Chakapangijihwa 3 - NOVO TESTAMENTO EM NDAU

Tshamba kuna Chiara cho Saradhesi

¹ “Tarira ngirosi yo chiara chiri mu Saradhesi: Unonanga izvi uwo uno Mweya minomwe ya Mwari, no ndhondo nomwe; ndinoziva mishando yako kuti uno zina rokuti unopona, asi wakafa.

² Rinda, no kugwinyisa izvo zvasara, zvoda kufa, ngokuti andivoni kuti mishando yako yakaperera pamberi pa Mwari wangu.

³ Ndizvo cherecheja maashirire nokupa kwo wakayita, uzvingwarire no kutenderuka. Ndizvo kuti usikarindi, ndinozoviya kudari ngo mbavha, newe auzozivi nguva yo ndinozoviya ndiyo kwouri.

⁴ Asi uno mazina mashomani mu Saradhesi, oavo vasikazivi kusvipisa zvokusimira zvavo, navo vanozofamba neni vakasimira zvakachena, ngokuti vanosisira.

⁵ Iye unonyisa unozosimijwa kudaro ngo zvo kusimira zvakachena, neni andizojimi zina rake mutshamba yo kupona, ndinozotenda zina rake pamberi pa Baba wangu no pamberi po ngirosi jake.

⁶ Iye uno njeve ngaazwe zvinovereketwa ngo Mweya kuzviara.”

Tshamba kuna Chiara cho Firadhefiya

⁷ Tarira ngirosi yo chiara chiri mu Firadhefiya: Unonanga izvi wakachena, uno gwinyiso, uno mugogo wa Dhavhidha, uwo unobewura akunazve unozokonya, naye akonya akunazve unobewura.

⁸ Ndinoziva mishando yako, vona ndakadira pamberi pako ruvhi rwakabewuhwa, akuna mundhu angarukonya, uno simba doko, wakangwarira izwi rangu auzivi kuramba zina rangu.

⁹ Vonayi, ndinokupa vamweni vo nyumba yo kudira ya Sathani, vanozwi vajudha, asivopi, asi vanonyepa: Vona ndinozoita kuti vaviye no kudira pamberi po tsoka jako, no kuziva kuti ndakakuda.

¹⁰ Ngokuti wakangwarira izwi rangu ro kusengerera neni ndinozokungwarira ngo mukuvo wo kutambujika unoviya panyezuru po nyika yese, kueja avo vanogara mu nyika.

¹¹ Ndinokasira kuviya: Batisisa chounacho kuti asazovapo mundhu unozokutorera junguja rako.

¹² Uwo unonyisa ndinozomuita njiki muthemperi ra Mwari wangu, aasazobudimwo: Neni ndinozotara panyezeru pake zina ra Mwari wangu, no zina ro dhoropa ra Mwari wangu, riri Jerusarema ibza rinojaka kubva mugore, kubva kuna Mwari wangu, no zina rangu ibza.

¹³ Iye uno njeve ngaazwe chinovereketwa ndi Mweya kuzviara.

Tshamba kuna Chiara cho Raodhikiya

¹⁴ “Tarira ngirosi yo chiara chiri mu Raodhikiya: Unonanga izvi uwo uri Ameni, uri chapupu chakagondeka chino gwinyiso, muambi wo zvakasikwa zva Mwari:

¹⁵ Ndinoziva mishando yako kuti autondhori nokuti kupisa. Ndinoda kuti utondhore nokuti upise.

¹⁶ Ndizvo ngokuti unojiya usikapisi nokuti kutondhora, ndinozokurucha mumuromo wangu,

¹⁷ ngokuti unoti: Ndiri guruja, ndakapfuma, anditami chiro, usikazivi kuti uri tsereketwa, no unotambujika uri murombo no uri bofu no mutitinini.

¹⁸ Ndinokupanga kuti utenge kwendiri mukore wakanyunguruswa ngo muriro kuti uite guruja, no zvokufuka zvakachena kuti ujisimije, kuti kupsheruka kwo utitinini hwako usazovoneka. No mutombo wokuzoja majiso, kuti uvone.

¹⁹ Avo vese vondinoda, ndinovathusa no kuvapangira; ndizvo vangirira utenderuke.

²⁰ Vonayi, ndinoima paruvhi no kuguguja; kudari uripo mundhu unorizwa izwi rangu no kubewura musuvo, ndinozonghwina kwaari, ndihe naye, naye ahe neni.

²¹ Iye unonyisa ndinozomuita kuti agare neni padendemaro rangu, kudari ndini ndakanyisavo, ndatogara na Baba wangu padendemaro ravo.

²² Iye uno njeve ngaazwe zvinovereketwa ndi Mweya kuzviara.”