Chakapangijihwa 9 - NOVO TESTAMENTO EM NDAU

¹ Ngirosi yo chinoshanu yakarija, neni ndakavona ndhondo yakabva mugore ikawa pa nyika, yakapuwa mugogo wo rindi rakajikisisa.

² Nayo yakabewura rindi rakajikisisa, no usi wakakwira kubva murindi umwo, wakadari ngo usi wo choto chakakura. No zuva, no mweya zvakasvipiswa ngo ndava yo usi wo rindi iro.

³ No ndongwe jakabuda mu usi, kuviya panyezuru po nyika, jakapuwa simba rakadari ngo ro zvinyavada zvo mu nyika.

⁴ Jakabvunjwa kuti jisazoshaishira mwenje wo nyika, nokuti chiro chimweni chakasvipirikira, nokuti muti, asi vega vandhu vasina chinamiro cha Mwari pa huma javo.

⁵ Ajizivi kupuwa simba ro kuvauraya, asi kuti jivahwajise mweji mushanu: No kuhwajisa kwajo inga kwakadari ngo kuhwajisa kwo chinyavada apo charuma mundhu.

⁶ Ngaao mazuva vandhu vanozopshaka kufa, vasikakuwani; no kudisisa kuti vafe, no kufa kunozotiza kubva kwavari.

⁷ No miyemo yo ndongwe ijo yayiva yakadari ngo yo mahachi, akanasirihwa kurwa, no panyezuru po musoro yajo panonga payiva no majunguja akadari ngo omukore. No hope jajo inga jakadari ngo jo vandhu.

⁸ Jayiva no bvuji rakadari ngo bvuji ro vanakaji, no mazino ajo inga akadari ngo ombhondoro.

⁹ Jayiva no chivhikiro cho diti chakadari ngo simbi; no kutindhira kwo mapapiro ajo inga kwakadari ngo kwo ngoro jo kurwa, no kwo mahachi akawanda echigogoma kuenda ku imbi.

¹⁰ Jayiva no mwishe yakadari ngo yo zvinyavada, no chisomo; no kumwishe yajo kwayiva no simba ro kuremaja vandhu mweji mushanu.

¹¹ Jayiva na mambo wajo, yayiva ngirosi yo rindi rakajikisisa, zina rayo ngo chihebheru ndi Abhadhoni, ngo chigiriki ina zina rokuti, Aporiyoni.

¹² Dambujiko ro kutanga rakapinda; vona, kuchaviya matambujiko maviri ngo sure kwo izvi.

¹³ No ngirosi yo chitandhatu yakarija mbhayapaya, neni ndakazwa izwi rechibva pa nyanga jo altari ro mukore riri pamberi pa Mwari,

¹⁴ rechiti kuna ngirosi yo chitandhatu, yayiva no mbhayapaya: “Sunungura ngirosi murongomuna, jakasungwa pamurambo mukuru wo Ufrate.”

¹⁵ No ngirosi murongomuna jakasununguhwa, jakanasirihwa nguva no zuva no mweji no gore kuti jiuraye rupande ro chitatu ro vandhu.

¹⁶ No uwandu wo hondo jo vanogadha mahachi hwayiva omazana maviri wo zviuru zvo zviuru (200.000.000). Ndakazwa uwandu hwavo.

¹⁷ Ngokudaro ndakavona mahachi muchivoniso naavo vakaagada, vano zvivhikiro zvo diti, zvo muriro no hwo hiyasinto no hwo sorufa. No musoro jo mahachi inga jakadari ngo mbhondoro, no mumiromo jao mwakabuda muriro pamwepo no usi no sorufa.

¹⁸ Ngo nyatwa iji ndhatu rupande ro chitatu ro vandhu rakaurawa, ngo muriro no usi no sorufa, izvo zvakabuda kumiromo yao.

¹⁹ Ngokuti simba ro mahachi rayiva mu miromo yao no kumwishe yao, ngokuti mwishe yao yayinga yakadari ngo nyoka yayiva no musoro; ndiwo airemaja.

²⁰ No vamweni vandhu, vasikazivi kuurawa ngo nyatwa iji, avazivi kutenderuka kubva mumishando yo nyara javo, kuti vasazodira mabzoka, no muezaniso yo kudira, yo mukore no yo sirivha, no yo thusi no yo mapuwe no yo miti; iyo isikakoni kuvona, nokuti kuzwa, nokuti kufamba;

²¹ zve, avazivi kutenderuka kubva mukuuraya kwavo, nokuti mukuroya kwavo, nokuti mukuomba kwavo, nokuti mukuba kwavo.