Johani 14 - NOVO TESTAMENTO EM NDAU

Jesu ndiye njira

¹ “Mwoyo yenyu isatambujika; tendanyi kuna Mwari, mutendevo kwendiri.

² Mu nyumba mwa Baba wangu huriyo ugaro hwakawanda: Kudari zvisakadaro, inga ndakamubvunja; ngokuti ndinoenda kwoomunasirira ugaro.

³ Kudari ndechienda kwoomunasirira ugaro, ndinozoviyazve, no kumuashira ndambhwine, kuti pondiri, nemwi mungazovapovo.

⁴ No pondinoenda munoiziva njira.”

⁵ Tomasi wakati kwaari: “Mambo, atizivi pounoenda; no njira tingaiziva ngenyi?”

⁶ Jesu wakati kwaari: “Inini ndiri njira, no gwinyiso, no kupona; akuna unoviya kuna Baba, asikaviyi ndini.

⁷ Kudari mwaindiziva inga mwakamuziva Baba wanguvo. Kubvira pano munomuziva, nemwi mwakamuvona.”

⁸ Firipi wakati kwaari: “Mambo, tipangijire Baba, nesu tikwaniswe.”

⁹ Jesu wakati kwaari: “Ndakagara nemwi mukuvo wakareba, asi ausati wandiziva here, Firipi? Iye wakandivona inini wakavona na Baba: Unonanga ngenyi kuti, Tipangijire Baba?

¹⁰ Autendi here, kuti inini ndiri mukati mwa Baba, na Baba vari mukati mwangu? Mazwi ondinovereketa kwomuri, andijivereketeri: Asi Baba vanogara mukati mwangu ndivo vanoyita mishando yavo.

¹¹ Tendanyi inini kuti ndiri mukati mwa Baba, na Baba vari mukati mwangu, asi kuti musikatendi kudaro, tendanyi inini ngo ndava yo mishando yambhwine.

¹² Zvirokwazvo, zvirokwazvo, ndinoti kwomuri: Uwo unonditenda; mishando yo ndinoita, unozoyitavo, no mishando mukuru kuno iyi unozoyita, ngokuti inini ndinoenda kuna Baba.

¹³ Pikija chinyi chomunozokumbira ngo zina rangu, ndinozochiyita, kuti Baba airikijwe ngo Mwana.

¹⁴ Kudari mwanyazokumbirenyi kwendiri ngo zina rangu, inini ndinozochiyita.”

Jesu unogondisa Mweya Wakachena

¹⁵ “Kudari mwechindida, munozongwarira mipango yangu.

¹⁶ Neni ndinozokumbira kuna Baba naye unozomupa umweni Muembezeri kuti agare nemwi kusikaperi.

¹⁷ Mweya wo gwinyiso, uwo aungaashihwi ngo nyika; ngokuti aiuvoni, aiuzivizve: Asi imwimwi munouziva, ngokuti unogara nemwi, unozogara mukati mwenyu.

¹⁸ Andizomusiyi muri ndherera, ndinozoviya kwomuri.

¹⁹ Kuchino nguva doko no nyika aichandivoni, asi imwimwi munondivona, ngokuti inini ndinopona nemwivo munozopona.

²⁰ Ngo iro zuva munozoziva kuti inini ndiri mukati mwa Baba wangu, na imwimwi muri mukati mwangu, neni ndiri mukati mwenyu.

²¹ Uwo uno mipango yangu, echiingwarira, uwo ndiye unondida; no uwo unondida unodiwa ndi Baba wangu, neni ndinozomuda, ndijivonise kwaari.”

²² Judhasi (asiriye Isikariyoti), wakati kwaari: “Mambo, zvinoita ngenyi kuti unozojivonisa kwetiri, usikajivonisi ku nyika?”

²³ Jesu wakapingura, akati kwaari: “Pikija ndiyani unondida unozongwarira mazwi angu, na Baba wangu vanozomuda, nesu tinozoviya kwaari, tiite ugaro hwedu pamwepo naye.

²⁴ Uwo usikandidi, aangwariri mazwi angu; no izwi ro munozwa asiri rangu akadi, asi ngo ra Baba wangu avo vakandituma.

²⁵ Izvi ndakamubvunja ndichakagara nemwi.

²⁶ Asi Muembezeri, Mweya Wakachena, uwo waanozotuma Baba ngo zina rangu, iye unozomujijisa zviro zvese amucherechejise zvese zvo ndakamubvunja.

²⁷ Kunyarara ndinokusiya kwomuri, kunyarara kwangu ndinomupa: Andimupi kudari ngo kupa kwo nyika. Mwoyo yenyu isatambujika, isakarukazve.

²⁸ Mwazwa kuti ndati kwomuri, ndinoenda, neni ndinozoviyazve kwomuri. Kudari mwayindida mwaizodakara ngokuti ndinoenda kuna Baba, ngokuti Baba vari mukuru kwondiri.

²⁹ Zvino ndakamubvunja zvisati zvaitika, kuti apo zvazoitika mutende.

³⁰ Ngosure kwoizvi andichazovereketi kakurutu nemwi; ngokuti muzvare wo nyika iyi unoviya, naye aana chiro mukati mwangu.

³¹ Asi kuti nyika izive kuti ndinomuda Baba, nokudari ndi Baba wakandipa mupango ngokudaro ndinoita. Mukanyi ngatibve pano.”