Johani 17 - NOVO TESTAMENTO EM NDAU

Jesu unokumbirira vajiji vake

¹ Jesu wakavereketa izvi, wakamusa majiso ake mu denga, akati: “Baba, nguva yaguma; irikija Mwana wako, kuti Mwana wako akuirikije:

² Kudari ngo zvo wakamupa simba panyezuru po nyama yese, kwokuti vese vo wakamupa, iye avape kupona kusikaperi.

³ Uku ndikwo kupona kusikaperi, kuti vakuzive iwewe, Mwari wega wo gwinyiso, na Jesu Kristu uwo wo wakatuma.

⁴ Ndakakuirikija mu nyika: Ndakapeja mushando wo wakandipa kuti ndiuite.

⁵ Nazvino, iwewe Baba, ndiirikije pachako ngo kuirikijwa ukwo kwo ndayiva nakwo newe, ngo pamberi nyika isati yasikwa.

⁶ Ndakapangijira zina rako kuna avo vandhu vo wakandipa kubva mu nyika: Vayiva vako, newe wakavapa kwendiri, navo vakangwarira izwi rako.

⁷ Zvino vanoziva kuti zvese zvo wakandipa zvakabva kwouri:

⁸ Ngokuti mazwi owakandipa ndakaapavo kwavari, navo vakaashira, vakaziva ngo gwinyiso kuti ndakabva kwouri, vakatenda kuti iwewe wakandituma.

⁹ Ndinovakumbirira; andikumbiriri nyika, asi avo vo wakandipa, ngokuti, vari vako.

¹⁰ No zvese zvangu ngo zvako, no zvako ngo zvangu; neni ndinoirikijwa ndivo.

¹¹ Andichimwo akadi mu nyika, asi ava vachiri mu nyika, neni ndoviya kwouri. Baba vakachena, vangwarire ngo zina rako, avo vo wakandipa; kuti vayite umwe kudari tisu.

¹² Apo ndichinavo ndakavangwarira muzina rako, avo vo wakandipa; ndakavarinda, akuna naumwe wavo wakarashika, kwega mwana wo kurashwa, kuti matahwa azarisike.

¹³ Asi zvino ndinoviya kwomuri, no izvi ndinovereketa mu nyika kuti kudakara kwangu kuzarisike mukati mwavo.

¹⁴ Ndakapa kwavari izwi rako, no nyika yakavanyenya, ngokuti avari vo nyika akadi; kudari ndini andiri wo nyika akadi.

¹⁵ Andikumbiri kuti muvabvise kubva mu nyika, asi kuti muvangwarire kubva kuno uwo wakashata.

¹⁶ Avari vo nyika akadi, kudari ndini andiri wo nyika.

¹⁷ Vachenese ngo gwinyiso: Izwi rako riri gwinyiso.

¹⁸ Kudari ngo zvo wakandituma mu nyika, ngokudaro nenivo ndinovatuma mu nyika.

¹⁹ Ngo ndava yavo ndinojichenesa, kuti navo vacheneswevo ngo gwinyiso.

²⁰ Andivakumbiriri ava vega, asi naavo vanozotenda kwendiri ngo izwi ravo.

²¹ Kuti vese vayite umwe, kudari ndiwe Baba uri mukati mwangu, neni ndiri mukati mwako, kuti navo vagare mukati mwedu, kuti nyika itende kuti iwewe wakandituma.

²² No uthende, hwo wakandipa, ndakaupavo kwavari; kuti vayite umwe kudari tisu tiri umwe.

²³ Inini mukati mwavo, newe mukati mwangu, kuti vayitwe vakaperera vari umwe: Kuti nyika izive kuti iwewe wakandituma, nokuti unovada kudari ngo zvo unondida inini.

²⁴ Baba, vo wakandipa ndinoda kuti vavepo pendiri kuti varingire uthende hwangu, uhwo hwo wakandipa inini; ngokuti wakandida nyika isati yasikwa.

²⁵ Baba vakarurama, nyika, aizivi kukuziva asi inini ndinokuziva; na ava vakaziva kuti iwewe wakandituma:

²⁶ Neni ndakazivisa zina rako, neni ndinozorizivisa, kuti rudo urwo rwo wakandida ndirwo ugare mukati mwavo, neni mukati mwavo.”