Firimoni 1 - NOVO TESTAMENTO EM NDAU

Muchungamijo

¹ Pauri, musungwa wa Kristu Jesu, na Timoti munukuna wedu kuna Firimoni mudikani no unoshanda pamwepo nesu,

² no kuna Apfiya hanzvaji yedu, na Akipo uri socha pamwepo nesu, no ku chiara chiri mu nyumba yako.

³ Nyasha no kunyarara ngazvive kwouri zvinobva kuna Mwari Baba wedu, no kuna Mambo Jesu Kristu.

Rudo no kugonda kwa Firimoni

⁴ Ndinobonga Mwari wangu ngo nguva jese, ndechikucherecheja mumikumbiro yangu,

⁵ ndechizwa ngo rudo rwako no kugonda kwounakwo kuna Mambo Jesu, no kwavari vese vakacheneswa.

⁶ Kuti kukovera kwo kugonda kwako kushande mukuziva zvese zvakanaka zviri mukati mwedu kuna Kristu.

⁷ Ngokuti ndinodakara kakurutu no kuembezehwa murudo rwako, ngokuti mwoyo yo vakacheneswa yakagwinyiswa ndiwe, hama.

Kukumbira ngo ndava ya Onesimo

⁸ Ndizvo pikija ndino kushinga kwese kuna Kristu kuti ndikupange icho chinosisira,

⁹ asi ngo ndava yo rudo ndinokupota, inini Pauri musharuka, nazvino ndiri musungwazve wa Kristu Jesu;

¹⁰ ndinopota kwouri ngo ndava yo mwana wangu Onesimo, wondakabara mukusungwa kwangu,

¹¹ uwokaretu inga asikabetseri kwouri, asi zvino unobesera iwewe na inini.

¹² Ndinomutumira kwouri iye wambwine, ukwo kunoti, uri mwoyo wangu aembho.

¹³ Wendaida kuti agare neni, kuti andishandire pandau pako mukusungwa ngo ndava yo vhangeri.

¹⁴ Asi ndayinga ndisikadi kuyita chiro ngo kunja kwo kutendera kwako; kuti kunaka kwako kusazoita kwo kuvangijihwa, asi ngokuda kwako.

¹⁵ Ngokuti pamweni wakaparajaniswa newe nguva doko, kuti ungava naye mbhera narini.

¹⁶ Aasiri inga hloko, asi unopinda hloko, ari munukuna unodikana, kakurutu kwendiri, asi kunozopinda kwakaitawani kudaro kwouri, mumuviri no kuna Mambozve.

¹⁷ Ndizvo kudari wechindiverenga kuti ndiri shamwari yako, muashire kudari ndini.

¹⁸ Asi kudari iye akakushaishira chiro, nokuti ano gava kwouri, tarai icho mumagava angu;

¹⁹ inini Pauri ndinotara ichi ngo nyara yangu: Ndinozoaripira. Kuti ndisazoti kwouri iwewe pachako uri gava kwendiri.

²⁰ Eya hama, nditendere kuti ndidakajwe ndiwe kuna Mambo; gwinyisa mwoyo wangu kuna Kristu.

²¹ Ndechigonda kupurutana kwako ndinotara kwouri, ndechiziva kuti unozoyita no zvimweni kupinda zvondananga.

²² Asizve ndinasirire ugaro; ngokuti ndinogonda kuti ngo mikumbiro yenyu ndinozopihwa kwomuri.

Mazwi okupejisira

²³ Epafrasi, musungwa pamwepo neni kuna Kristu Jesu unokutambisa;

²⁴ ngokudaro na Marku, na Aristaku, na Dhemasi na Ruka vashandi pamwepo neni.

²⁵ Nyasha ja Mambo wedu Jesu Kristu ngajive no mweya yenyu.