Johani 11 - NOVO TESTAMENTO EM NDAU

Kufa kwa Razaro

¹ Zvino mundhu wakatikuti waihwara, waizwi Razaro wo Bhetani guta ra Mariya na yaya wake Marita.

² Mariya wayiva uwo wakazoja Mambo ngo mafuta, akapukuta tsaka jake ngo bvuji rake, ndiye wayiva no hama yake Razaro waihwara.

³ Ndizvo hanzvaji jake jakatumira kwaari jechiti: “Mambo, vonayi, uwo wounoda ari kuhwara.”

⁴ Asi apo Jesu azwa, wakati: “Uku kuhwara akuri kwokuti afe akadi, asi kuri kwo kukurisa Mwari, kuti Mwana wa Mwari airikijwe ndikwo.”

⁵ Zvino Jesu wakamuda Marita, no munukuna wake, na Razaro.

⁶ Ndizvo apo azwa kuti waihwara, wakagara mazuva maviri pa ndau payivapo.

⁷ Ngosure kwo izvi wakati kuvajiji vake: “Ngatihwirire Judhiya.”

⁸ Vajiji vakati kwaari: “Mujijisi, vajudha vaitopshaka kukufura ngo mapuwe, wohwirireyozve here?”

⁹ Jesu wakapingura, akati: “Akuna here nguva jiri gumi na mbiri ngo zuva? Kudari mundhu echifamba masikati aakhugunywi, ngokuti unovona kujeka kwo mu nyika muno.

¹⁰ Asi kudari mundhu echifamba usiku unokhugunywa, ngokuti aana kujeka mukati mwake.”

¹¹ Wakavereketa izvi; naapo wakati kwavari: “Razaro shamwari yedu wavata; asi inini ndinoenda kuti ndimumuse.”

¹² Ndizvo vajiji vake vakati kwaari: “Mambo, kudari akavata, unozoita nane.”

¹³ Asi Jesu waivereketa ngo kufa kwake: Asi ivo vaikarakaja kuti waivereketa ngo kuzorora mukuvata.

¹⁴ Ndizvo Jesu wakati kwavari pambhene: “Razaro wafa.

¹⁵ Neni ndinodakara ngo ndava yenyu kuti inga ndisipo, kuti imwimwi mutende, asi ngatiende kwaari.”

¹⁶ Ndizvo Tomasi uwo unozwi, Munyambiri, wakati kuvajiji shamwari jake: “Nesu ngatiendevo, kuti tife naye.”

Jesu unogondisa kumuka kwo vakafa

¹⁷ Naapo Jesu aguma wakavona kuti zvino inga aano mazuva marongomuna ari mu guva.

¹⁸ Zvino Bhetani rayiva phedo po Jerusarema, kwaida kuyita makiromitha matatu:

¹⁹ No vazhinji vo vajudha inga vaguma kuna Marita na Mariya, kuti vavaembezere ngo ndava yo hama yavo.

²⁰ Ndizvo Marita, apo azwa kuti Jesu ari kuviya, wakaenda kwooshongana naye: Asi Mariya wakasara akagara mu nyumba.

²¹ Ndizvo Marita wakati kuna Jesu: “Mambo, kudari wayinga uri pano, hama yangu inga isikazivi kufa.

²² Nazvino ndinoziva kuti icho chounozokumbira kuna Mwari, Mwari unozokupa.”

²³ Jesu wakati kwaari: “Mukoma wako unozomukazve.”

²⁴ Marita wakati kwaari: “Ndinoziva kuti unozomuka mukumuka kwo zuva ro kupera.”

²⁵ Jesu wakati kwaari: “Inini ndiri kumuka no kupona; iye unonditenda pikija afa, unozoponazve.

²⁶ No uwo unorarama, echinditenda aatongozofi mbhera narini. Unotenda ichi here?”

²⁷ Wakati kwaari: “Eya Mambo; inini ndakatenda kuti iwewe uri Kristu, Mwana wa Mwari, uwo unoviya mu nyika.”

Jesu unochema Razaro

²⁸ Wavereketa izvi wakaenda, akadanija munukuna wake ngo kufishika, akati: “Mujijisi waapano, unokudanija.”

²⁹ Naye azwa, wakakasira kumuka akaenda kwaari.

³⁰ Zvino Jesu wayinga asati waguma ku guta, asi wayiva achiri apo paakasongana na Marita.

³¹ Ndizvo vajudha avo vayiva naye mu nyumba vachimuembezera, vavona kuti Mariya wamuka ngo kukasira akabuda, vakamutevera, vechikarakaja kuti unoenda kuiba kwoochemapo.

³² Apo Mariya aguma payiva na Jesu, amuvona wakawa pasi patshoka jake, akati kwaari: “Mambo, kudari wayinga pano, hama yangu inga isikazivi kufa.”

³³ Ndizvo Jesu amuvona echichema, no vajudha vechichema, avo vakaviya naye, wakayita mahwema mumweya mwake, wakatambujika.

³⁴ Wakati: “Mwakamurajika kwapi?” Vakati kwaari: “Mambo, viya, uvone.”

³⁵ Jesu wakachema musoji.

³⁶ Ndizvo vajudha vakati: “Ringiranyi, kumudisisa kwake!”

³⁷ Asi vamweni vavo vakati: “Uwu mundhu wakapembenuja majiso owayiva ari bofu, inga asina simba here rokuita kuti mundhu uwu asafa?”

Jesu unomusa Razaro

³⁸ Ndizvo Jesu echichemazve mukati mwake wakaguma ku guva: Rayiva bako, no buwe inga rakaridumaija.

³⁹ Jesu wakati: “Bvisanyi buwe.” Marita hanzvaji yo uwo wakafa wakati kwaari: “Mambo, zvino wotonuha, ngokuti waano mazuva marongomuna afa.”

⁴⁰ Jesu wakati kwaari: “Andizivi kukubvunja here, kuti, kudari wechitenda, ungazovona uthende hwa Mwari?”

⁴¹ Ndizvo vakabvisa buwe. Na Jesu wakamiruja majiso ake mu denga, akati: “Baba, ndinokutenda ngokuti wandizwa.

⁴² Neni ndinoziva kuti unondizwa ngo nguva jese: Asi ngo ndava yo mbungano yakayima phedo ndavereketa kudaro, kuti itende kuti ndiwe wakandituma.”

⁴³ Naapo avereketa izvi wakadanijira ngo izwi guru: “Razaro, buda.”

⁴⁴ Uwo wayinga akafa wakabuda, akasungwa tshoka no nyara ngo machira okuvigwa nao, no hope yake yakasungwa nayo ngo jira doko. Jesu wakati kwavari: “Musunungurenyi, mumuregere aende.”

Kumukira Jesu

⁴⁵ Ndizvo vazhinji vo vajudha avo vakaviya kuna Mariya, vechivona izvo zvaakaita, vakamutenda:

⁴⁶ Asi vamweni vavo vakaenda ku vafarisi, vakavabvunja zvaayinga ayita Jesu.

⁴⁷ Ndizvo vapristi vakuru no vafarisi vakaungana pamwepo kuyita bangano, vakati: “Tinozoitenyi? Ngokuti mundhu uwu unoyita mishamiso yakawanda.

⁴⁸ Kudari techimuregera vandhu vese vanozotenda kwaari, no vaRoma vanozoviya vatibvukire zvese ndau yedu no jinja redu.”

⁴⁹ Asi umwe wavo Khaifasi, ari mupristi mukuru ngo gorero, wakati kwavari: “Amuzivi chiro nachimwe.

⁵⁰ Nokuti kukarakaja kuti kunosisira kuti mundhu umwe afe ngo ndava yo vandhu, kwokuti jinja rese risapera.”

⁵¹ Asi izvi aazivi kujivereketera, asi ngokuti wayiva ari mupristi mukuru ngo gorero, wakaprofeta kuti Jesu unozofira jinjero.

⁵² Asi haiwa kufira jinjero kwega, asi kuti aunganijevo pamwepo vana va Mwari avo vakaparajika ku nyika yese, kuti vayite umwe.

⁵³ Ndizvo kubvira ngo zuva iro vakayita bangano pamwepo rokuti vamuuraye.

⁵⁴ Ndizvo Jesu aazivi kuchafambazve pambhene pakati po vajudha, asi kubva apo wakaenda ku nyika iri phedo no bani, ku dhoropa rinozwi Efraimu, naapo wakagara no vajiji vake.

⁵⁵ No Phasika ro vajudha rayiva phedo, vazhinji vakakwira Jerusarema, vechibva mundharaunda, Phasika risati raguma, kwokuti vajichenese.

⁵⁶ Ndizvo vakamupshaka Jesu, vechibvunjisa vakayima mu themperi, vechiti: “Munoti kudini? Kuti aazoviyi here kumushongano wo kuha?”

⁵⁷ Ndizvo vapristi vakuru no vafarisi vayinga vakayita mupango kuti pikija ndiyani unoziva paari, ngaanange kuti vamubate.