Johani 21 - NOVO TESTAMENTO EM NDAU

Jesu unojivonisa pa gandhwa

¹ Ngosure kwo izvi Jesu wakajivonisazve kuvajiji vake, vari pa jombe ro Tibheriyasi; naye wakajivonisa ngo njira iyi.

² Vayiva vari pamwepo Simoni Pedru, na Tomasi, unozwi Munyambiri, na Natanaeri, uwo waibva Kana ro Garire, no vana va Zebhedhi, no vamweni vaviri vo vajiji vake.

³ Simoni Pedru wakati kwavari: “Ndinoenda kwootanda hove.” Vakati kwaari: “Nesu tinoendavo newe.” Vakaenda vakakwira mu ngarava, ngo uhwo usiku avazivi kubata chiro.

⁴ Asi apo kwooita mambakweja, Jesu wakayima pambhiripiri; asi vajiji avazivi kuziva kuti ndi Jesu.

⁵ Ndizvo Jesu wakati kwavari: “Vana munacho here chokuha?” Vakamupingura: “Haiwa.”

⁶ Wakati kwavari: “Khandiranyi juya ngo kurutivi hwo kumuho hwo ngarava, nemwi munozowana.” Ndizvo vakarikandira kudaro, inga vasina simba ro kurikweva ngo ndava yo kuwanda kwo hove.

⁷ Ndizvo mujiji uwo waaida Jesu wakati kuna Pedru “ndi Mambo.” Ndizvo Simoni Pedru apo azwa kuti ndi Mambo, wakasimira jira rake, ngokuti wayiva mitu wakajikandira mujombe:

⁸ Asi vajiji vamweni, vakaviya vari mu ngarava, ngokuti vayiva vasiri ndhambo no nyika, asi kwaida kuyita zana ro mamitha (100), vechikweva juya rina hove.

⁹ Ndizvo apo vaguma pa mbhiripiri vakavona muriro wo masimbe, no hove yakadihwa panyezuru po muriro, no chimanda.

¹⁰ Jesu wakati kwavari: “Visanyi jimweni jo hove jomwabata zvino.”

¹¹ Simoni Pedru wakakwiremwo akakweva juya pa mbhiripiri, rakazara ngo hove huru jayivemwo jiri zana no makumi mashanu na ndhatu (153): Pikija jayiva zhinji kudaro, juya arizivi kuparuka.

¹² Jesu wakati kwavari: “Viyanyi muhe.” Apana no umwe wo vajiji waishinga kumubvunjisa, kuti Uriyani? Vachiziva kuti ndi Mambo.

¹³ Jesu wakaviya, akatora chimanda, akavapa, no hove ngokudaro.

¹⁴ Zvino iyi vayinga yaanguva yechitatu yaakajivonisa Jesu kuvajiji ngosure kwo kumuka kwake kwo vakafa.

Hukuru hwa Pedru

¹⁵ Ndizvo apo vayinga vaha Jesu wakati kuna Simoni Pedru: “Simoni mwana wa Johani unondida here kupinda ava?” Wakati kwaari: “Eya, Mambo, unoziva kuti ndinokuda.” Wakati kwaari: “Havisa vana vo mabvuta angu.”

¹⁶ Wakati kwaarizve ngo kwo chipiri: “Simoni, mwana wa Johani, unondida here?” Wakati kwaari: “Eya, Mambo, unoziva kuti ndinokuda,” wakati kwaari: “Ngwarira mabvuta angu.”

¹⁷ Wakati kwaari ngo kwo chitatu: “Simoni, mwana wa Johani, unondida here?” Pedru wakasvipa mwoyo ngokuti wakati kwaari ngo kwo chitatu: “Unondida here?” Naye wakati kwaari: “Mambo, iwewe unoziva zvese, unoziva kuti ndinokuda.” Jesu wakati kwaari: “Havisa mabvuta angu.

¹⁸ Zvirokwazvo, zvirokwazvo, ndinoti kwouri, apo uchiri mupsha, waijisimija, wechifamba kuenda po waida, asi apo wazova musharuka, unozotambanuja nyara jako, no umweni unozokusimija, no kukuendesa, pousikadi.”

¹⁹ Wakavereketa izvi echipangijira kuti injira yakaitawani yaizofa ndiyo kuti airikije Mwari. Apo avereketa izvi, wakati kwaari: “Nditevere.”

Jesu no mujiji uwo waaida

²⁰ Ndizvo Pedru echikunukukira sure, wakavona mujiji uwo waaida Jesu, echimutevera, wiya wayinga akatsheyama paditi rake mukuha kwo madekoni, uwozve wakati: “Mambo, ndiyani unozokupira?”

²¹ Pedru echimuvona, wakati kuna Jesu: “Uwu kere, unozoitenyi?”

²² Jesu wakati kwaari: “Kudari ndechida kuti agare mbhera ndiviye, unenyi nazvo iwewe? Nditevere.”

²³ Ndizvo iri izwi rakabudira mukati mwevakoma, rokuti uwu mujiji aazofi: Asi Jesu aazivi kuzvinanga kwaari, kuti aazofi, asi kuti: Kudari ndechida kuti agare mbhera ndiviye, unenyi nazvo iwewe?

²⁴ Uwu ndiye mujiji uwo unopupura ngo izvi zviro, no wakatara izvi: Nesu tinoziva kuti uchapupu hwake ngo hwo gwinyiso.

²⁵ Zviripo zvimweni zvizhinji zvaakaita Jesu, kudari zvakatahwa chimwe nga chimwe chazvo, ndinoti pamweni no nyika pachayo aichaizokwana ngo tshamba jingatahwa.