Chakapangijihwa 4 - NOVO TESTAMENTO EM NDAU

Mwari padendemaro rake

¹ Ngosure kwo izvi ndakaringira, ndikavona, ruvhi rwakabewuhwa mugore, no izwi ro kutanga rondakazwa rakadari ngo kurira kwo mbhayapaya rechivereketa neni, rechiti: “Kwira pano, neni ndinozokupangijira izvo zvinosisira kuitika sure kwo izvi.”

² Paripo ndayiva mumweya: Vona, rayivapo dendemaro rakagajikwa mugore, ngo panyezuru paro paigara umwe.

³ No uwo waigarapo kuringirika kwake inga kwakadari ngo buwe ro jasipa no ro sadiyo, kwayivapozve utawahumbe hwechitendeneja dendemaro, kuringirika kwaho inga kwakadari ngo buwe ro simaragadiyo.

⁴ No kutendeneja dendemaro, kwayivapo madendemaro ari makumi maviri na marongomuna, no panyezuru po madendemaro paigara vakuru vari makumi maviri na varongomuna, vakasimira zvakachena, no majunguja omukore ayiva mumusoro mwavo.

⁵ Kwakabudazve kudendemaro mbheni no mazwi no kutindhira; kwayivapo zvivheneko zvinomwe zvo muriro zvechibwaka pamberi po dendemaro, izvo zviri mweya minomwe ya Mwari;

⁶ no pamberi po dendemaro pano jombe rakadari ngo buwe ro girazi, no pakati po dendemaro no kuritendeneja kwayivapo zvisikwa zvirongomuna zvaipona, zvakazara ngo majiso pamberi no sure.

⁷ No chisikwa chokutanga chayinga chakadari ngo mbhondoro, no chisikwa chochipiri chayinga chakadari ngo konyana ro n'ombe, no chisikwa cho chitatu chayinga chino hope yakadari ngo yo mundhu, no chisikwa cho chirongomuna chayinga chakadari ngo goji rinomburuka.

⁸ No zvisikwa zvirongomuna zvaipona zvese, chimwe ngachimwe chazvo chayiva no mapapiro matandhatu, zvakazara majiso kutenderera kunja no mukati, nazvo azvizivi kuzorora masikati no usiku, zvechiti: “Wakachena, Wakachena, Wakachena, Mambo Mwari Unosimbarese, waindovapo, no uripo, no unozoviya.”

⁹ Naapo zvisikwa zvinopona zvinopa kukuja no kureremeja no kubonga kwaari unogara padendemaro, unopona mbhera narini.

¹⁰ Vakuru vari makumi maviri na varongomuna vanozowa pasi pamberi po uwo unogara padendemaro, no kumudira uwo unopona mbhera narini, navo vanozokandira majunguja avo pamberi po dendemaro, vechiti:

¹¹ “Unosisira, iwewe Mambo wedu na Mwari wedu, kuashira kukujwa no kureremejwa no simba. Wakasika zviro zvese, na ngo kuda kwako zvakavapo, zvakasikwa.”