Jakobe 3 - NOVO TESTAMENTO EM NDAU

Jibatenyi mukuvereketa kwenyu

¹ Hama jangu musayita vajijisi vazhinji, mwechiziva kuti tinozoashira kutongwa kwakapinda kurema.

² Ngokuti ngo zviro zvakawanda isisu tese tinokhugunya. Kudari aripo usikakhugunyi ngo izwi, ndiye uri mundhu wakaperera, uno simbazve ro kubata muviri wese nawo.

³ Zvino kudari techidira mikhayo yo mahachi mumiromo yao, kuti atipurutane, tinotenderuja muviri wao wese.

⁴ Vonanyizve ngarava, pikija jakakurisa kudini, jinotindhwa ngo dutu rino simba, kani jinotenderujwa ngo chikombe apo paanoda muhluzi kuti aende.

⁵ Ngokudarozve rurimi ruri ndhengo dodoko, asi rinoganza zvakakura, vonanyi kukura kwakaita gwasha rinobaswa ngo muriro wakadodoka.

⁶ No rurimi ruri muriro, rwakadari ngo nyika yakazara ngo kushata pakati po ndhengo jedu, runosvipisa muviri wese, rinopisa njira yese yo kupona. Narwo rinobasihwa ngo muriro wo Gehena.

⁷ Ngokuti mbewu jese jo zvikara no jo shiri, no jo zvinogwezva, no zviri mujombe, zvinopeteka, nazvo zvakapetwa ngo vandhu.

⁸ Asi rurimi apana mundhu ungarupeta, ruri chiro chakashata chisikazorori, chakazara ngo mbanda inouraya.

⁹ Ndirwo tinobonga Mambo Baba, ndirwozve tinotuka vandhu, vakasikwa ngo mutojaniso wa Mwari.

¹⁰ Kunobuda kumuromo umwe kubonga no kutuka. Hama jangu, akusisiri kuti izvi zviitike kudaro.

¹¹ Mwimbo unobudisa ngo mushowera umwewo here kumwa yakanaka no inovava?

¹² Hama jangu, mukuyu ungabereka here maorivhe, nokuti muvhini ungabereka here makuyu? Zve, kumwa inojumunya ayingakoni kubudisa inonaka.

Ungwaru hwo gwinyiso

¹³ Ndiyani wakangwara pakati penyu no unoziva? Ngaavonise ngo kupona kwake kwakanaka mishando yake mukupfava kwo ungwaru.

¹⁴ Asi kudari muno ndurumwa inovava no hasha mumwoyo mwenyu, musaganza, musanyepera gwinyiso.

¹⁵ Ungwaru hwakadaro andihwopi hunobva mugore, asi ngo hwo mu nyika, hwo mumuviri, ngo hwo mabzoka.

¹⁶ Ngokuti apo pano ndurumwa no hasha, paripozve kukangaijwa no zviito zvese zvakashata.

¹⁷ Asi ungwaru uhwo unobva mugore kutanga huri hwakachena, zve, unonyararisa, hwakapfava, hunoreruka kupotwa, hwakazara ngo nyasha no michero yakanaka, husina mukheto, husina kujiitisa.

¹⁸ No michero yo kururama inokushwa mukunyarara ngaavo vanoyita kunyarara.