Johani 5 - NOVO TESTAMENTO EM NDAU

Kurapwa kwo mundhu wakaoma muviri

¹ Sure kwo izvi kwayivapo mushongano wo kuha wo vajudha, na Jesu wakakwira Jerusarema.

² Zvino riripo mu Jerusarema gandhwa ngo pachimana cho mabvuta, rinodanijwa ngo chi Hebheru kuti Bhetisaidha, rino maberere mashanu.

³ Mukati mwawo mwayivata vazhinji vaihwara, vayiva mapofu, zvirema no vakaoma muviri, vechigarira kuvhunduhwa kwo kumwa.

⁴ Ngokuti ngo mukuvo wakatikuti, ngirosi yaibzuka mugandwa no kuvhundura kumwa: Ndizvo pikija ndiyani waitanga kunghwinemwo apo kumwa yavhunduhwa waiponeswa pikija wayiva no ndhenda yakaitawani.

⁵ Kwayivapo mundhu wakatikuti wayiva no ndhenda yake makore makumi matatu na masere.

⁶ Naapo Jesu amuvona akavata, echiziva kuti inga anazvo mukuvo wakareba, wakati kwaari: “Unoda kutambiswa here?”

⁷ No uwo waihwara wakapingura kwaari, echiti: “Mambo, andina mundhu wokundibzusa mugandwa apo kumwa yo vhunduhwa; asi mukuenda kwangu, umweni unobzuka kunditangira.”

⁸ Jesu wakati kwaari: “Muka, utore mandhi ako ufambe.”

⁹ Paripo mundhuwo wakaponeswa wakatora mandhi ake akafamba. Ngo zuva iro rayiva sabatha.

¹⁰ Ndizvo vajudha vakati kwaari uwo wakaponeswa: Riri zuva ro sabatha, akutendehwi kwouri kuti utware mandhi ako:

¹¹ Asi iye wakapingura, kuti: “Uwo wakayita kuti ndipone ndiye wakati kwendiri: Tora mandhi ako ufambe.”

¹² Vakamubvunjisa vechiti: “Ndiyani mundhu uwo wakati kwouri: Tora mandhi ako, ufambe?”

¹³ Asi uwo wakaponeswa aazivi kuziva kuti ndiyani: Ngokuti Jesu inga waenda ngokuti mbungano huru yayivapo pandau iyo.

¹⁴ Ngosure kwo izvi Jesu wakamuvona ari mu themperi, naye wakati kwaari: “Ringira, wakaponeswa, usachazoshaishazve, kuti chiro chakapinda kushata kuno icho chisazokugumira.”

¹⁵ Naapo mundhu wakaenda, wakananga ku vajudha kuti ndi Jesu wakamuponesa.

¹⁶ Ngo ndava iyo vajudha vakamutambuja Jesu, ngokuti wakayita izvi ngo zuva ro sabatha.

¹⁷ Asi iye wakavapingura: “Baba wangu vanondoshanda mbhera nazvino, neni ndinoshanda.”

¹⁸ Ndizvo vajudha vakapindisisa kupshaka kumuuraya, ngokuti iye aazivi kugura sabatha kwega asi wakananga kuti Mwari wayiva Baba wake pachake, echijiita unoezana na Mwari.

Simba ro Mwana wa Mwari

¹⁹ Ndizvo Jesu wakapingura, akati kwavari: “Zvirokwazvo, zvirokwazvo, ndinoti kwomuri, Mwana aana simba ro kuyita chiro ngo kwake, asi chaanovona Baba echiita: Ngokuti izvo zvaanoita Baba, Mwana unoitavo ngokudaro.

²⁰ Ngokuti Baba vanomuda Mwana, vanomupangijira zvese zvovanoita pachavo: Vanozomupangijira mishando mikuru kuno iyi, kuti mushamiswe.

²¹ Ngokuti kudari ndi Baba vanomusa avo vakafa, no kuyita kuti vararame, ngokudarozve Mwana unoraramisa avo vaanoda.

²² Ngokuti Baba avatongi mundhu naumwe, asi vakapa kutonga kwese kuno Mwana;

²³ kuti vese vareremeje Mwana kudari ngo zvo vanoreremeja Baba. Uwo usikareremeji Mwana, aamureremejizve Baba uwo wakamutuma.

²⁴ Zvirokwazvo, zvirokwazvo, ndinoti kwomuri, kuti iye unozwa izwi rangu, atende uwo wakandituma, waanakwo kupona kusikaperi, aachazopindi mukutongwa, asi wadarika kubva mukufa, kunghwina mukupona.

²⁵ Zvirokwazvo, zvirokwazvo, ndinoti kwomuri, kuti nguva inoviya, nazvino yaapano, apo vakafa vanozorizwa izwi ro Mwana wa Mwari, naavo vanorizwa vanozopona.

²⁶ Ngokuti kudari ndi Baba uno kupona mukati mwake, ngo kudarovo wakapa Mwana kuti waano kupona mukati mwake.

²⁷ Naye wakapa kwaari simba ro kugura ndava, ngokuti iye uri Mwana wo Mundhu.

²⁸ Musashama ngo ichi, ngokuti nguva inozoviya apo vese vari mu maiba vanozorizwa izwi rake.

²⁹ Navo vanozobudemwo, avo vakayita zvakanaka mukumuka kwo kupona, naavo vakarovejera kuyita zvakashata mukumuka kwo kutongwa.”

Uchapupu wo simba ro Mwana wa Mwari

³⁰ “Andina simba rokuita chiro ngo kwangu; kudari ngo zvondinozwa ngokudaro ndinotonga, no kutonga kwangu kuri kwakarurama, ngokuti andipshaki kuda kwangu, asi kuda kwo uwo wakandituma.

³¹ Kudari ndechijipupurira, uchapupu hwangu ahuna gwinyiso.

³² Uripo umwe unoyita uchapupu ndini, neni ndinoziva kuti uchapupu hwaanopupura ndini huno gwinyiso.

³³ Imwimwi mwakatuma kuna Johani, naye wakayita uchapupu kuno zviro zvogwinyiso.

³⁴ Asi inini andiashiri uchapupu hunobva ku mundhu asi ndinovereketa izvi kuti muponeswe.

³⁵ Iye wayiva chibani chinobwaka chinojekisa, nemwi mwakatenda kuti mudakare kwo nguva doko mukujeka kwake.

³⁶ Asi inini ndino uchapupu unopinda kugwinya kuno hwa Johani: Ngokuti mishando iyo yaakandipa Baba kuti ndiipeje, ndiyo mishando yendinoita, inopupura ndini, kuti Baba vakandituma.

³⁷ Na Baba uwo wakandituma, wakayita chapupu ndini. Amuzivi kutongozwa izwi rake nakamwe, nokuti kutongovona muemo wake.

³⁸ Nemwi amuna mazwi ake anogara mukati mwenyu, ngokuti amuzivi kutenda uwo waakatuma.

³⁹ Pshakisisanyi matahwa, ngokuti mukati mwazvo munorangarija kuti munokupona kusikaperi, no izvi, ndizvo zvinopupura ndini.

⁴⁰ Nemwi amutendi kuviya kwendiri, kuti muwane kupona.

⁴¹ Andiashiri kukujwa kunobva ku vandhu.

⁴² Asi ndinomuziva kuti amuna rudo rwa Mwari mukati mwenyu.

⁴³ Inini ndakaviya ngo zina ra Baba wangu nemwi amuzivi kundiashira: Kudari umweni achizoviya ngo zina rake pachake, iye munozomuashira.

⁴⁴ Mungaita matenderenyi imwimwi munoashira kukujwa kubva kuno umweni no umweni, musikapshaki kukujwa ukwo kunobva kuna Mwari ega?

⁴⁵ Musarangarija kuti inini ndinozomuitira ndava kuna Baba: Uripo umwe unozomuitira ndava, ndi Mosi, uwo womunogonda.

⁴⁶ Ngokuti kudari mwakatenda Mosi inga mwakatendavo na inini: Ngokuti iye wakatara ndini.

⁴⁷ Asi kuti musikatendi zvakatahwa zvake, mungazoita matenderenyi mazwi angu?”