Chakapangijihwa 5 - NOVO TESTAMENTO EM NDAU

Bhuku ro Chibvuta cha Mwari

¹ Zvino ndakavona munyara yo kumuho yo uwo wakagara pa dendemaro, bhuku rakatahwa pakati no kunja, rakanamihwa ngo zvinamiro zvinomwe.

² Ndakavona ngirosi ino simba yechidanijira ngo izwi guru, yechiti: “Ndiyani unosisira kubewura bhuku, no kusunungura zvinamiro zvaro?”

³ Inga kusina mundhu mugore nokuti pa nyezuru po nyika, nokuti ngo pasi po nyika, waikona kubewura bhuku nokuti kuriringira.

⁴ Apo ndakachema kukurutu ngokuti inga kusina mundhu wakavoneka wakasisira kubewura bhuku nokuti kuriringira.

⁵ No umwe wo vakuru wakati kwendiri: Usachema: Vona, Mbhondoro yo ruji rwa Judha, miji hwa Dhavhidha hwakanyisa kuti abewura bhuku, no zvinamiro zvinomwe zvaro.

⁶ Zvino ndakavona pakati po dendemaro no po zvisikwa zvirongomuna zvinopona, no po vakuru, rayinga rakayima Bvuta rinonga rakaurawa, rayinga rino nyanga nomwe, no majiso manomwe, izvo zviri mweya minomwe ya Mwari, yakatumwa mu nyika mwese.

⁷ Bvuta rakwedera, rikatora bhuku kubva ku nyara yo kumuho yo uwo wayigara padendemaro.

⁸ Naapo rayinga ratora bhuku, zvisikwa zvirongomuna zvinopona, no vakuru vari makumi maviri no varongomuna vakawa pasi pamberi po Bvuta, umwe ngaumwe wavo uno chidyangari no mukheyo yo mukore, yakazara ngo mutombo ino gwema, iri mikumbiro yo vakacheneswa.

⁹ Navo vakayimba nduyo ipsha vechiti: “Unosisira iwewe kutora bhuku no kubewura zvinamiro zvaro, ngokuti iwewe wakaurawa, ukatitengera kuna Mwari ngo ngazi yako, kubva ku majinja ese, no ndimi jese, no vandhu vese, no ku marusinga ese.

¹⁰ Newe wakavaita majimambo no vapristi kuna Mwari wedu; navo vanotonga pa nyezuru po nyika.”

¹¹ Zvino ndakavona, ndikazwa izwi ro ngirosi jakawanda jayinga jakatendeneja dendemaro, no zvisikwa zvinopona, no vakuru, no uwandu hwajo hwayiva zviuru no zviuru zvo zviuru.

¹² Jechiti ngo izwi guru: “Rakasisira Bvuta rakaurawa kuashira simba, no upfumi, no ungwaru, no kugwinya, no kureremejwa, no uthende, no kuirikijwa.”

¹³ No zviro zvese zvakasikwa zviri mugore, no zviri mu nyika, no zviri pasi po nyika, no zviri mujombe, nazvo zvese zviri mukati mwazvo, ndakazvizwa zvechiti; kwaari unogara padendemaro, no ku Bvuta, ngakuve no kukujwa, no kureremejwa, no uthende, no kutonga, mbhera narini.

¹⁴ No zvisikwa zvirongomuna zvinopona, zvakati [Ameni]! No vakuru vakawa pasi, vakadira.