Johani 13 - NOVO TESTAMENTO EM NDAU

Jesu unosuka tshoka vajiji vake

¹ Zvino kusati kwaguma kuha kwo Phasika, Jesu echiziva kuti nguva yake yaguma kuti abve mu nyika muno, aende kuna Baba, avada vake avo vari mu nyika, wakavada mbhera mukupera.

² Vachiha, Dhiabhorosi inga atonghwina mu mwoyo mwa Judhasi Isikariyoti mwana wa Simoni kuti amupire.

³ Echiziva kuti Baba ayinga amupa zvese munyara jake, nokuti wakabva kuna Mwari, nokuti unoenda kuna Mwari;

⁴ wakamuka kubva pokuha wakakhumura zvokusimira zvake wakatora jira ro kupukuta ndiro, akasungira muchiunu chake.

⁵ Naapo wakadurura kumwa mundiro, akatanga kusuka tshoka jo vajiji no kujipukuta ngo jira rayinga akasungira.

⁶ Ndizvo wakaguma pana Simoni Pedru, uwo wakati kwaari: “Mambo iwewe unosuka tshoka jangu here?”

⁷ Jesu wakapingura, akati kwaari: “Icho chendinoita autochizivi zvino, unozochiziva ngosure kwo izvi.”

⁸ Pedru wakati kwaari: “Aungasuki tshoka jangu narini.” Jesu wakapingura: “Kudari ndisikakusuki, tshoka auna ugaro neni.”

⁹ Simoni Pedru wakati kwaari: “Mambo kusachayita tshoka jangu jega asi najo nyara jangu no musoro wangu.”

¹⁰ Jesu wakati kwaari: “Uwo wasukwa aachatami chiro chimweni kwega kusuka tshoka jake, asi wacheneswa aembho: Nemwi muri vacheneswa, asi haiwa mwese.”

¹¹ Wakamuziva uwo waizomupira, ndizvo wakati: Amuzivi kucheneswa mwese.

¹² Ndizvo apo ayinga asuka tshoka javo, no kutora zvokusimira zvake no kugara pasizve, wakati kwavari: “Munoziva here chendamuitira?

¹³ Munondidanija kuti: Mujijisi nokuti Mambo, nemwi munonasa kunanga, ngokuti ndiri iye.

¹⁴ Ndizvo kudari inini Mambo no Mujijisi ndasuka tshoka jenyu nemwivo kunodikana kuti musukane tshoka jenyu:

¹⁵ Ngokuti ndamupa chivonero kuti nemwi muite kudari ngo zvondinoita kwomuri.

¹⁶ Zvirokwazvo, zvirokwazvo ndinoti kwomuri: Muranda aatongopindi mambo wake, zve no wakatumwa aatongopindi uwo wakamutuma.

¹⁷ Kudari mwechiziva izvi munomuchena kudari mwechizviyita.

¹⁸ Andivereketi ndimwi mwese akadi; ndinovaziva avo vo ndakatshanangura: Asi kuti matahwa azarisike, anoti: Uwo unoha chimanda changu wakandimusira chisisinindo chake kurwisana neni.

¹⁹ Kubvira zvino ndinomubvunja zvisati zvaitika, kuti apo zvaitika kuti mutende kuti ndiri iye.

²⁰ Zvirokwazvo, zvirokwazvo ndinoti kwomuri: Iye unoashira uwo wo ndinotuma, unoashira inini; no uwo unondiashira unoashira uwo wakandituma.”

Jesu unozivisa kuti unozopihwa

²¹ Apo Jesu ayinga avereketa izvi wakatambujika mumweya mwake, wakapupura akati: “Zvirokwazvo, zvirokwazvo ndinoti kwomuri, kuti umwe kwomuri unozondipira.”

²² Vajiji vakaringirana vasikazivi kuti unovereketa ndiyani.

²³ Wayivapo umwe wo vajiji vake wayinga akacheama pa diti ra Jesu waidiwa ndi Jesu.

²⁴ Ndizvo Simoni Pedru wakamukopera kuti abvunjise kwaari, kuti ndiyani waanovereketa ndiye.

²⁵ Ndizvo uwo wakacheama pa diti ra Jesu wakati kwaari: “Mambo, ndiyani?”

²⁶ Ndizvo Jesu wakapingura: “Ndiye uwo wondinozoseva musuva ndimupe.” Naapo aseva musuva wakaupa Judhasi Isikariyoti mwana wa Simoni.

²⁷ Na ngosure kwo musuva Sathani wakanghwina kwaari. Ndizvo Jesu wakati kwaari: “Icho chounoita chiite ngo kukasira.”

²⁸ Kwayiva kusina mundhu pakuha wakaziva singwisingwi yo zvaakavereketa kwavari:

²⁹ Ngokuti Judhasi wayiva wo chikhwama, vamweni vaipinimija kuti Jesu wakati kwaari: Tenga zvotinotama mu Phasika; nokuti ape chiro ku varombo.

³⁰ Ndizvo apo aashira musuva paripo wakabuda kuenda: Inga hwa usiku.

Mupango mupsha

³¹ Ndizvo, apo abuda, Jesu wakati: “Zvino Mwana wo Mundhu unoirikijwa, na Mwari unoirikijwa mukati mwake:

³² Kudari Mwari echizoirikijwa mukati mwake, Mwari unozomuirikijazve mukati mwake pachake, naye unozomuirikija ngo kukasira.

³³ Vana vadoko, inguva doko ndichinemwi: Munozondipshaka, no kudari ngo zvo ndakavereketa ku vajudha, kuti, pondinoenda, amuna simba ro kuviyapo, nazvino ndinonanga kudaro kwomuri.

³⁴ Mupango mupsha ndinomupa kuti mudane. Kudari ndini ndakamuda ngokudaro, imwimwivo mudane.

³⁵ Ngo ichi vese vanoziva kuti imwimwi muri vajiji vangu, kudari muno rudo umwe kwo umweni.”

Kuziviswa kwa Pedru

³⁶ Simoni Pedru wakati kwaari: “Mambo, unoenda kwapi?” Jesu wakapingura: “Pondinoenda, auna simba rokunditevera zvino, asi unozotevera sure kwo izvi.”

³⁷ Pedru wakati kwaari: “Mambo, andina simba rokukutevera zvino ngenyi? Ndinozofa ngo ndava jako.”

³⁸ Jesu wakapingura: “Unozofa ngo ndava jangu here? Zvirokwazvo, zvirokwazvo, ndinoti kwouri, jongwe arizoriri usati wandiramba katatu.”