Chakapangijihwa 19 - NOVO TESTAMENTO EM NDAU

Kudakara mugore

¹ Ngosure kwo izvi ndakazwa izwi guru, kudari ngo ro vandhu vazhinji mugore, rechiti: “Haleluya; ruponeso, no uthende, no simba, ngo zva Mwari wedu,

² ngokuti zvitongero zvake zvino gwinyiso, zvakarurama; ngokuti iye wakatonga hure huru yakashaishira nyika ngo kuhura kwayo, naye wakahwirijira ngazi yo varanda vake munyara mwake.”

³ Ngo kwo chipiri vanoti: “Haleluya!”, no usi wake unopwititika mbhera narini.

⁴ No vakuru vari makumi maviri no varongomuna, no zvisikwa zvirongomuna zvinopona, vakawa pasi, vakadira Mwari unogara padendemaro, vechiti, “Ameni; Haleluya!”

Muchadho wo Bvuta

⁵ No izwi rakabuda mudendemaro, rechiti: Kujanyi Mwari wedu, imwimwi mwese varanda vake, nemwi munomutya, vadoko no vakuru.

⁶ Naapo ndakazwa kunonga izwi ro chiunga chakakura chinonga bope ro kumwa yakawanda, rinonga izwi ro mutindhiro uno simba, rechiti: “Haleluya!” Ngokuti Mambo Mwari wedu, Unosimbarese unotonga.

⁷ Ngatidakare no kupfara kukurutu, ngatimupe mbiri, ngokuti muchadho wo Bvuta waguma no mukaji waro wakajinasirira.

⁸ Wakatendehwa kuti ajisimije ngo machira akanaka, orukangaza, anojeka no akachena; ngokuti machira akanaka orukangaza ndizvo zviyito zvakarurama zvo vakacheneswa.

⁹ Nayo yakati kwendiri: Tara, vanomuchena vakakokwa kuha kwo madeikoni kwo muchadho wo Bvuta. Nayo yakati kwendiri: “Aya mazwi ndiwo ogwinyiso a Mwari.”

¹⁰ Ndakawa pasi potsoka jayo kudira. Yakati kwendiri: “Ngwara kuti usaita kudaro; ngokuti ndiri muranda pamwepo newe, no hama jako, jinobata uchapupu hwa Jesu: Dira Mwari. Uchapupu hwa Jesu uri mweya wo kuprofeta.”

Mugadhi wo Hachi

¹¹ Ndakavona denga rakabewuka; vona, hachi rakachena, no uwo waigada waizwi Unogondeka, Uno Gwinyiso; naye mukururama unotonga no kuambana.

¹² No majiso ake ari murazvu wo muriro, no panyezuru po musoro wake pana majunguja akawanda. Wayiva no zina rakatahwa, risikazivikanwi ngo vandhu, asi iye ega.

¹³ Naye wakasimira nguvo yakafafazwa ngo ngazi. No zina rake rinozwi: Izwi ra Mwari.

¹⁴ No hondo jiri mugore jakamutevera jechigada mahachi akachena jakasimira machira akanaka orukangaza akachena no kusukika.

¹⁵ No shoti inopinja inobuda mumuromo wake, kuti arove ndiyo majinja: Naye unozoatonga ngo ndonga yo utare, inotsikatsika chikamuriro cho vhini ro kutyisa kwo ushungu hwa Mwari Unesimbarese.

¹⁶ Naye uno zina rakatahwa panyezuru po nguvo yake, no po mutezo yake, kuti: MAMBO WO MAJIMAMBO NO MUTONGI WO VATONGI.

¹⁷ Ndakavona ngirosi yechiyima pazuva; yakadanijira ngo izwi guru, yechiti kune shiri jese jinomburuka mugore. Viyanyi muungane padhiri guru ra Mwari;

¹⁸ kuti muhe nyama yo majimambo, no nyama yo nduna, no yo vandhu vano simba, no yo mahachi, no yo avo vanoagadha, no nyama yo vandhu vese, vakasununguka no vakasungwa, no yo vadoko no vakuru.

¹⁹ Ndakavona chikara, no majimambo onyika, no hondo jao, jakaungana pamwepo kuti jiambane no uwo wakagadha hachi, no hondo yakezve.

²⁰ No chikara chakabatwa, no muprofeti wo kunyepa uwo wakashanda zvivoniso mukuvona kwacho, zvaakachengejera ndizvo avo vayinga vaashira chivoniso cho chikara, naavo vakadira muezaniso wacho: Ava vaviri vakakandihwa vapenye mugandwa ro muriro raibwaka ngo sorufa:

²¹ No vamweni vakaurawa ngo shoti yo uwo waigadha hachi, ngo shoti yakabuda mumiromo wake; no shiri jese jakaguta ngo nyama yavo.