Johani 10 - NOVO TESTAMENTO EM NDAU

Mabvuta anoziva muhavisi

¹ “Zvirokwazvo, zvirokwazvo, ndinoti kwomuri: Uwo usikapindi ngo pamusuvo muphandu ro mabvuta, asi echikwira ngo imweni njira, iye uri mbavha no jongoni.

² Asi uwo unopinda ngo pamusuvo ndiye uri muhavisi wo mabvuta.

³ Kwaari murindi unomubewurira, no mabvuta anozwa izwi rake, unodanija mabvuta ngo mazina ao, aabudise.

⁴ Naapo aabudisa ake, unoatungamirira, no mabvuta anomutevera, ngokuti anoriziva izwi rake:

⁵ Asi aazoteveri mupara, asi anozomutiza, ngokuti aazivi izwi ro mupara.”

⁶ Jesu wakavereketa muezaniso uwu kwavari; asi avazivi kuzwisisa izvo zvaakavereketa kwavari.

Jesu muhavisi wakanaka

⁷ Ndizvo wakavereketazve kwavari: “Zvirokwazvo, zvirokwazvo, ndinoti kwomuri; Inini ndiri musuvo wo mabvuta.

⁸ Vese vakatanga pamberi pangu vari mbavha no majongoni: Asi mabvuta aazivi kuvazwa.

⁹ Inini ndiri musuvo: Pikija ndiyani unopinda ndini unozoponeswa unozonghwina, unozobuda, awane kuha.

¹⁰ Mbavha inoviya kwega kuba, no kuuraya, no kuparaja: Inini ndakaviya kuti vawane kupona, vakuwane kakurutu.

¹¹ Inini ndiri muhavisi wakanaka; muhavisi wakanaka unodira pasi kupona kwake ngo ndava yo mabvuta.

¹² Asi iye unoshanda kuti awane muthuso, asipi muhavisi akadi, uwo mabvuta asipi ake akadi, unovona thika rechiviya, unoasiya mabvuta, unotiza, no thika rinoabvuka no kuaparaja.

¹³ Unotiza ngokuti uri unoshandira muthuso, aana ndava no mabvuta.

¹⁴ Inini ndiri muhavisi wakanaka, neni ndinoaziva angu, no anguvo anondiziva,

¹⁵ kudari ngo zvaanondiziva Baba, zvakadaro nenivo ndinovaziva Baba, neni ndinodira pasi kupona kwangu ngo ndava yo mabvuta.

¹⁶ Ndinao amweni mabvuta, asiri o iri phandu, naozve kunosisira kuti ndiazise, nao anozozwa izwi rangu, nao anozoita phandu rimwero ro muhavisi umwewo.

¹⁷ Ngo iyi ndava Baba vanondiziva, ngokuti ndinodira pasi kupona kwangu, kuti ndikutorezve.

¹⁸ Apana mundhu unokutora kubva kwendiri, asi ndinokudira pasi ngo kwangu. Ndino simba ro kukudira pasi, ndino simba ro kukutorazve. Uwu mupango ndakaupuwa ndi Baba wangu.”

¹⁹ Kwayivapo kuparajana pakati po vajudha ngo ndava yo mazwi aya.

²⁰ No vazhinji vavo vakati: “Uno bzoka, unopenga; munomupurukirirenyi?”

²¹ Vamweni vakati: “Aya mazwi andiopi anovereketwa ngo unofukwa ngo bzoka: bzoka ringapembenuja majiso obofu here?”

Vajudha avatendi Jesu

²² Ngo uwo mukuvo kwayivapo mushongano wo kupira themperi mu Jerusarema, kwayiva chipepo.

²³ Na Jesu wakafamba mu themperi, mu berere ra Saromona.

²⁴ Ndizvo vajudha vakamuunganira, vakati kwaari: “Unotiyita gariremwo mbhera rini? Kuti uri Kristu, tibvunje pambhene.”

²⁵ Jesu wakavapingura: “Ndakamubvunja, nemwi amutendi: Mishando yo ndinoita ngo zina ra Baba wangu, inopupura ndini.

²⁶ Kani, imwimwi amutendi ngokuti amuri vo mabvuta angu akadi.

²⁷ Mabvuta angu anozwa izwi rangu, neni ndinoaziva, nao anonditevera.

²⁸ Ndinoapa kupona kusikaperi, nao aazofi narini, zve akuna unoabvuka kubva munyara yangu.

²⁹ Baba wangu uwo wakandipa awo, uri mukuru kwavari vese, apana naumwe uno simba rokuabvuka kubva munyara ya Baba wangu.

³⁰ Inini na Baba tiri umwe.”

³¹ Vajudha vakabojerazve mapuwe kuti vamufure.

³² Jesu wakavapingura: “Ndakamuvonisa mishando mizhinji yakanaka inobva kuna Baba; ngo wapi kwo iyo mishando, womunondifura ngo mapuwe?”

³³ Vajudha vakapingura: “Atikufuri ngo ndava yo mushando wakanaka, asi ngo ndava yo kutuka, na ngokuti iwewe uri mundhu unojiyita Mwari.”

³⁴ Jesu wakavapingura: “Akuzivi kutahwa here mumipango yenyu kuti: Ndakati muri zvimwari?

³⁵ Kudari akavadanija kuti zvimwari, avo kwarakaguma izwi ra Mwari, (no matahwa aangadarikwi),

³⁶ munovereketa ngenyi ndiye, uwo waakaemesa Baba no kumutuma mu nyika, kuti: Unotuka Mwari, ngokuti ndakananga kuti: Inini ndiri Mwana wa Mwari?

³⁷ Kudari ndisikaiti mishando ya Baba wangu, musanditenda:

³⁸ Asi kuti ndechiyita, pikija musikatendi kwendiri, tendanyi mishando yendinoita, kuti muzive muzwisise kuti Baba vari mukati mwangu, neni ndiri mukati mwa Baba.”

³⁹ Ndizvo vakapshakazve kumubata: Asi iye wakapokonyoka kubva munyara javo.

⁴⁰ Naye wakaendazve mwombera mwo Jordhani ku ndau iyo yaakabhapatisa Johani kutanga; wakagara apo.

⁴¹ No vazhinji vakaviya kwaari vakati: “Johani aazivi kuyita mishamiso, asi zvese zvaakavereketa Johani ngo ndava yo uwu zviri gwinyiso.”

⁴² Vazhinji vakamutenda apo.