Johani 1 - NOVO TESTAMENTO EM NDAU

Kristu, Izwi ra Mwari

¹ Pakutanga wayivapo Izwi, no Izwi wayiva na Mwari, no Izwi wayiva Mwari.

² Uwu wayivapo pakutanga na Mwari.

³ Zviro zvese zvakasikwa ndiye; na ngo kunja kwake inga pasina chiro chakasikwa kwo izvo zvakasikwa.

⁴ Kwayivapo kupona kwaari, no kupona kwayiva kujeka kwo vandhu.

⁵ No kujeka kunojeka muchidima; no chidima achizivi kukunyisa.

⁶ Kwakaviya mundhu, wakatumwa ndi Mwari, zina rake rayiva Johani.

⁷ Uwo wakaviya kuyita chapupu, kuti apupure ngo kujeka, kuti vandhu vese vatende ndiye.

⁸ Iye wayinga asiriye kujeka ukwo akadi, asi wakatumwa kuti apupure ngo kujeka ukwo.

⁹ Kujeka ukwo kwayiva kujeka kwo chokwadi, ukwo kunojekisa vandhu vese vanobahwa mu nyika.

¹⁰ Uwu wayiva mu nyika, no nyika yakasikwa ndiye, no nyika aizivi kumuziva.

¹¹ Wakaviya kwo zvake, no vake avazivi kumuashira.

¹² Asi kwavari vese vakamuashira, wakavapa simba rokuti vayite vana va Mwari, kwavari avo vanotenda zina rake:

¹³ Avo vasikazivi kubahwa ngo ngazi, pikija ngo kuemura kwo nyama, pikija ngo kuemura kwo mundhu asi wakabahwa ndi Mwari.

¹⁴ No izwi rakaitwa muviri, wakagara pakati pedu, nesu takaringira uthende hwake, uthende huri hwo uwo wakabahwa ega ndi Baba, wakazara ngo nyasha no gwinyiso.

¹⁵ Johani wakayita chapupu ndiye, wakadanijira, echiti: “Uwu ndiye wo ndakavereketa ndiye, kuti: Uwo unoviya sure kwangu, waindovapo pa mberi pangu, ngokuti waindovapo ndisati ndavepo.

¹⁶ Ngokuti, isisu tese takaashira kwo zvakawanda zvake, no nyasha ngo nyasha.

¹⁷ Ngokuti mipango yakapuwa kubudikija ndi Mosi, asi nyasha no gwinyiso zvakavapo ndiye Jesu Kristu.

¹⁸ Akuna naumwe wakambovona Mwari; Mwana ega, uwo wakabahwa ega, iye unogara paditi pa Baba, ndiye wakamupangijira.”

Chapupu cha Johani mubhapatisi

¹⁹ No ichi ndicho chapupu cha Johani, apo vajudha vakatuma kwaari vapristi no vaRevhi kubva Jerusarema, kumubvunjisa kuti: Uriyani iwewe?

²⁰ Naye wakatenda, aazivi kukanija; wakatenda, echiti: Inini andiripi Kristu akadi.

²¹ Navo vakamubvunjisa: Ndizvo uriyani? Uri Erija here? Naye wakapingura: “Andiripi iye akadi. Uri uwo muprofeti here?” Naye wakapingura: “Haiwa.”

²² Ndizvo vakati kwaari: “Uriyani? Kuti tiwane chokupingura avo vakatituma. Unoti kudini iwewe pachako?”

²³ Wakati: “Ndiri izwi rounodanijira mubani, kuti: Rungamisanyi njira ya Mambo, kudari ngo zvaakavereketa Isaya muprofeti.”

²⁴ Naavo vakatumwa vayiva vo vafarisi.

²⁵ Navo vakamubvunjisa, vakati kwaari: “Ndizvo unobhapatisirenyi kudari usiri iye Kristu, nokuti Erija, nokuti uwo muprofeti?”

²⁶ Johani wakavapingura echiti: “Inini ndinobhapatisa ngo kumwa; asi pakati penyu panoyima uwo womusikazivi,

²⁷ ndiye uwo unoviya sure kwangu, wakasanwa, uwo wendisikasisiri inini kuti ndisunungure rusinga rwo magwada ake.”

²⁸ Izvi zvakaitika mu Bhetani mwombera kwo Jordhani, apo paaibhapatisa Johani.

Johani unotatija Jesu ku mbungano

²⁹ No zuva rinotevera avona Jesu echiviya kwaari, wakati: “Ringiranyi Chibvuta cha Mwari chinobvisa kushaisha kwo nyika!

³⁰ Uwu ndiye wo ndakavereketa ndiye, kuti: Sure kwangu kunozoviya mundhu uwo uri mukuru kupinda inini, ngokuti wayivapo ndisati ndavepo.

³¹ Neni inga ndisikamuzivi, asi kwega kuti unozopangijihwa ku vaIsraeri, saka ngo ndava iyi ndakaviya ndechibhapatisa ngo kumwa.”

³² Na Johani wakayita chapupu, echiti: “Ndakavona Mweya uchibzuka kubva mu denga wakadari ngo njiva, ukagara panyezuru pake.

³³ Neni inga ndisikamuzivi; asi iye wakandituma kuti ndibhapatise ngo kumwa, iye wakati kwendiri, uwo wounozovona Mweya uchibzuka no kugara panyezuru pake, uwo ndiye unozobhapatisa ndi Mweya Wakachena.

³⁴ Neni ndakovona, ndakapupura kuti uwu ndiye Mwana wa Mwari.”

Vajiji vokutanga va Jesu

³⁵ No zuva rinotevera Johani ayinga wakayima no vaviri vo vajiji vake.

³⁶ Naapo amuvona Jesu echifamba, wakati: “Ringiranyi Chibvuta cha Mwari!”

³⁷ Vajiji avo vaviri vakamuzwa echivereketa, vakamutevera Jesu.

³⁸ Jesu wakakunukuka akavavona vechimutevera, akati kwavari: “Munopshakenyi?” Vakati kwaari: “Rabhi (ukwo kunoti ngo kukumuchwa, Mujijisi) unogara kwapi?”

³⁹ Wakati kwavari: “Viyanyi muvone.” Ndizvo vakaviya vakavona apo paaigara; navo vakagara naye ngo zuva iro: Ngokuti yaida kuyita nguva yo chigumi.

⁴⁰ Umwe wo vaviri avo vakamuzwa Johani echivereketa, womutevera, wayiva Andreu munukuna wa Simoni Pedru.

⁴¹ Iye wakatanga kupshaka hama wake Simoni, akati kwaari: “Tamuvona Mesiya” (ukwo kunoti ngo kukumuchwa, Kristu).

⁴² Naye wakamuzisa kuna Jesu. Naapo Jesu amuringira wakati: “Iwewe uri Simoni mwana wa Jona; unozodanijwa kuti Khefasi” (ukwo kunoti ngo kukumuchwa, Pedru).

Jesu unodanija Firipi na Natanaeri

⁴³ No zuva raitevera wakada kuenda Garire, akavona Firipi; na Jesu wakati kwaari: “Nditevere.”

⁴⁴ Zvino Firipi waibva, dhoropa ro vayigara Andreu na Pedru.

⁴⁵ Firipi wakapshaka Natanaeri, akati kwaari: “Tamuvona uwo waakatara ndiye Mosi mu mipango no vaprofeti, Jesu wo Nazaretha, mwana wa Josefa.”

⁴⁶ Natanaeri wakati kwaari: “Kungabvavo here chiro chakanaka mu Nazaretha?” Firipi wakati kwaari: “Viya, uvone.”

⁴⁷ Jesu wakavona Natanaeri echiviya kwaari, akati ndiye: “Ringirai mu Israeri uwo ngo gwinyiso usina kuchengeja mukati mwake!”

⁴⁸ Natanaeri wakati kwaari: “Wandiita mazivirenyi?” Jesu wakapingura, akati kwaari: “Ngo pamberi Firipi asati akudanija uri pasi po mukuyu, ndakakuvona.”

⁴⁹ Natanaeri wakapingura, akati: “Rabhi, Iwewe uri Mwana wa Mwari, uri Mambo wo Israeri.”

⁵⁰ Jesu wakapingura, akati kwaari: “Ngokuti ndati kwouri, kuti: Ndakakuvona uri pasi po mukuyu, unotenda here? Unozovona zviro zvikuru kupinda izvi.”

⁵¹ Wakati kwaari: “Zvirokwazvo, zvirokwazvo, ndinoti kwouri, Munozovona denga rakabewuka, no ngirosi ja Mwari jechikwira no kubzuka panyezuru po Mwana wo Mundhu.”