Johani 2 - NOVO TESTAMENTO EM NDAU

Muchadho mu Kana ro Garire

¹ Na ngo zuva ro chitatu kwayivapo muchadho mu Kana ro Garire, na mayi wa Jesu wayivapo.

² Na Jesu wakakokwavo no vajiji vake kumuchadho.

³ Naapo vhini rapera, mayi wa Jesu vakati kwaari: “Avachina vhini.”

⁴ Na Jesu wakati kwaari: “Chinenyi ichi kwendiri no kwouri, mayi? Nguva yangu aisati yaguma.”

⁵ Mayi wake vakati kuvashandi: “Pikija chinyi chaanonanga kwomuri, itanyi.”

⁶ Zvino kwayivapo mabiya wo mapuwe matandhatu okumwa kudari ngo muitiro wo vajudha wokushamba, rimwe nga rimwe rainghwina majuvi maviri nokuti matatu.

⁷ Jesu wakati kwavari: “Zajanyi mabiya ao ngo kumwa.” Navo vakaazaja kuti tumbhwi.

⁸ Naye wakati kwavari: “Cheranyi zvino muende naro kuno mutungamiriri wo muchadho.” Navo vakaenda naro.

⁹ Apo mutungamiriri wo muchadho waravira kumwa iyo yakapindujwa kuyita vhini, asikazivi kuti rabva kwapi (asi vashandi avo vakachera kumwa vaiziva); mutungamiriri wo muchadho wakadanija mukwambo.

¹⁰ Naye wakati kwaari: “Mundhu wese unobudisa kutanga vhini yakanaka; naapo vandhu vamwa kakurutu unobudisa iro risikazivi kunasa kunaka: Asi iwewe wakangwarira vhini rakanasa kunaka mbhera zvino.”

¹¹ Uwu ndiwo mushamiso wo kutanga waakayita Jesu mu Kana ro Garire, wakapangijira pambhene uthende hwake, no vajiji vake vakatenda kwaari.

¹² Ngosure kwo izvi wakabzuka kuenda Kaperanaume, iye na mayi wake, no vanukuna vake, no vajiji vake; navo vakagara apo mazuva asikazivi kuwanda.

Jesu muthemperi

¹³ No Phasika ro vajudha rayiva phedo, na Jesu wakakwira Jerusarema.

¹⁴ Naye wakavona mu themperi avo vaitengesa n'ombe no mabvuta no njiva, no vaitenganisana mare vechigara.

¹⁵ Naapo ayinga wakayita chipembere cho mapote, wakambirimbija vese kubva mu themperi, zvese mabvuta no n'ombe; wakadurura pasi mare yo vaitenganisana, wakawisa mathafura avo;

¹⁶ naye wakati kuno avo vaitengesa njiva: “Bvisanyi izvi zviro kubva pano; musaita nyumba ya Baba wangu nyumba yo kutengesera.”

¹⁷ No vajiji vake vakacherecheja kuti, kwakatahwa kuti: “Kuvangirira ngo ndava yo nyumba yako kunozondipeja.”

¹⁸ Ndizvo vajudha vakamupingura, vakati kwaari: “Muvoniso wenyi woungaita kutivonisa kuti uno simba rokuita zviro izvi?”

¹⁹ Jesu wakapingura, akati kwavari: “Phwanyani iri themperi, na ngo mazuva matatu ndinozorivakazve.”

²⁰ Ndizvo vajudha vakati: “Themperi iri rakavakwa ngo makore ari makumi marongomuna na matandhatu, newe ungarivaka here ngo mazuva matatu?”

²¹ Asi iye wakavereketa ngo ndava yo themperi ro muviri wake.

²² Ndizvo apo amuswa kubva kwo vakafa, vajiji vake vakacherecheja kuti wayinga wakavereketa ngo ichi, navo vakatenda zvakatahwa, no izwi iro raakavereketa Jesu.

²³ Zvino apo ayiva mu Jerusarema mu Phasika, mukuha, vazhinji vakatenda zina rake, vechivona mishamiso yake yaakaita.

²⁴ Asi Jesu aazivi kujipira kwavari, ngokuti iye waiziva vandhu vese.

²⁵ Zve inga asikatami kuti mundhu naumwe apupurire kwaari ngo ndava yo mundhu; ngokuti iye waiziva pachake izvo zviri mukati mwo mundhu.