Jakobe 1 - NOVO TESTAMENTO EM NDAU

Muchungamijo

¹ Jakobe, muranda wa Mwari no wa Mambo wedu Jesu Kristu, kuno majinja ari gumi na maviri evakaparajika: Ndinomuchungamija.

Kugonda no uzivi

² Hama jangu, verenganyi kuti kuri kudakara kukuru, apo mwogumihwa ngo zviejo zvizhinji;

³ mwechiziva kuti kuejwa kwo kugonda kwenyu kunobara kusengerera.

⁴ Asi kusengerera ngakuve no mushando wakwo wakaperera kuti muite vakaperera mururame, musikatami chiro.

⁵ Asi kudari aripo umwe wenyu unotama kungwara, ngaakumbire kuna Mwari, unopa kuna vandhu vese ngo kuwanjisa, asikakaraiji; kunozopuwa kwaari.

⁶ Asi ngaakumbire ngo kugonda, asina chaanogononda. Ngokuti uwo unogononda wakadari ngo vimbi ro jombe rinotindhwa ngo dutu no kukandihwa.

⁷ Uwo mundhu achagarira kuti unozoashira chiro kuna Mambo,

⁸ mundhu unomipinimijo miviri unotsanduka-tsanduka mu njira jake jese.

Varombo no vapfumi

⁹ Asi hama iri pasi ngaidakare ngo kukujwa kwayo;

¹⁰ asi guruja ngaridakare ngo kupfaviswa kwaro. Ngokuti rinozopinda kudari ngo ruva ro mushango.

¹¹ Ngokuti zuva rinobuda pamwepo no dutu, zvinoomesa mwenje; no ruva rawo rinowa pasi, no unaku hwaro hunopera: Ngokudarozve guruja rinozongarangara mu njira jaro.

Kushingirira mukuejwa

¹² Unomuchena mundhuwo unoshingirira mukuejwa. Ngokuti apo aejwa, unozoashira junguja ro kupona, rakagondiswa kwavari vanomuda.

¹³ Mundhu apo aejwa usananga kuti ndinoejwa ndi Mwari: Ngokuti Mwari aaejwi ngo zvakashata, zve, aaeji mundhu pikija wakadini.

¹⁴ Asi mundhu wese unoejwa apo ookweviwa ngo kuemura kwake, no kunyengerehwa.

¹⁵ Ndizvo apo kuemura kwamita, kunobara kushaisha no kushaisha apo kwakura, kunobara rufu.

¹⁶ Musachengejehwa, hama jangu jinodikana.

¹⁷ Zvipuwo zvese zvakanaka, no zvipo zvese zvakaperera zvinobva mugore, zvechibzuka kubva kuna Baba wo kujeka, kwaari akuna kutsanduka, nokuti bvuri ro kukunukuka.

¹⁸ Ngokuda kwake iye wakatibara ngo izwi ro gwinyiso, kuti, tiite inga tiri michero yokutanga yo zvakasikwa zvake.

Kuzwa no kuyita izwi ra Mwari

¹⁹ Munoziva izvi hama jangu, jinodikana, asi mundhu wese ngaakasire kuzwa, anonoke kuvereketa, anonoke kuyita ushungu.

²⁰ Ngokuti ushungu hwo mundhu aushandi kururama kwa Mwari.

²¹ Ndizvo mwechirasha svina yese no kushata kwakawanda, muashire ngo kupfava izwi rakasimwa, rino simba ro kuponesa mweya yenyu.

²² Asi itanyi vaiti vo izwi, musiri vanozwa kwega, mwechijichengeja.

²³ Kudari mundhu ari muzwi wo izwi, asiri muiti waro, uri wakadari ngo mundhu unoringira hope yake yechibarihwe muchibuko.

²⁴ Ngokuti unojivona, orooenda, paripo unokanganwa chiemo chaanacho kuti chakaitawani.

²⁵ Asi iye unoringira mumupango wakaperera wo kusununguka, achindovangirira kudaro, asikaiti unozwa achikanganwa, asi muiti wo mushando, mundhu uwu unozodakajiswa muzviito zvake.

²⁶ Kudari aripo mundhu unorangarija kuti ari unodira, kuti asikabati rurimi rwake, asi unochengejera mwoyo wake, kudira kwo mundhuwo akuna shwiro.

²⁷ Kutenda kwakachena no kusikazivi kusvipiswa pamberi pa Mwari wedu na Baba ndikwo uku, kufambira vasina baba no shirikaji mukutambujika kwavo, no kujingwarira kuti asasvipiswa ngo zvonyika.