Chakapangijihwa 7 - NOVO TESTAMENTO EM NDAU

Mbungano yo vandhu va Mwari

¹ Ngosure kwo ichi ndakavona ngirosi murongomuna jakayima kumativi marongomuna onyika, jakabata madutu marongomuna onyika, kuti dutu risazofurija mu nyika, nokuti mu jombe, nokuti panyezuru po miti yese.

² Apo ndakavona ngirosi imweni, yechikwira kubva kumabvazuva, ino chinamiro cha Mwari unopona, nayo yakadanijira ngo izwi guru kuno ijo ngirosi murongomuna, jakapuwa kushaishira nyika no jombe,

³ yechiti: “Musashaishira nyika nokuti jombe, nokuti muti naumwe, mbhera tadira chinamiro pa huma jo varanda va Mwari wedu.”

⁴ Ndakazwa uwandu hwo avo vakanamihwa, vayiva zana no makumi marongomuna na marongomuna ozviuru (144.000), vakanamihwa chinamiro kubva kujinja rimwe ngarimwe ro vana vo Israeri.

⁵ Kujinja ra Judha vakanamihwa chinamiro vari gumi na zviviri zvo zviuru (12.000), kujinja ra Rubheni gumi na zviviri zvo zviuru (12.000), kujinja ra Gadhi gumi na zviviri zvo zviuru (12.000),

⁶ kujinja ra Asheri gumi na zviviri zvo zviuru (12.000), kujinja ra Naftari gumi na zviviri zvo zviuru (12.000), kujinja ra Manasa gumi na zviviri zvo zviuru (12.000),

⁷ Kujinja ra Simioni gumi na zviviri zvo zviuru (12.000), kujinja ra Revi gumi na zviviri zvo zviuru (12.000), kujinja ra Isakari gumi na zviviri zvo zviuru (12.000).

⁸ Kujinja ra Zabhurona gumi na zviviri zvo zviuru (12.000) kujinja ra Josefa gumi na zviviri zvo zviuru (12.000), kujinja ra Benjamini rakanamihwa chinamiro kuna vari gumi na zviviri zvo zviuru (12.000).

Mbungano huru

⁹ Ngosure kwo izvi ndakaringira ndikavona, mbungano huru isikakoni kuverengwa ngo mundhu, inobva kumajinja ese, no marusinga ese no vo vandhu vese, no vo ndimi jese, vakayima pamberi po dendemaro no pamberi po Bvuta, vakasimira nguvo jakachena vano matavi omichindu munyara javo;

¹⁰ vakadanijira ngo izwi guru, vechiti: “Ruponeso ruri kuna Mwari wedu unogara padendemaro, nokuna Bvuta.”

¹¹ Ngirosi jese jayima jechitendeneja dendemaro, no kutendeneja vakuru no zvisikwa zvirongomuna zvinopona; jakawa pasi pamberi po dendemaro ngo hope jajo, jakadira Mwari,

¹² jechiti: “Ameni, kukujwa no uthende, no ungwaru, no kubonga, no kureremejwa, no simba, no kugwinya, ngazvive kuna Mwari wedu, mbhera narini. Ameni!”

¹³ No umwe wo vakuru wakabvunjisa, echiti: Kwendiri: “Ndiyani ava vakasimira nguvo jakachena vanobva kwapi?”

¹⁴ Ndakati kwaari: “Mambo wangu, ndiwe unoziva.” Naye wakati kwendiri: “Ava ndivo vanobuda kubva kudambujiko guru, navo vakasuka nguvo javo, vakajichenesa mungazi yo Bvuta.”

¹⁵ Ngo iyi ndava vari pamberi po dendemaro ra Mwari, vanomushandira masikati no usiku muthemperi rake. No uwo unogara padendemaro unozovangwarira mutende rake.

¹⁶ Avachazozwi njara, nokuti nyota; zve, zuva arichazovapisi, nokuti kupisa kumweni:

¹⁷ Ngokuti Bvuta riri pakati po dendemaro rinozovahavisa, no kuvatungamirira kuenda navo kuzvinyuka zvokumwa yo kupona. Na Mwari unozopukuta misoji yese kubva kumajiso avo.