Jakobe 2 - NOVO TESTAMENTO EM NDAU

Kuziviswa ngo ndava yo mutsananguro

¹ Hama jangu, kugonda kuna Mambo wedu Jesu Kristu, Mambo wo uthende, kusazova no mutsananguro ku vandhu.

² Ngokuti kudari kwechinghwina mu nyumba yenyu yo kudira mundhu uno ndandazi yo mukore, akasimira zvakanaka, echinghwinavo mundhu murombo uno zvokusimira zvino svina;

³ nemwi munoreremeja uwo unosimira nguvo jakanaka, mwechiti: “Gara pano pandau yakanaka!” Mwechiti kumurombo: “Ima apo, nokuti gara pasi pachitambarariro cho tsoka jangu.”

⁴ Ngokuita kudaro amuiti vatsananguri here no vatongi vo mipinimijo yakashata?

⁵ Purukiranyi hama jangu jinodikana, Mwari aazivi kutsanangura here varombo ngo zvo munyika kuti vayite maguruja okugonda, no vanogara ndhaka yo umambo uhwo hwaakagondisa kwavari vanomuda?

⁶ Asi imwimwi mwakashora murombo. Maguruja aamutambuji here, echimukweva kuenda pazvigaro zvo kutongwa?

⁷ Aatuki here zina rinoreremejeka ro munodanijwa ndiro?

⁸ Asi kudari mwechizarisa mupango wo umambo kudari ngo zvakatahwa kuti: “Unozomuda muvakihwana wako kudari ngo kujida kwako iwewe.” Munonasa.

⁹ Asi kudari mwechiita vanomutsananguro ku vandhu, munoshaisha, mwechipuwa ndava ngo mupango kuti muri vapauki.

¹⁰ Ngokuti pikija ndiyani unozongwarira mipango yese, asi echikhugunya ngo chiro chimwe, iye unoyita uno ndava yazvo zvese.

¹¹ Ngokuti uwo wakati: “Usazoomba.” Wakatizve: “Usazouraya.” Zvino kudari usikaombi, asi wechiuraya, wakayita mupauki kumipango.

¹² Mwechivereketa no kuyita kudari ngo vanotongwa ngo mupango wo kusununguka.

¹³ Ngokuti kutonga akuzovi no nyasha kwaari usikazivi kupangijira nyasha: Nyasha jinojiganzisa pamberi po kutonga.

Kugonda no mishando

¹⁴ Kunobeserenyi, hama jangu, kudari mundhu echinanga kuti uno kugonda, asi asina mishando? Kugonda ukwo kungamuponesa here?

¹⁵ Kudari hama nokuti hanzvaji ari mutitinini, echitama zvokuha zvo zuva ngo zuva,

¹⁶ no umwe wenyu echiti kwaari: “Endai mukunyarara, mwechiita vanojiihwa, no kugutiswa; asi musikavapi zvinotamika kumuviri; kunobeserenyi?”

¹⁷ Ngokudaro kugonda, kudari kusina mishando kwakafa, kuri kwega.

¹⁸ Asi mundhu unozoti: “Iwewe uno kugonda, inini ndino mishando; ndipangijire kugonda kwako kusina mishando yako, neni ndinozokupangijira kugonda kwangu ngo mishando yangu.”

¹⁹ Unotenda iwewe kuti Mwari ndiumwe; unonasa: Mabzoka anotendavo, no kuhuta.

²⁰ Asi iwewe benji unoda kuziva here, kuti kugonda kusina mishando kuri kusina shwiro?

²¹ Abrahama baba wedu, aazivi kupembejwa here ngo mishando, ngo kupira Isaka mwana wake kuyita mudiro paaltari?

²² Unovona kuti kugonda kwakashanda pamwepo no mishando yake, no kugonda kwake kwakapereriswa ngo mishando;

²³ no matahwa akazarisika anoti: “Abrahama wakagonda Mwari, nakwo kwakaverengehwa kwaari kuti kuri kururama; naye wakadanijwa kuti uri shamwari ya Mwari.”

²⁴ Munovona kuti mundhu unopembejwa ngo mishando, andikwopi ngo kugonda kwega.

²⁵ Ngokudaro Rahabhi chipfebi aazivi kupembejwa here ngo mishando, ngo kuashira vatumwa, no kuvatizisa ngo njira imweni?

²⁶ Ngokuti kudari ngo muviri usina mweya wakafa, ngokudaro kugonda kusina mishando kwakafavo.