Johani 16 - NOVO TESTAMENTO EM NDAU

¹ Ndakavereketa izvi kwomuri kuti musazokhugunyiswa.

² Vanozomumbirimbija kubva mu nyumba javo jo kudira: Eya, nguva inoviya apo mundhu wese, unozomuuraya, unozopinimija kuti uri kushandira Mwari.

³ Navo vanozoyita izvi ngokuti avazivi kumuziva Baba, nokuti inini.

⁴ “Asi ndakamubvunja izvi, kuti, apo yaguma nguva yazvo, mucherecheje kuti ndakamubvunja ndizvo.” “Asi andizivi kumubvunja izvi kubvira po kutanga, ngokuti ndayinga ndichinemwi.

Mushando wo Mweya wa Mwari

⁵ Asi zvino ndinoenda kuno uwo wakandituma; akuna naumwe wenyu unondibvunjisa, kuti: Unoenda, kwapi?

⁶ Asi ngokuti ndakavereketa izvi kwomuri, mwoyo yenyu yazara ngo kusururika.

⁷ Asi ndinomubvunja gwinyiso; kuti zvakamunakira kuti ndiende: Ngokuti kudari ndisikaendi, Muembezeri aazoviyi kwomuri, asi kudari ndikaenda, ndinozomutuma kwomuri.

⁸ Naye apo aviya unozotendisa nyika ngo ndava yo kushaisha, na ngo kururama, na ngo kutonga.

⁹ Ngo ndava yo kushaisha ngokuti avanditendi;

¹⁰ ngo ndava yo kururama ndinoenda kuna Baba, nemwi amusazondivoni;

¹¹ ngo ndava yo kutonga ngokuti muzvare wo nyika ino wakatongwa.

¹² Ndichina zvizhinji zvo kumubvunja, asi amusati mwaano simba ro kuzwisisa zvino.

¹³ Asi apo, Mweya wo gwinyiso waviya, unozomutungamirira mu gwinyiso rese: Ngokuti aazojivereketeri, asi zvaanozwa, ndizvo zvaanozovereketa, naye unozomupangijira zvinozoviya.

¹⁴ Uwo unozondiirikija, ngokuti unozoashira zvo kwangu, no kuzvizivisa kwomuri.

¹⁵ Zvese zvaanazvo Baba ngo zvangu, ndizvo ndakati kuti: Unozoashira zvokwangu; no kuzvipangijira kwomuri.”

Kusvipa mwoyo no kudakara

¹⁶ “Inguva doko nemwi amuchazondivoni, no nguva dokozve nemwi munozondivona.”

¹⁷ Vamweni vo vajiji vake vakavereketa pachavo, vechiti: “Chinyi ichi chaanovereketa kwetiri, kuti: Inguva doko nemwi amuchazondivoni, no nguva dokozve nemwi munozondivona, echitizve: Ngokuti ndinoenda kuna Baba?”

¹⁸ Ndizvo vakati: “Chinyi ichi chaanovereketa kuti, inguva doko? Atizivi kuti unonangenyi?”

¹⁹ Jesu wakaziva kuti vaida kumubvunjisa, naye wakati kwavari: “Munobvunjisana here pakati penyu, ngo icho chondananga, kuti, inguva doko nemwi amuchazondivoni, na ngo nguva dokozve, nemwi munozondivona?

²⁰ Zvirokwazvo, zvirokwazvo, ndinoti kwomuri, kuti munozochema no kurija mbhere, asi nyika inozodakara: Imwimwi munozotambujika, asi kutambujika kwenyu kunozotshandujwa kuyita kudakara.

²¹ Jimayi rooda kubereka rinotambujika, ngokuti nguva yaro yaguma; asi rabereka mwana, arichakarakaji ngo kuhwajihwa, ngo ndava yo kudakara kuti mundhu wabahwa mu nyika.

²² Nemwi munozotshumba zvino, asi ndinozomuvonazve no mwoyo yenyu inozodakara, no kudakara kwenyu akuna mundhu unokubvisa kubva kwomuri.

²³ Ngo iro zuva amuzondibvunjisi chiro. Zvirokwazvo, zvirokwazvo, ndinoti kwomuri, pikija chinyi chomunozokumbira kuna Baba ngo zina rangu unozochipa kwomuri.

²⁴ Mbhera zvino amuzivi kukumbira chiro ngo zina rangu: Kumbiranyi nemwi munozoashira kuti kudakara kwenyu kuzarisike.”

Jesu unonyisa nyika

²⁵ “Ndakavereketa izvi kwomuri ngo miezaniso, asi nguva inoviya apo andichazovereketi kwomuri ngo miezaniso, asi ndinozomupangijira pambhene ndi Baba.

²⁶ Ngo iro zuva munozokumbira ngo zina rangu, neni andinangi kwomuri kuti, ndinozomukumbirira kuna Baba;

²⁷ ngokuti Baba pachavo vanomuda, ngokuti imwimwi mwakandida, nemwi mwakatenda kuti ndakabva kuna Mwari.

²⁸ Ndakabva kuna Baba, ndakaguma mu nyika; zve, ndinosiya nyika, ndiende kuna Baba.”

²⁹ Vajiji vake vakati kwaari: “Ringira zvino wovereketa pambhene, auchavereketi ngo miezaniso.

³⁰ Zvino tinoziva kuti munoziva zvese, autami kuti mundhu naumwe akubvunjise: Ngo ichi tinotenda kuti iwewe wakabva kuna Mwari.”

³¹ Jesu wakavapingura, echiti: “Zvino munotenda here?

³² Ringiranyi, nguva inoviya, eya yatoguma, kuti munozoparajwa uwo no uwo kuno zvake, no kundisiya ndega, asi andiri ndega akadi: Ngokuti Baba uneni.

³³ Izvi ndakamuvhunja kuti kwendiri muwane kunyarara. Munyika munozova no nyatwa: Asi shinganyi mwoyo, ndainyisa nyika.”