Chakapangijihwa 21 - NOVO TESTAMENTO EM NDAU

Denga ibza no nyika ipsha

¹ Neni ndakavona denga ibza no nyika ipsha. Ngokuti denga rokutanga no nyika yokutanga zvakapinda, jombe inga kusina.

² Ndakavona dhoropa rakachena, Jerusarema ibza rechibzuka mugore, rechibva kuna Mwari, rakanasirihwa kudari ngo murovohwa wakanemesehwa mwamuna wake.

³ Ndakazwa izwi guru rechibva kudendemaro, rechiti: “Vona, tende ra Mwari riri pakati po vandhu naye unozogara navo, navo vanozoita vandhu vake, na Mwari pachake unozova navo, echiita Mwari wavo.”

⁴ Naye unozopukuta musoji yese kumajiso avo, no kufa akuchazovapo, nokuti chiriro, nokuti kuchema, zve, akuchazovapo kuhwajihwa, ngokuti zviro zvokutanga zvapinda.

⁵ No uwo wakagara padendemaro wakati: “Vonanyi ndinoita zviro zvese kuti zviite zvipsha.” Naye wakati: Tara, ngokuti aya mazwi anogondeka, ano gwinyiso.

⁶ Naye wakati kwendiri: “Zvaitika, ndiri Arifa na Omega, wokutanga no wokugumisira.” Ndinozopa kwaari unozwa nyota kumwa yo mwimbo yo kupona ngo nyasha.

⁷ Iye unonyisa unozogara ndhaka yo zviro zvese, ndinozoita Mwari wake, naye unozoita mwana wangu.

⁸ Asi vanotya, no vasikatendi, no vanonyangaja, no vaurayi, no vanoomba, no varoyi no vadiri vo muezaniso, navo vese vanyepi vanozova no chikovaniswa chavo mugandwa rinobwaka ngo muriro no sorufa, ndiko kufa kwochipiri.

Jerusarema ibza

⁹ Yakaviya imwe yo ngirosi nomwe yo ijo jayiva no mikheyo minomwe ino matambujiko manomwe okugumisira; yakavereketa neni, yechiti: “Viya pano, ndinozokupangijira murovohwa, mukaji wo Bvuta.”

¹⁰ Yakanditora mu Mweya kuenda ku dundhu guru rakareba, ikandipangijira dhoropa rakachena Jerusarema, rechibzuka mugore rechibva kuna Mwari.

¹¹ Rino uthende hwa Mwari: Kujeka kwaro kwayinga kwakadari ngo buwe rino mutengo mukuru aembho, rinonga buwe ro jasipa, rakaera kudari ngo rinokhazikira.

¹² Rino biravira guru rakareba; rino misuvo iri gumi na muviri, no pa musuvo pano ngirosi jiri gumi na mbiri; no mazina akatahwa panyezuru pajo, ari mazina ovana vari gumi na vaviri va Israeri.

¹³ Kumabvazuva kwayivapo misuvo mitatu; na ngo kanjikazi kwayivapo misuvo mitatu; na ngo kakusi kwayivapo misuvo mitatu na ngo kumavirira kwayivapo misuvo mitatu.

¹⁴ No kubiravira ro dhoropa rayiva no majiro ari gumi na maviri, no pa nyezuru pao payiva no mazina ari gumi na maviri ovapostori vari gumi na vaviri vo Bvuta.

¹⁵ Iyo yakavereketa neni yayiva no njanga yo mukore, kupima dhoropa, no misuvo yaro, no biravira raro.

¹⁶ No dhoropa rayiva no makhona marongomuna akaezana, no kureba kwaro kwakandodari ngo kupambhama kwaro: Yakapima dhoropa ngo njanga, rayiva masitadiyo zviuru gumi na zviviri (12.000): Kureba kwaro, no kupambhama, no ukwiri hwaro, hwayiva hwakaezana.

¹⁷ Nayo yakapima mapiravira aro, rayiva makumbiti ari zana no makumi marongomuna na marongomuna (144), kudari ngo kupima kwo mundhu, kunoti, kwo ngirosi.

¹⁸ No mapiravira aro akavakiwa ngo jasipa, dhoropa rayiva ro mukore wakaera, wakadari ngo girazi rakaera.

¹⁹ Majiro omapiravira wo dhoropa akanemeswa ngo mbewu jese jo mapuwe ano mutengo mukuru. Jiro rokutanga rayiva ro jasipa; no rochipiri rayiva sapifiro; rochitatu rayiva ro karikedhoni; no rochirongomuna rayiva ro simaragidho,

²⁰ rochishanu rayiva ro saradonuki; no rochitandhatu rayiva ro saradhiyo; no ro chinomwe rayiva ro krusoriti; no ro chisere rayiva ro bheruri, no rochipfumbamwe rayiva ro topazi; ro chigumi rayiva ro krusoprasi rochigumi na rimwe hwakinte; no rochigumi na maviri rayiva ro ametusito.

²¹ No misuvo iri gumi na muviri yayiva yo usanga iri gumi na muviri; umwe ngaumwe wo misuvo wayiva wo usanga umwe: No gwanja ro dhoropa rayiva ro mukore wakaera, unonga girazi rakaera.

²² Neni andizivi kuvona themperi mukati mwaro, ngokuti Mambo Mwari Unosimbarese, no Bvuta vari themperi yaro.

²³ No dhoropa aritami zuva, nokuti mweji kurijekisa, ngokuti uthende hwa Mwari wakarijekisa, no Bvuta riri chibani charo.

²⁴ No majinja anozofamba ngo kujeka kwaro: No majimambo onyika anozozisa uthende hwao mukati mwaro.

²⁵ No misuvo yaro aizokonyiwi masikati, ngokuti ahuzovapo usiku:

²⁶ Navo vanozozisa uthende no kureremejwa kwo majinja mukati mwaro.

²⁷ Asi akuna nachimwe chakasvipiswa chinozonghwinemwo nokuti uwo unoyita chinonyangaja no manyepo: Asi avo vega vakatahwa mubhuku ro kupona ro Bvuta.