Chakapangijihwa 18 - NOVO TESTAMENTO EM NDAU

Kuwa kwo dhoropa guru

¹ Ngosure kwo izvi ndakavona ngirosi imweni yechibzuka kubva mugore, ino simba guru, no nyika yakajekiswa ngo uthende hwayo.

² Yakadanijira ngo izwi rino simba, yechiti: “Rawa, rawa, Bhabhurona guru, raaugaro hwo mabzoka, no ndau yo mweya yese ino svina, no yo shiri jese jino svina, no zvinonyenyiwa.”

³ Ngokuti majinja ese akamwa vhini ro ushungu wo kuhura kwake, no majimambo onyika akaomba naye, no vatengesi vo nyika vakapfuma ngo simba ro uwandu hwo fuma yake.

⁴ Ndakazwa izwi rimweni, rechibva mugore, rechiti: “Budanyi kwaari, vandhu vangu kuti musaiyana naye mukushaisha kwake, zve, kuti musazoashira matambujiko ake.”

⁵ Ngokuti zvishaishi zvake zvaguma no mugore, na Mwari wakacherecheja kushata kwake.

⁶ Mupei musharo kudari ngo zvaakamupa imwimwi, muhwirijire kaviri kwakapetwa kudari ngo mushando yake mushani iyo yaakazaja, mumuzajire kaviri.

⁷ Kudari ngo uwandu kwaakajikuja ndihwo no kupona mukujidakajisa, ngokudaro mupirenyi dambujiko no kurija mbhere, ngokuti unoti mumwoyo mwake: “Ndinogara ndiri hosi, andiri shirikaji akadi, andizovoni mbhere.”

⁸ Ndizvo matambujiko ake anozomugumira ngo zuva rimwe, kufa, no kurija mbhere, no njara, unozopiswa aembho ngo muriro; ngokuti Mambo Mwari, unomutonga, uno simba.

⁹ No majimambo onyika, akaomba naye, no kupona echijidakajisa pamwepo naye, unozochema no kumurijira mbhere, apo echizoringira usi wo kupsha kwake.

¹⁰ Echiyima ari kuretu ngokutya kutambujika kwake, echiti: “Ihehe, Ihehe, dhoropa guru Bhabhurona, dhoropa rakagwinya! Ngokuti ngo nguva imwe kutongwa kwako kwakugumira.”

¹¹ No vatengesi vo nyika vanomuchemera no kumurijira mbhere, ngokuti apana mundhu uchazotenga mijiyo yavo;

¹² mujiyo yavo, mukore no sirivha, no mapuwe ano mutengo mukuru, no usanga, no machira akanaka orukangaza, no akapshukuruka, no osirivha, no akapshuka; no mbewu jese jo miti yo mishizha, no mbewu jese jo mijiyo yo nyanga jo njou, no mbewu jese jo mijiyo zvakaitwa ngo miti ino mutengo mukuru, no zvithusi, no zvo utare, no mapuwe akachena.

¹³ No sinamoni, no muamomona, no mutombo wo kupisa uno gwema, no mafuta okuzora, no maka no vhini, no mafuta, no upfu wakacheta, no koroni, no n'ombe, no mabvuta; no mujiyo jo mahachi, no jo ngoro, no jo hloko, no jo mweya yo vandhu.

¹⁴ No michero yaiemurihwa ngo mweya wako yakabva kwouri, no zviro zvese zvainakisisa, no zvain'anikira zvakabva kwouri, no vandhu avachazozvivonizve.

¹⁵ Vatengesi vo izvi vakayita maguruja ndiye, vanozoyima ndhambo ngokutya dambujiko rake, vechichema no kurija mbhere.

¹⁶ Vechiti: Ihehe, ihehe, dhoropa guru raipfeka machira akanaka orukangaza naakapshukuruka, no akapshuka, rakanemeswa ngo mukore no mapuwe ano mutengo mukuru no usanga!

¹⁷ Ngokuti ngo nguva imwe upfumi hwakakura kudaro hwaparajwa. No nduna jese jo ngarava, navo vese vaihluza kuenda nokuti ngo kwapi, no vahluzi, navo vese vairarama ngo kushanda mujombe, vakayima vari ndhambo,

¹⁸ vakadanijira vechiringira usi wo kupsha kwake vechiti: Ngo rapi dhoropa ringaezaniswa no iri dhoropa guru?

¹⁹ Navo vakakandira bukuta panyezuru pomusoro yavo, vakadanijira vechichema no kurija mbhere, vechiti: Ihehe, ihehe, dhoropa guru mwovakaita maguruja vese vayiva no ngarava javo mujombe ngo zvinokosha zvake! Ngokuti ngo mukuvo mudoko wakaparajwa.

²⁰ Dakaranyi ngo ndava yake, iwewe denga, nemwi vakacheneswa, nemwi vapostori, nemwi vaprofeti; ngokuti Mwari wakamutongera kutonga kwenyu.

²¹ No ngirosi ino simba yakamiruja buwe ro gwiyo rakakura, ikarikandira mujombe, yechiti: “Ngokuwa kwakakura kudaro Bhabhurona, dhoropa guru, rinozokandihwa pasi, arichazovoneki no padodoko.”

²² No izwi ro variji vo zvidyangari, no ro vaembi, no ro vanorija minanzi, no revariji vo mbhayapaya, arichazozwiki mukati mwako, mbewu jo mishando, pikija ngouri ajichazovapo no padodoko mukati mwako; no izwi ro kukwiya arichazozwiki no padodoko mukati mwako;

²³ no kujeka kwo chibani akuchazojeki mukati mwako; no izwi ro mukwambo no ro murovohwa arichazozwiki mukati mwako, ngokuti vatengesi vako vayiva vazvare vo nyika, ngokuti majinja ese akachengejehwa ngo kuroya kwavo.

²⁴ No mukati mwake mwakavoneka ngazi yo vaprofeti no yo vakacheneswa, no yo avo vese vayinga vakaurawa mu nyika.