Chakapangijihwa 22 - NOVO TESTAMENTO EM NDAU

¹ Apo yakandipangijira murambo wakaera wo kumwa yo kupona, wakaera kudari ngo girazi, wechibuda mudendemaro ra Mwari no ro Bvuta.

² Pakati po gwanja raro, no kumarutivi ese omurambo, kwayivapo muti wo kupona, wo chibereka mbewu jiri gumi na mbiri jo michero, wechibereka michero yawo mweji yese: No masakani omuti ayiva okurapa majinja.

³ Akusazovapozve chinonyangaja: No dendemaro ra Mwari no ro Bvuta anozovapo mukati mwaro, no varanda vake vanozomushandira;

⁴ vanozovona hope yake, no zina rake rinovapo pa huma javo.

⁵ Akuchazovapo usiku; navo avazotami kujeka kwo chibani, nokuti kujeka kwo zuva, ngokuti Mambo Mwari unozovapa kujeka: Vanozotonga mbhera narini.

Kupona kwa Jesu

⁶ Nayo yakati kwendiri: Aya mazwi anogondeka, ano gwinyiso na Mambo Mwari wo mweya yo vaprofeti wakatuma ngirosi yake kuti ipangijire varanda vake zvinosisira kuti zvikasire kuitika:

⁷ “Vona, ndinokasira kuviya, Unomuchena uwo unongwarira mazwi okuprofeta kwo iri bhuku.”

⁸ Inini Johani ndakazwa ndikavona izvi. Naapo ndazwa no kuvona, ndakawa pasi kudira pamberi po tshoka jo ngirosi yakandipangijira izvi.

⁹ Nayo yakati kwendiri: “Ngwara kuti usaita kudaro: Ndiri muranda pamwepo newe, no wo hama jako vaprofeti, no wo avo vanongwarira mazwi okuprofeta kwo bhuku iri; dira Mwari.”

¹⁰ Yakatizve kwendiri: “Usakonya mazwi okuprofeta kwo bhuku iri; ngokuti mukuvo waaphedo.

¹¹ Iye usikazivi kururama ngaagare asikazivi kururama; no uwo uno svina ngaagare ano svina; no uwo wakarurama ngaagare wakarurama; no uwo wakacheneswa ngaagare wakacheneswa.

¹² Vona, ndinokasira kuviya, no musharo wangu uneni, kuti ndipe mundhu wese kudari ngo mushando wake.

¹³ Ndiri Arifa na Omega, wokutanga no wokugumisira, muambi no mupejisiri.

¹⁴ Vanomuchena avo vanosuka nguvo javo, kuti vakone kuviya kumuti wo kupona, no kunghwina ngo pamisuvo mu dhoropa.

¹⁵ Ngokuti ngo kunja kuno imbhwa, no vanoroya, no vanoomba, no vaurayi, no vadira muezaniso, navo vese vanodira no kuyita kunyepa.

¹⁶ Inini Jesu ndakatuma ngirosi yangu kupupura izvi kwomuri mu zviara. Ndiri miji, no ruji rwa Dhavhidha, ndhondo inojeka masase.”

¹⁷ No Mweya no murovohwa vanoti: “Viya!” No uwo unozwa ngaati: “Viya!” Naye unozwa nyota, ngaaviye: Uwo unoda ngaatore kumwa yo kupona ngo nyasha.

Mabudiro

¹⁸ Ngokuti ndinopupura ku mundhu wese unozwa mazwi okuprofeta kwo bhuku iri. Kuti uripo mundhu unozonyengejera kuzviro izvi, Mwari unozonyengejera kwaari matambujiko akatahwa mubhuku iri:

¹⁹ Nokuti aripo mundhu unozopungura mazwi obhuku ro kuprofeta uku, Mwari unozobvisa chikovehwa chake kumuti wo kupona, no kudhoropa rakachena, izvo zvakatahwa mubhuku iri.

²⁰ Iye unopupura izvi unoti: “Eya ndinokasira kuviya.” Ameni, viya Mambo Jesu.

²¹ Nyasha ja Mambo Jesu ngajive nemwi mwese.