”

⁴⁷ Ndizvo vafarisi vakavapingura: “Nemwivo mwachengejehwa here?

⁴⁸ Uripo here wo vatongi nokuti wo vafarisi wakamutenda?

⁴⁹ Asi iyi mbungano isikazivi mipango yakatukwa.”

⁵⁰ Nikodhemusi ari umwe wavo (uwo wakaguma kwaari pakutanga), wakati kwavari:

⁵¹ “Mipango yedu inorasa here mundhu, tisati tamuzwa, nokuziva chaanoyita?”

⁵² Vakamupingura, vakati kwaari: “Newe auri wo Garire here? Pshakisisa uvone, ngokuti akuna muprofeti unobva Garire.”

Jesu unoregerera mujimayi muombi

⁵³ No mundhu wese wakaparara kuenda ku nyumba yake.