Chakapangijihwa 2 - NOVO TESTAMENTO EM NDAU

Tshamba kuna chiara cho Efesu

¹ “Tarira ku ngirosi yo chiara chiri mu Efesu, wechiti: Unonanga izvi uwo wakabata ndhondo nomwe munyara yake yo kumuho, unofamba pakati po zvigajikiro zvo zvibani zvinomwe zvo mukore:

² Ndinoziva mishando yako no kutambujika kwako, no kusengerera kwako nokuti autenderi vandhu vakashata, newe wakavaeja vanojidanija kuti vapostori, asi andivopi, wakavavona kuti vanyepi.

³ Newe unosengerera wechitsamwirira ngo ndava yo zina rangu, auzivi kuremba.

⁴ Asi ndinokushora ngo ichi kuti wakasiya rudo rwako rwo kutanga.

⁵ Ndizvo cherecheja apo powakawa, utenderuke, uite mishando yokutanga kuti usikaiti kudaro, ndinozoviya kwouri ndibvise chigajikiro cho chibani chako pandau pacho, kuti usikatenderuki.

⁶ Asi ichi unacho, chokuti unonyenya mishando ya vaNikorao, yondinonyenyavo.

⁷ Iye uno njeve ngaazwe chinovereketwa ndi Mweya kuzviara. Kwaari unonyisa ndinozomutendera kuti ahe kumuti wo kupona uri mu Paradhasi ra Mwari.”

Tshamba kuna Chiara cho Semerina

⁸ “Tarira kungirosi yo chiara chiri mu Semerina wechiti: Unonanga izvi uwo wo kutanga no wo kugumisira, wayiva wakafa, nazvino unopona.

⁹ Ndinoziva dambujiko rako no urombo hwako, asi uri guruja, zve, ndinoziva kutuka kwavo vanoti vari vajudha, asi andivopi, asi vari vo nyumba yo kudira ya Sathani.

¹⁰ Usatya izvo zvo unozotambujika ndizvo, vonai, Dhiabhorosi woda kunghwinisa vamweni venyu muguniya, kuti muejwe; nemwi munozova no dambujiko mazuva ari gumi. Ita unogondeka mbhera mukufa, neni ndinozokupa junguja ro kupona.

¹¹ Iye uno njeve ngaazwe zvinovereketwa ngo Mweya kuzviara. Iye unonyisa aazoremajwi ngo kufa kwo chipiri.”

Tshamba kuna Chiara cho Perigamu

¹² Tarira ngirosi iri muchiara cho Perigamu: Unonanga izvi uno shoti inopinja ino upanga huviri.

¹³ Ndinoziva pounogara, ndipo pano dendemaro ra Sathani; newe unobatisisa zina rangu, ausati waramba kutenda kwangu, eya, nokuti kumazuva a Antipasi chapupu changu chakagondeka, wakaurawa pakati penyu, ndipo paanogara Sathani.

¹⁴ Asi ndinokushora ngo zviro zvishomani, ngokuti unavo vamweni vanobata zvijijiso zva Bharami, uwo wakajijisa Bharaki kudira chikhugunyiso pamberi po vana vaIsraeri, nokuha zvinobaihwa muezaniso yo kudira no kuomba.

¹⁵ Ngokudarozve unavo vamweni vanobatisisa zvijijiso zvo vaNikorao,

¹⁶ ndizvo tenderuka, usikaiti kudaro ndinozoviya kwouri ngo kukasira, ndiambane navo ngo shoti yo muromo wangu.

¹⁷ Iye uno njeve ngaazwe zvinovereketwa ndi Mweya kuzviara. Kwaari unonyisa ndinozomupa mana yakafishika ndinozomupazve buwe rakachena, no panyezuru po buwe pakatahwa zina ibza, risikaziviki ngo umweni kwega ngo uwo unoriashira.

Tshamba ku Chiara cho Tiyatira

¹⁸ Tarira ngirosi yo chiara chiri mu Tiyatira: Unonanga izvi Mwana wa Mwari, uno majiso akadari ngo murazvu wo muriro, no tshoka jake jakadari ngo thusi rinon'anikira.

¹⁹ Ndinoziva mishando yako no rudo rwako no kugonda kwako no kushandira kwako, no kusengerera kwako, nokuti mishando yako yokugumisira inopinda yokutanga.

²⁰ Asi ndinokushora ngo ichi, kuti unotendera mwanakaji Jezabheri, uwo unoti uri muprofeti, naye unojijisa no kupaukisa varanda vangu kuti vaombe nokuha zvakabaihwa miezaniso yo kudira.

²¹ Neni ndakamupa nguva yokuti atenderuke, asi inga asikadi kutenderuka kubva mukuomba kwake.

²² Vona, ndinozomukandira mumubede, naavo vanoomba naye mu dambujiko guru, kuti vasikatenderuki kumishando yavo.

²³ Neni ndinozouraya vana vake ngo rufu. No zviara zvese zvinozoziva kuti inini ndiriye unopshakisisa mipinimijo no mwoyo, neni ndinozomupa umwe ngaumwe kudari ngo mushando yenyu.

²⁴ Asi ndinoti kwomuri, imwimwi mwakasara mu Tiyatira, kwavari vasina uku kujijiswa, vasikazivi kuziva kujika kwa Sathani, ndinoti kwomuri: Andizomuthikisi mutwaro umweni.

²⁵ Asi icho chomunacho batisisanyi mbhera ndiviye.

²⁶ No uwo unonyisa, no unongwarira mishando yangu pakugumisira, kwaari ndinozopa simba panyezuru po majinja:

²⁷ Naye unozotonga ngo ndonga yo simbi, kudari ngo zvijuvi zvo muumbi zvinophwanywa kuyita zviviya; kudari ngo zvo ndakaashira kuna Baba wangu.

²⁸ Neni ndinomupa ndhondo inozwi masase.

²⁹ Iye uno njeve ngaazwe chinovereketwa ndi Mweya kuzviara.