Jakobe 5 - NOVO TESTAMENTO EM NDAU

Chiziviso ku maguruja

¹ Viyanyi zvino imwimwi maguruja, mucheme, no kurija mbhere ngo matambujiko anozoviya panyezuru penyu.

² Upfumi hwenyu hwakavora, no zvokufuka zvenyu zvahiwa ngo honye.

³ Mukore yenyu no sirivha yenyu zvaano furuju; no furuju yazvo inozoita chapupu cho kumuitira ndava, nayo inozoha nyama yenyu kudari ngo muriro. Mwakaunganijira upfumi hwenyu mu mazuva okugumisira.

⁴ Vonanyi musharo wo vashandi avo vakacheka minda yenyu, wakapunyihwa ndimwi ngo kuchengejera, unodanijira: No kudanijira kwaavo vakacheka kwakazwika munjeve ja Mambo wo Hondo.

⁵ Mwakararama mukushadaya, mwakayita zvidakajiso zvenyu; mwakakonja mwoyo yenyu ngo zuva ro kuuraya.

⁶ Mwakamurasha no kumuuraya uwo wakarurama; naye aazivi kurwa nemwi.

Mukumbiro no kusengerera

⁷ Ndizvo, sengereranyi hama mbhera kuviya kwa Mambo. Vonanyi murimi unogarira michero ino mutengo mukuru yo nyika, echiisengerera, mbhera iyashire mvura yo kuamba no yo kugumisira.

⁸ Nemwi itanyi vanosengerera kudaro; gwinyisanyi mwoyo yenyu: Ngokuti kuviya kwa Mambo kwaaphedo.

⁹ Hama, musan'un'utirana, umwe kuno umweni, kuti musazotongwa; ringiranyi mutongi unoyima pamusuvo.

¹⁰ Hama, mukutambujika no kusengerera ashiranyi kuyita chivonero vaprofeti vakavereketa ngo zina ra Mambo.

¹¹ Vonanyi, tinoti vanomuchena vakashingirira. Mwakazwa ngo kusengerera kwa Jobe, mwakavona kupejisira kwa Mambo, kuti Mambo wakazara ngo kukungurira no nyasha.

¹² Asi kupinda zvese, hama jangu, musazopika ngo mugore, pikija ngo nyika, nokuti ngo kupika kumweni: Asi itanyi kuti eya wenyu aite, eya, no haiwa wenyu aite, haiwa; kuti musapinda mukutongwa.

¹³ Uripo here pakati penyu unotambujika, ngaakumbire. Uripo here pakati penyu unodakara? Ngaaimbe nduyo.

¹⁴ Uripo here pakati penyu unohwara? Ngaadanije vakuru vo chiara; ngavamukumbirire, vechimuzoja ngo mafuta ngo zina ra Mambo:

¹⁵ No mukumbiro wo kugonda unozoponesa unohwara, na Mambo unozomumusa; nokudari akaita zvishaishi, zvinozoregerehwa kwaari.

¹⁶ Ndizvo tendanyi zvishaishi zvenyu umwe kuno umweni, mukumbirirane, kuti mutambiswe. Kupota kwo mundhu wakarurama kuno simba guru mukushanda kwakwo.

¹⁷ Erija wayiva mundhu ngo chibarihwe wayinga akadari ndisu, naye wakakumbira kakurutu kuti isazona, akuzivi kuna makore matatu no mweji mitandhatu.

¹⁸ Wakakumbirazve, no denga rakanisa mvura, no nyika yakabereka michero yayo.

¹⁹ Hama jangu, kudari uripo pakati penyu unopauka kubva kugwinyiso, no umwe echimutenderuja,

²⁰ ngaazive, kuti iye unotenderuja mushaishi kubva mukupauka kwo njira yake, unozoponesa mweya kubva mukufa, unozofukija zvishaishi zvakawanda.