Johani 15 - NOVO TESTAMENTO EM NDAU

Muvhini no matavi

¹ “Inini ndiri muvhini wo chakwadi, na Baba wangu murimi.

² Matavi ese ari mukati mwangu, asikabereki michero, unoabvisa, nao ese anobereka michero unoatongora kuti abare michero yakapinda kuwanda.

³ Imwimwi muri vakatocheneswa ngo izwi rondakavereketa kwomuri.

⁴ Garanyi mukati mwangu, neni mukati mwenyu. Kudari ngo davi risina simba rokubereka michero rega, risikagari mukati mwo muvhini, zvakadaro nemwi kudari musikagari mukati mwangu.

⁵ Inini ndiri muvhini, imwimwi muri matavi: Uwo unogara mukati mwangu, neni mukati mwake, ndiye unobereka michero yakawanda, ngokuti ngo kunja kwangu imwimwi amungakoni kuyita chiro.

⁶ Pikija ndiyani usikagari mukati mwangu, unorashwa kudari ngo davi, rinozooma, navo vanoaunganija vaakhandire mu muriro, nao anopsha.

⁷ Kudari mwechigara mukati mwangu, no mazwi angu anogara mukati mwenyu nemwi munozokumbira icho cho munoda, nacho chinozoitwa kwomuri.

⁸ Ngo ichi Baba wangu vanoirikijwa, kuti mubare michero yakawanda, ngokudaro munozoita vajiji vangu.

⁹ Kudari ndi Baba vakandida, zvakadaro neni ndakamudavo: Garanyi murudo rwangu.

¹⁰ Kudari mwechingwarira mipango yangu, munozogara murudo rwangu; kudari ndini ndakangwarira mipango ya Baba wangu, no kugara murudo rwake.

¹¹ Ndakavereketa izvi kwomuri kuti kudakara kwangu kugare kwomuri, nokuti kudakara kwenyu kuzarisike.

¹² Uwu ndiwo mupango wangu, kuti mudane, kudari ndini ndakamuda.

¹³ Akuna mundhu uno rudo rukuru kuno urwu, kuti mundhu afe ngo ndava yo shamwari jake.

¹⁴ Imwimwi muri shamwari jangu kudari mwechyita izvo zvo ndinomupanga.

¹⁵ Andichamudaniji kuti muri varanda, ngokuti muranda aazivi chinoitwa ndi Mambo wake, asi ndakamudanija kuti muri shamwari: Ngokuti zvese zvo ndakazwa kuna Baba wangu, ndakazvizivisa kwomuri.

¹⁶ Imwimwi amuzivi kunditshanangura, asi ndakamutshanangura inini, ndikamuemesa kuti muende, mubare michero, nokuti michero yenyu igare: Kuti pikija chinyi chomunozokumbira kuna Baba ngo zina rangu, vachipe kwomuri.

¹⁷ Izvi ndinomupanga kuti mudane.”

Nyika inonyenya Jesu no vake

¹⁸ “Kudari nyika yechimunyenya, munoziva kuti yakatanga kundinyenya inini.

¹⁹ Kudari mwayiva vo mu nyika, nyika yaizoda vayo: Asi ngokuti amuri vo mu nyika akadi, asi ngokuti ndakamutshanangura kubva mu nyika, ndizvo nyika inomunyenya.

²⁰ Karakajanyi izwi iro ro ndakavereketa kwomuri, kuti: Muranda aatongopindi mambo wake. Kudari vakanditeverera inini, vanozomutevereravo: Kudari vakangwarira izwi rangu, vanozongwarira no renyuvo.

²¹ Asi zvese izvi vanozomuitira ngo ndava yo zina rangu, ngokuti avamuzivi uwo wakandituma.

²² Kudari ndisikazivi kuviya ndikavereketa kwavari, avasaizova no kushaisha: Asi zvino avachina chokuregerehwa ndicho ngokushaisha kwavo.

²³ Uwo unondinyenya, unonyenyavo Baba wangu.

²⁴ Kudari ndisikazivi kuyita pakati pavo mishando iyo isikazivi kumboitwa ngo umweni, vangadari vasina kushaisha; asi zvino vakavona vakanyenya tese inini na Baba wangu.

²⁵ Asi kuti izwi rizarisike iro rakatahwa mumipango yavo, rokuti: Vakandinyenya, pasina ndava.

²⁶ Asi apo aguma Muembezeri, uwo wondinozotuma kwomuri echibva kuna Baba, Mweya wo gwinyiso, unobva kuna Baba, iye unozopupura ndini.

²⁷ Nemwizve munozopupura, ngokuti mwayiva neni kubvira mukutanga.”