Johani 4 - NOVO TESTAMENTO EM NDAU

Jesu no jimayi ro Samariya

¹ Ndizvo apo Mambo aziva kuti vafarisi vayinga vazwa kuti Jesu wayita no kubhapatisa vajiji vakawanda kupinda Johani.

² (Asi Jesu pachake aazivi kubhapatisa, asi vajiji vake vaibhapatisa).

³ Wakabva Judhiya, wakaviyazve mu Garire.

⁴ Kwaisisira kuti apinde ngo mu Samariya.

⁵ Ndizvo wakaguma ku guta ro vaSamariya rinozwi Sukari, phedo no munda uwo waakapa Jakobe kuno mwana wake Josefa.

⁶ Zvino mwimbo wa Jakobe wayivapo. Ndizvo Jesu wayinga aremba ngo hwendo wake wakagara apo pa mwimbo: yaida kuyita nguva yo chitandhatu.

⁷ Kwakaguma apo jimayi ro Samariya kwoochera kumwa. Jesu wakati kweriri: “Ndipe kumwa ndimwe.”

⁸ Ngokuti vajiji vake inga vaenda ku guta kwootenga zvokuha.

⁹ Jimayi ro Samariya rakati kwaari: “Chinyi kuti iwewe, uri muJudha ukumbire kumwa yokumwa kwendiri inini, jimayi ro Samariya?” (Ngokuti vajudha avaiyani no vaSamariya.)

¹⁰ Jesu wakapingura, akati kweriri: “Kudari waiziva iwewe, chipo cha Mwari, nokuti ndiyani uwo unokumbira kwouri, kuti: Ndipe ndimwe, iwewe waizokumbira kwaari, naye waizokupa kumwa yo kupona.”

¹¹ Jimayi rakati kwaari: “Mambo, auna chimujiyo chokuchera ndicho, no mwimbo wakajika: Ndizvo kumwa yo kupona unoiwana kwapi?

¹² Uri mukuru here kuna baba wedu Jakobe, uwo wakatipa uwu mwimbo, naye wakamwa kwouri, no vana vake, no mushambi yake?”

¹³ Jesu wakapingura wakati kweriri: “Pikija ndiyani unomwa kuno iyi kumwa, unozozwazve nyota.

¹⁴ Asi uwu unomwa kuno kumwa iyo yo ndinozomupa inini, aachazozwizve nyota mbhera narini, asi kumwa iyo yo ndinomupa inozoita mwimbo wo kumwa mukati mwake, wechivherukira kupona kusikaperi.”

¹⁵ Jimayi rakati kwaari: “Mambo ndipe kumwa iyo, kuti ndisazoviyazve pano kwoochera.”

¹⁶ Wakati kweriri: “Enda, woodanija mwamuna wako, muviye pano.”

¹⁷ Jimayi rakapingura rikati: “Andina mwamuna.” Jesu wakati kweriri: “Wanasa kunanga kuti, andina mwamuna;

¹⁸ ngokuti waimbova no vamuna vashanu, no uwo woutori naye zvino asipi mwamuna wako: Ngo icho wavereketa gwinyiso.”

¹⁹ Jimayi rakati kwaari: “Mambo, ndinovona kuti uri muprofeti.

²⁰ Majibaba edu akadira kuna iri dundhu, na imwimwi munoti, kuti mu Jerusarema ndiyo ndau inosisira kudiriremwo.”

²¹ Jesu wakati kweriri: “Jimayi, tenda ichi, kuti nguva inoviya apo amuzodiri Baba kuno iri dundhu pikija mu Jerusarema.

²² Imwimwi munodira chomusikazivi; isisu tinodira chotinoziva: Ngokuti ruponeso runobva ku vajudha.

²³ Ngokuti nguva inoviya, nazvino yaapano, apo vadiri vo gwinyiso vanozodira Baba mu Mweya no mugwinyiso: Ngokuti Baba vanopshaka vakadaro kumudira.

²⁴ Mwari ndi Mweya, naavo vanomudira kunosisira kuti vamudire mu Mweya no mugwinyiso.”

²⁵ Jimayi rakati kwaari: “Ndinoziva kuti Mesiya unoviya, uwo unozwi Kristu: Naapo aviya unozotibvunja zviro zvese.”

²⁶ Jesu wakati kweriri: “Ndini unovereketa newe.”

²⁷ Ngo nguva iyi vajiji vake vakaviya, navo vakashamiswa ngokuti waivereketa no jimayi; pikija zvakadaro akuna wakati kwaari kuti unopshakenyi? Nokuti, unovereketa naro ngenyi?

²⁸ Ndizvo jimayi rakasiya juvi raro, rakahwirira ku guta, rikati kuvanarume:

²⁹ “Viyanyi muvone mundhu uwo wandibvunja zvese zvondakaita; uwu andiyepi here Kristu?”

³⁰ Vakabuda kubva muguta, vachiviya kwaari.

³¹ Ngo nguva iyo vajiji vake vakamukumbira, vechiti: “Rabhi, iha.”

³² Asi wakati kwavari: “Inini ndinakwo kuha kwo musikazivi imwimwi.”

³³ Ndizvo vajiji vakati umwe kwo umweni: “Uripo here mundhu wamuzisira chokuha?”

³⁴ Jesu wakati kwavari: “Kuha kwangu ngokwokuti ndiite kuda kwo uwo wakandituma, no kupeja mushando wake.”

³⁵ Amunangi here kuti kwasara mweji murongomuna naapo kwooguma kukotora? Ringiranyi ndinoti kwomuri, musanyi majiso enyu, muringire muminda, ngokuti yachena nazvino yosisira kukotohwa.

³⁶ No uwo unokotora unoashira mu pochero, no unounganija michero yo kupona kusikaperi. Kuti iye unosima naye unokotora vadakare pamwepo.

³⁷ Ngokudari mazwi akangwara aya ano gwinyiso okuti: Umwe unokusha, no umweni unokotora

³⁸ Ndakamutuma kuti mukotore izvo zvo musikazivi kushandira: Vandhu vamweni vakashanda na imwimwi mwakanghwina mumushando wavo.

³⁹ No vandhu vazhinji vo guta ro vaSamariya vakamutenda ngo ndava yo izwi ro jimayi, rerakapupura, kuti: Wandibvunja zvese zvo ndakaita.

⁴⁰ Ndizvo apo vaSamariya vayinga vaguma kwaari, vakamukumbira kuti agare navo: Naye wakagara apo mazuva maviri.

⁴¹ No vazhinji vamweni vakamutenda ngo ndava yo izwi rake:

⁴² Navo vakati, kuno jimayi: “Zvino tinotenda, haiwa ngo ndava yokuvereketa kwako, ngokuti tamuzwa tega, nesu tinoziva kuti uwu ngo chakwadi uri Muponesi wo nyika.”

Kurapwa kwo mwana wo nduna

⁴³ Ngosure kwo mazuva maviri wakabva apo, akaenda mu Garire.

⁴⁴ Ngokuti Jesu pachake wakapupura kuti muprofeti aareremejwi mu nyika yake.

⁴⁵ Ndizvo apo aguma mu Garire, vaGarire vakamuashira, ngokuti vese vayinga vakavona zvese zvaakaita mu Jerusarema pamushongano wo kuha: Ngokuti ava navo vakaenda kumusongano wo kuha.

⁴⁶ Ndizvo Jesu wakaviyazve mu Kana ro Garire, apo paakaphinduja kumwa kuyita vhini. Kwaiapo nduna yakatikuti yayiva no mwana wayo waihwara mu Kaperanaume.

⁴⁷ Naapo yazwa kuti Jesu wayinga abva Judhiya, aguma mu Garire, yakaguma kwaari, yakamupota kuti abzuke aponese mwana wayo, ngokuti wayinga woda kufa.

⁴⁸ Jesu wakati kwoiri: “Kuti musikavoni mivoniso no mishamiso amuzotendi.”

⁴⁹ Nduna yakati kwaari: “Mambo, bzuka mwana wangu asati wafa.”

⁵⁰ Jesu wakati kwoiri: “Enda, mwana wako wapona.” Mundhuwo wakagonda izwi raakavereketa kwaari Jesu, naye wakaenda.

⁵¹ Kwakati achabzuka, varanda vake vakashongana naye, vechiti: “Mwana wako wapona.”

⁵² Ndizvo wakabvunjisa nguva iyo yaakatanga kuyita nane ndiyo. Navo vakati kwaari: “Zuro ngo nguva yochinomwe kujiya muviri kwakapera.”

⁵³ Ndizvo baba vakaziva kuti ndiyo nguva yaakavereketa Jesu kwaari kuti, mwana wako wapona: Naye wakatenda, no nyumba yake yese.

⁵⁴ Uwu ndiwozve mushamiso wochipiri waakayita Jesu, apo aguma Garire abva Judhiya.