Johani 12 - NOVO TESTAMENTO EM NDAU

Mariya unozoja tshoka ja Jesu

¹ Ndizvo mazuva matandhatu Phasika risati raguma, Jesu wakaguma Bhetani, apo payiva na Razaro, uwo waakamusa kwo vakafa.

² Ndizvo vakamuitira kuha apo, na Marita wakavapakurira, asi Razaro wayiva umwe wo avo vaitseyama naye pa kuha.

³ Naapo Mariya wakatora mafuta okuzora anoda kukwana litha onardhi aidhura, wakazoja tshoka ja Jesu, akapukuta tshoka jake ngo bvuji rake. No nyumba yakazara ngo gwema ro mafuta.

⁴ Asi Judhasi Isikariyoti, umwe wo vajiji vake, uwo waizomupira, wakati:

⁵ “Kwaregehwa ngenyi kutengesa mafuta aya ngo pondo jiri gumi na shanu, jipuwe varombo?”

⁶ Izvi wakazvivereketa kusiri kuvada varombo, asi ngokuti wayiva mbavha, waingwarira nyede, naye waitora zvaidihwemwo.

⁷ Ndizvo Jesu wakati: “Muregerenyi, ngaangwaririre mbhera zuva ro kuvigwa kwangu.

⁸ Ngokuti varombo munavo nguva jese, asi amuneni akadi nguva jese.”

Bangano rokuda kuuraya Razaro

⁹ Ndizvo vazhinji vo mbungano yo vajudha vakaziva kuti wayivapo, navo vakaviya haiwa kwokuti vavone Jesu kwega, asi kuti vavone Razaro, uwo waakamusa kubva kwo vakafa.

¹⁰ Asi vapristi vakuru vakapangana kuti vauraye na Razarowo;

¹¹ ngokuti ngo ndava yake vazhinji vo vajudha vakaenda vakatenda kuna Jesu.

Kunghwina kwa Jesu mu Jerusarema

¹² No zuva rayitevera mbungano huru, iyo yakaviya kumushongano wo kuha, apo yazwa kuti Jesu woviya Jerusarema.

¹³ Yakatora matavi emichindu, yakabuda kwooshongana naye, vakadanijira, vechiti: “Hosana, unomuchena uwo unoviya ngo zina ra Mambo, uri Mambo wo Israeri.”

¹⁴ Na Jesu awana mbongoro ipsha, wakagadha panyezuru payo, kudari ngo zvakatahwa:

¹⁵ “Usatya, iwewe mwana wo kaji wo Zioni” Ringira, mambo wako unoviya, akagadha panyezuru po tshiru ro mbongoro.

¹⁶ Vajiji vake avazivi kuzwisisa izvi pakutanga, asi Jesu airikijwa, vakazocherecheja, kuti izvi zvayinga zvakatahwa ndiye, nokuti vakamuitira izvi.

¹⁷ No mbungano iyo yayiva naye apo paakadanija Razaro kubva mu guva akamumusa kwo vakafa, yakayita chapupu.

¹⁸ Ngo iyi ndava mbungano yakaenda kwooshongana nayezve ngokuti yayinga yazwa kuti wakayita uwu mushamiso.

¹⁹ Ndizvo vafarisi vakavereketa pakati pavo, kuti: “Ringiranyi, amungaiti chiro: Vonanyi nyika yese inomutevera.”

Vamweni vo vaGiriki vanoda kuvona Jesu

²⁰ Kwayivapo vaGiriki vakatikuti pakati po avo vakakwira kwoodira kumushongano wo kuha:

²¹ Ndizvo ava vakaguma kuna Firipi, uwo wayiva wo Bhetisaidha ro Garire, vakakumbira kwaari, vechiti: “Changamire, tinoda kuvona Jesu.”

²² Firipi wakaviya, akabvunja Andreu; Andreu na Firipi vakamubvunja Jesu.

²³ Na Jesu wakapingura, echiti: “Nguva yaguma kuti Mwana wo Mundhu airikijwe.

²⁴ Zvirokwazvo, zvirokwazvo, ndinoti kwomuri; kudari mbhumba yo koroni isikawi mu mavhu no kufa, inogara iri yega, asi kuti ikafa, inobereka michero jakawanda.

²⁵ Iye unoda kupona kwake, unozokurasha; asi iye unokunyenya kupona kwake mu nyika muno, unozokungwarira kupona kusikaperi.

²⁶ Kudari mundhu echindishandira ngaanditevere; no pendiri naye muranda wangu unozovapovo: Kuti mundhu echindishandira, iye unozoreremejwa ndi Baba.”

Jesu unovereketa ngo kufa kwake

²⁷ “Zvino mweya wangu unoneseka; neni ndinozoti kudini? Baba ndiponese kubva kuna nguva iyi. Asi ngo iyi ndava ndakaviira nguva iyi

²⁸ Baba kujai zina rako.” Nguva iyo rakaviya izwi rechibva mu denga rechiti: “Ndakarikuja, neni ndinozorikujazve.”

²⁹ No mbungano vayinga yakaima apo, yairizwa, yakati: “Kwatindhira.” Vamweni vakati: “Ingirosi yavereketa naye.”

³⁰ Jesu wakapingura, akati: “Iri izwi arizivi kuguma ngo ndava yangu, asi ngo ndava jenyu.

³¹ Zvino kwaguma kutongwa kwo nyika iyi; zvino muzvare wo nyika iyi unozorashwa kunja.

³² Neni kudari ndechitakuhwa panyika, ndinozokweva vese vandhu kwendiri.”

³³ Wakavereketa izvi echipangijira njira yo kufa kwaaizofa ndikwo.

³⁴ Ndizvo mbungano yakamupingura: “Takazwa mumipango kuti Kristu, unozogara mbhera narini, hino unoyita mavereketerenyi kuti Mwana wo Mundhu unodikana kuti atakuhwe? Ndiyani uwu Mwana wo Mundhu?”

³⁵ Jesu wakati kwavari: Inguva doko kujeka kuchiripo pakati penyu. Fambanyi muchino kujeka kuti chidima chisamubata: No uwo unofamba muchidima aatongozivi paanoenda.

³⁶ Muchino kujeka, tendanyi kujeka, kuti muite vana vo kujeka. Jesu wakavereketa izvi, akabva apo akajifisha kubva kwavari.

Kutama kutenda kwo vajudha

³⁷ Pikija wayinga wayita mishamiso mizhinji pamberi pavo, asi avazivi kumutenda,

³⁸ kwokuti izwi ra Isaya muprofeti rizarisike, iro rinoti: “Mambo, ndiyani wakatenda izwi redu, no mukono wa Jehovha wapangijihwa kunani?”

³⁹ Ngo ndava yo izvi inga vasina simba ro kutenda, ngokuti Isaya unotizve:

⁴⁰ Iye wakapofumaja majiso avo, wakaomesa mwoyo yavo, kuti vasazovona ngo majiso avo, vasaziva ngo mwoyo yavo, vatenderuke, ndivarape.

⁴¹ Izvi Isaya wakazvivereketa apo avona uthende hwake, akavereketa ndiye.

⁴² Asi pakati po majimambo vazhinji vakamutenda, asi ngo ndava yo vafarisi avazivi kumutenda ngo muromo, kuti vasambirimbijwa kubva mu nyumba jo kudira:

⁴³ Ngokuti vaipinda kuda kuirikijwa ngo vandhu kuno kuirikijwa ndi Mwari.

Jesu unovereketa ngo simba ra Baba wake

⁴⁴ Jesu wakadanijira, akati: “Iye unonditenda, aatendi inini akadi, asi unotenda kwaari wakandituma.

⁴⁵ No uwo unondivona, unovona uwo wakandituma.

⁴⁶ Inini ndakaviya ndiri kujeka mu nyika, kuti pikija ndiyani unotenda kwendiri aachagari muchidima.

⁴⁷ Pikija ndiyani unozwa mazwi angu, asikaatendi, andimutongi inini; ngokuti andizivi kuviya kwootonga nyika asi kooponesa nyika.

⁴⁸ Uwo unondiramba asikaashiri mazwi angu, unaye unomutonga: Izwi iro ro ndakavereketa, ndiro rinozomutonga ngo zuva rokupera.

⁴⁹ Ngokuti andizivi kujivereketera pachangu; asi Baba uwo wakandituma iye wakandipanga chondinonanga, no chondinozovereketa.

⁵⁰ Neni ndinoziva kuti mupango wake uri kupona kusikaperi: Ndizvo izvo zvondakavereketa, ndinozvivereketa kudari ngo zvondakabvunjwa ndi Baba.”