Johani 18 - NOVO TESTAMENTO EM NDAU

Kusungwa kwa Jesu

¹ Apo wayinga avereketa izvi, wakabuda no vajiji vake akaambuka mwombera mwo mukova wo Kedroni, apo payiva no munda, iye wakanghwina mukati mwao no vajiji vake.

² Na Judhasi uwo wakamupira, waiziva ugarohwo ngokuti Jesu waiunganemwo kazhinji no vajiji vake.

³ Ndizvo, Judhasi aashira chikwata, no vatungamiriri kubva ku vapristi vakuru no vafarisi, vakagumapo, vano zvivheneko, no masasi no zvokurwa ndizvo.

⁴ Ndizvo Jesu echiziva kuti zvese zvinozomugumira, wakabudira kwavari, akati kwavari: “Munopshaka iyani?”

⁵ Vakamupingura: “Jesu wo Nazaretha.” Wakati kwavari: “Ndini.” Na Judhasi uwo wakamupira, wayinga akaima navo.

⁶ Ndizvo apo avabvunja kuti: Ndini, vakayita pfundamutete, vakawa pasi.

⁷ Ndizvo wakavabvunjisazve, akati: “Munopshaka iyani?” Navo vakati: “Jesu wo Nazaretha.”

⁸ Jesu wakavapingura: “Ndamubvunja kuti, ndini: Ndizvo kuti mwechipshaka inini regeranyi, ava vaende.”

⁹ Kuti izwi rizarisike, iro rinoti: Avo vo wakandipa andizivi kurashikihwa naumwe wavo.

¹⁰ Ndizvo Simoni Pedru inga ano shoti, wakaizaura, wakatema muranda wo mupristi mukuru, akagura njeve yake yo kumuho: Zina ro muranda uwo rayiva Marikusi.

¹¹ Ndizvo Jesu wakati kuna Pedru: “Hwirija shoti yako muchikhwama chako: Mukheyo waakandipa Baba, andizoumwi here?”

¹² Ndizvo chikwata no nduna no vatungamiriri vo vajudha vakabata Jesu, vakamusunga,

¹³ navo vakamuzisa kutanga kuna Anasi: Ngokuti iye wayiva vatezvara va Khaifasi, uwo wayiva mupristi mukuru ngo gorero.

¹⁴ Zvino Khaifasi ndiye wakavangwaja vajudha kuti kwaidikana kuti mundhu umwe afire vandhu.

Pedru unoramba Jesu

¹⁵ Asi Pedru wakamutevera Jesu, no mujiji umweni. Zvino uwo mujiji waizivikanwa ku mupristi mukuru, naye wakanghwina na Jesu muruvanje wo mupristi mukuru.

¹⁶ Asi Pedru wakayima pa musuvo kunja. Ndizvo mujiji umweni uwo waizivikanwa ku mupristi mukuru wakabuda kunja akavereketa kuno uwo waingwarira musuvo, akanghwinisa Pedru.

¹⁷ Ndizvo musikana uwo waingwarira musuvo, wakati kuna Pedru: “Newe auri umwe here wo vajiji vo uwu mundhu?” Wakati: “Andiriye akadi.”

¹⁸ No varanda no vatungamiriri vakayima apo vakabasa muriro wo masimbe; ngokuti kwaitondhora: Vaikota, na Pedru wakayima navo echikota.

Jesu pamberi po utongi wo vajudha

¹⁹ Ndizvo mupristi wakamubvunjisa Jesu ngo ndava yo vajiji vake, na ngo kujijisa kwake.

²⁰ Jesu wakamupingura: “Inini ndakavereketa pa mbhene ku vandhu vo nyika: Nguva jese ndaijijisa mu nyumba jo kudira, no mu themperi apo paiungana vese vajudha, andizivi kuvereketa chiro ngo kufishika.

²¹ Unondibvunjisirenyi? Bvunjisai avo vakandizwa, chendakavereketa kwavari: Ringira, avo vanoziva chendakavereketa inini.”

²² Naapo ayinga avereketa izvi, umwe wo vatungamiriri vayinga vakayima apo wakamurova Jesu ngo pama echiti: “Unopingura mupristi mukuru kudaro here?”

²³ Jesu wakamupingura: “Kudari ndavereketa zvakashata, pupura ngo zvakashatezvo; asi kudari zvakanaka, unondiroverenyi?”

²⁴ Ndizvo Anasi wakamutumira akasungwa kuna Khaifasi mupristi mukuru.

Pedru unorambazve Jesu

²⁵ Na Simoni Pedru wakayima echikota. Ndizvo vakati kwaari: “Newe auri umwe here wo vajiji vake?” Iye wakavapingura, akati: “Andiriyepi.”

²⁶ Umwe wo varanda wo mupristi mukuru wayiva hama yo uwo waakatema njeve Pedru, wakati: “Andizivi kukuvona unaye mumunda here?”

²⁷ Ndizvo wakakanijazve, paripo jongwe rakarira.

Jesu pamberi pa Piratu

²⁸ Ndizvo vakamukweva Jesu kubva kuna Khaifasi vachienda naye ku nyumba yo kutongera: Inga achiri mangwanani; ivo pachavo avazivi kunghwina mu nyumba yo kutongera, kuti vasazosvipiswa, kwokuti vahe Phasika.

²⁹ Ndizvo Piratu wakabudira kwavari, akati: “Ndava ngoyenyi yo munoitira uwu mundhu?”

³⁰ Vakapingura, kwaari: “Kudari uwu mundhu asayita zvakashata, inga tisikazivi kumupira kwouri.”

³¹ Ndizvo Piratu vakati kwavari: “Mutorenyi imwimwi mumutonge kudari ngo mipango yenyu.” Vajudha vakati kwaari: “Akutendehwi kuti isisu tiuraye mundhu nokuti ngowapi.”

³² Kwokuti rizarisike izwi iro raakavereketa Jesu echipangijira kuti injiranyi yaizofa ndiyo.

³³ Ndizvo Piratu wakanghwinazve mu nyumba yo kutongera, akadanija Jesu, akati kwaari: “Iwewe uri Mambo wo vajudha here?”

³⁴ Jesu wakapingura: “Unojivereketera izvi here nokuti vamweni vakazvinanga kwouri ndini?”

³⁵ Piratu wakapingura: “Inini ndiri mujudha here?” Jinja rako no vapristi vakuru vakakupira kwendiri: “Ichinyi chowakamboita?”

³⁶ Jesu wakapingura: “Umambo hwangu auri hwo mu nyika muno akadi: Kudari umambo hwangu hwayiva hwo mu nyika muno, varanda vangu inga vakandirwira kuti ndisapihwa ku vajudha: Asi zvino umambo hwangu ahuri hwo muno akadi.”

³⁷ Ndizvo Piratu wakati kwaari: “Ndizvo uri Mambo here?” Jesu wakapingura: “Iwewe unonanga kuti ndiri Mambo: Ngo iyi ndava ndakabahwa; na ngo iyi ndava ndakaviya mu nyika, kwokuti ndipupurire gwinyiso: Pikija ndiyani uri wo gwinyiso unozwa izwi rangu.”

³⁸ Piratu wakati kwaari: “Gwinyiso ichinyi?” Avereketa izvi, wakabudirazve ku vajudha, akati kwavari: “Andivoni ndava kwaari.”

Jesu unotongehwa kufa

³⁹ Asi imwimwi muno chirovejeso chokuti ndisunungure umwe kwomuri ngo Phasika: “Ndizvo munoda here kuti ndisunungure kwomuri Mambo wo vajudha?”

⁴⁰ Ndizvo vakamima, vechiti: “Haiwa uwu, asi Bharabhasi.” Zvino Bharabhasi wayiva jongoni.