Johani 20 - NOVO TESTAMENTO EM NDAU

Kumuka kwa Jesu

¹ Zvino ngo zuva rokutanga ro vhiki ngosure kwo sabatha wakaenda Mariya Magadhareni mangwanani kuchakasvipa kuiba, wakavona buwe rakamburumbujwa kubva pa guva.

² Ndizvo wakagogoma wakaguma kuna Simoni Pedru no kuno mujiji umweni uwo waaida Jesu, akati kwavari: “Vakabvisa Mambo kubva mu guva, nesu atizivi po vakamurajika.”

³ Ndizvo Pedru wakabuda no umweni mujiji vakaenda ku guva.

⁴ Zvino vakagogoma vari pamwepo: Mujiji umwenivo wakapindirija Pedru, naye wakatanga kuguma ku guva.

⁵ Echikotama pasi, wakaringira mukati, akavona machira akachena ari pasi, asi aazivi kunghwinemwo.

⁶ Ndizvo Simoni Pedru wakagumavo, echimutevera, iye wakanghwina mu guva, akavona machira akachena akarajikwa.

⁷ No dhuku iro rayinga rakasungwa musoro mwake risikazivi kurajikwa pamwepo no machira akachena, asi inga rakapetwa riri rega pandau imweni.

⁸ Ndizvo wakanghwinemwo mujiji umweni, uwo wakatanga kuguma pa guva, naye wakavona, akatenda.

⁹ Ngokuti inga vasati vaziva matahwa kuti kwaisisira kuti amuke kubva kwo vakafa.

¹⁰ Ndizvo vajiji avo vakaenda kanyi kwavo.

Jesu unovoneka kuna Mariya Magadhareni

¹¹ Asi Mariya wakayima kunja kwo guva echichema; achachema, wakakotama, akaringira mu guva.

¹² Naye wakavona ngirosi mbiri jakasimira zvakachena, jakagara imwe ngo kumusoro, no imweni ngo kutshoka, apo po wayinga wakarajikwa muviri wa Jesu.

¹³ Najo jakati kwaari: “Jimayi, unochemenyi?” Wakati kwejiri: “Ngokuti vabvisa Mambo wangu, neni andizivi po vakamurajika.”

¹⁴ Apo avereketa izvi wakakunukukira sure, wakamuvona Jesu, akaima, aazivi kumuziva kuti ndi Jesu.

¹⁵ Jesu wakati kwaari: “Jimayi, unochemenyi? Unopshaka yani?” Iye echipinimija kuti wayiva murimi wakati kwaari: “Mambo kudari wakamubvisa kubva pano, ndibvunjei po wakamurajika, neni ndimutore.”

¹⁶ Jesu wakati kwaari: “Mariya.” Naye wakakunukuka, akati kwaari, ngo rurimi hwo Chihebheru: “Rabhoni” (ukwo kunoti, Mujijisi)!

¹⁷ Jesu wakati kwaari: “Usandipshasa, ngokuti andisati ndakwira kuna Baba; asi enda kuno vanukuna vangu, wooti kwavari: Ndinokwira kuna Baba wangu, na Baba wenyu no kuna Mwari wangu, na Mwari wenyu.”

¹⁸ Mariya Magadhareni wakaviya akabvunja vajiji, kuti: “Ndavona Mambo” nokuti wakavereketa izvi kwaari.

Jesu unojivonisa kuna vajiji

¹⁹ Kwakati ngo zuvero, madekoni zuva rokutanga ro vhiki ngosure kwo sabatha, musuvo yakakonyiwa umwo mwayiva no vajiji ngo ndava yo kutya vajudha, Jesu wakaviya akaima pakati pavo, akati kwavari: “Kunyarara ngakuve kwomuri.”

²⁰ Avereketa izvi, wakavatatija nyara jake, no rutivi rwake. Naapo vajiji vakadakara apo vavona Mambo.

²¹ Jesu wakatizve kwavari: “Kunyarara ngakuve kwomuri: Kudari ngo zvaakandituma Baba, ngokudaro ndinomutumavo.”

²² Avereketa izvi wakavafemera, akati kwavari: “Ashiranyi imwimwi Mweya Wakachena.

²³ Pikija vese vomunozoregerera zvishaishi zvavo zvinozoregerehwa kwavari, no pikija ndiyani vomusikazoregereri avazorekerehwi.”

Kutama kutenda kwa Tomasi

²⁴ Asi Tomasi, umwe wo gumi na vaviri, uwo unozwi Munyambiri, wayinga asiri navo apo Jesu wakaviya.

²⁵ Ndizvo vajiji vamweni vakati kwaari: “Tamuvona Mambo.” Asi iye wakati kwavari: “Kuti ndisikazivi kuvona munyara jake mbanga jo zvipikiri, ndipfekemwo chikunwe changu mu mbanga jo zvipikiri, ndipfeke nyara yangu parutivi hwake, andizotendi.”

²⁶ Ngosure kwo mazuva masere, vajiji vayivazve mukati, na Tomasi wayiva navo: Jesu wakaviya, musuvo inga yakakonywa, wakayima pakati pavo, wakati: “Kunyarara ngakuve kwomuri.”

²⁷ Ndizvo wakati kuna Tomasi: “Dirai chikunwe chako uvone nyara jangu, utambanuje nyara yako uipfeke pa rutivi rwangu, usaita usikatendi, asi unotenda.”

²⁸ Tomasi wakapingura, akati kwaari: “Mambo wangu, Mwari wangu.”

²⁹ Jesu wakati, kwaari: “Ngokuti wandivona, wazotenda; vanomuchena avo vanotenda vasikazivi kuvona.”

Chidisiso cho bhuku iri

³⁰ Ndizvo Jesu wakayita mivoniso imweni mizhinji, mukuvona kwo vajiji vake, isikazivi kutahwa mutshamba iyi:

³¹ Asi iyi yakatahwa kuti imwimwi mutende kuti Jesu uri Kristu, Mwana wa Mwari, nokuti ngo kutenda muve no kupona ngo zina rake.