Chakapangijihwa 20 - NOVO TESTAMENTO EM NDAU

Chiuru (1.000) cho makore

¹ Neni ndakavona ngirosi yechibzuka kubva mugore, ino mugogo wo rindi rakajikisisa no garagajero guru munyara yayo.

² Yakabata dragoni, nyoka yokare, iri Dhiabhorosi, na Dhiaborosi, ikamusunga chiuru (1.000) cho makore.

³ Yakamukandira murindi rakajikisisa, ikarikonya, ikadira chinamiro panyezuru pake, kuti asazochengejerazve majinja, kumbhera chiuru cho makore (1.000) apera. Ngosure kwo izvi kunosisira kuti ambosununguhwa mukuvo mudoko.

⁴ Ndakavona madendemaro, naavo vakagara panyezuru pao, no kutonga kwakapuwa kwavari; ndakavona mwoyo yo avo vakaguhwa musoro ngo ndava yo uchapupu hwa Jesu, na ngo ndava yo izwi ra Mwari, naavozve vasikazivi kudira chikara, nokuti muezaniso wacho, vasikazivi kuashira chivoniso pa huma javo no panyara pavo; navo vakararama, vechitonga na Kristu kupeja chiuru (1.000) cho makore.

⁵ Vamweni vakafa avazivi kurarama mbhera makore ari chiuru (1.000) apera. Ukwu ndikwo kumuka kwo kutanga.

⁶ Unodakajiswa no kucheneswa uno chikovaniswa mukumuka kwo kutanga. Panyezuru po ava kufa kwo chipiri akuna simba; asi vanozoita vapristi va Mwari no va Kristu, vanozotonga naye chiuru (1.000) cho makore.

Kunyiswa kwa Sathani

⁷ Naapo chiuru (1.000) cho makore chapera, Sathani unozosununguhwa kubva muguniya rake.

⁸ Unozoenda kwoochengejera majinja ari kumarupande marongomuna onyika, ari Gogi na Magogi, kuaunganijira kurwa: Uwandu wavo hwakadari ngo musanga wo jombe.

⁹ Vakakwira po kupambhama kwo nyika, vakatendeneja muchacha wo vakacheneswa, no dhoropa rinodikana: Kwakabzuka muriro wechibva mugore, ukavapeja.

¹⁰ Na Dhiabhorosi uwo wakavachengejera, wakakandihwa mugandwa ro muriro no sorufa, muno chikara no muprofeti wo kunyepa; navo vanozotambujwa masikati no usiku mbhera narini.

Kutongwa kwo kugumisira

¹¹ Ndakavona dendemaro guru rakachena, no uwo wakagara panyezuru paro, uwo nyika no denga zvakamutiza, azvivi kuzovonekazve no ndau yazvo.

¹² Ndakavona vakafa vakuru no vadoko, vakayima pamberi po dendemaro, no mabhuku akabewuhwa; no rimweni bhuku rakabewuhwa, riri bhuku ro kupona; no vakafa vakatongwa ngo izvo zvakatahwa mumabhuku, kudari ngo mishando yavo.

¹³ No jombe rakabudisa vakafa vayiva mukati mwaro, no rufu no Haidhesi zvakabudisa vakafa vayiva mukati mwazvo, navo vakatongwa umwe ngaumwe kudari ngo mushando yake.

¹⁴ No rufu no Haidhesi zvakakandihwa mugandwa ro muriro. Ukwu ndikwo kufa kwo chipiri, gandhwa ro muriro.

¹⁵ Kuti mundhu wakawanika asikazivi kutahwa mubhuku ro kupona, wakakandihwa mugandwa ro muriro.