Chakapangijihwa 17 - NOVO TESTAMENTO EM NDAU

Hure huru no chikara

¹ Yakaviya imwe yo ngirosi nomwe jayiva no mikheyo minomwe, ikavereketa neni, yechiti: “Viya pano, ndinozokupangijira kutongwa kwo hure huru inogara pakumwa zhinji.”

² Yovakaomba nayo majimambo onyika, no vanogara mu nyika vakarejera ngo vhini ro kuomba kwayo.

³ Nayo yakanditora kuenda neni mubani mu mweya, ndakavona mwanakaji wakagara panyezuru po chikara chakapshuka, chakazara ngo mazina okutuka, china musoro minomwe no nyanga jiri gumi.

⁴ No mwanakaji wakasimira zvakapshukuruka no zvakapshuka, no kunemeswa ngo mukore no mapuwe ano mutengo mukuru, no usanga, munyara mwake mwayiva no shani yo mukore yakazara ngo zvinonyangaja, zvina svina yo kuhura kwake.

⁵ No pa huma pake pakatahwa zina, rokuti: CHAKAFISHIKA, BHABHURONA GURU, MAI WO MAHURE NO ZVINONYANGAJA ZVO NYIKA.

⁶ Neni ndakavona mwanakaji arejera ngo ngazi yo vakacheneswa, yo zvapupu zva Jesu. Naapo ndakamuvona, ndakashama ngo kushamiswa kukurutu.

⁷ No ngirosi yakati kwendiri: Washamiswa ngenyi? Ndinozokubvunja chakafishika cho mwanakaji, no chochikara, chinomutwara, chino musoro munomwe no nyanga jiri gumi.

⁸ Chikara chowavona chayivapo, apachina, choda kukwira kubva murindi rakajikisisa, no kuenda mukurashwa. Naavo vanogara mu nyika, mazina avo asikazivi kutahwa mutshamba yo kupona kubvira mukusikwa kwo nyika, vanozoshamiswa apo voovona chikara chayivapo, kuti achisipo, nokuti chichazoviya.

⁹ Ndipo pano kupinimija kuno ungwaru, musoro minomwe iri matundhu manomwe, anogahwa ngo mwanakaji:

¹⁰ Aripo majimambo manomwe; mashanu akawa, no umwe uchiripo, no umwe uchaviya; naapo aviya kunosisira kuti agare mukuvo mudoko.

¹¹ No chikara chayivapo, nazvino achisipo, chiri cho chisere, chimwe cho zvinomwe; chinoenda mukurashwa.

¹² No nyanga jiri gumi jo wavona, jiri majimambo ari gumi asati aashira umambo; asi anoashira simba kudari ngo majimambo pamwepo no chikara nguva imwe.

¹³ Ao anomupinimijo umwe, anopa simba rao no kutonga kwao kuchikara.

¹⁴ Anoambana no Bvuta, no Bvuta rinozoanyisa, ngokuti uri Mambo wo majimambo no Mutongi wo vatongi, naavo vanaye vanodanijwa, no kutsananguhwa, no kugondeka.

¹⁵ Nayo yakati kwendiri: Kumwa yo wavona, apo panogara hure, ndivo vandhu, no zviunga, no majinja, no ndimi.

¹⁶ No nyanga jiri gumi jo wavona, no chikara, zvinozonyenya hure, zvinozomuparaja, kuti ave mitu, zvinozoha nyama yake, zvimupise ngo muriro.

¹⁷ Ngokuti Mwari wakadira izvi mumwoyo yavo kuyita kuda kwake, nokuva no mupinimijo umwe, nokupa umambo hwazvo kuno chikara, kumbhera mazwi a Mwari aitike.

¹⁸ No mwanakaji wo wavona uri dhoropa guru iro rinotonga panyezuru pomajimambo onyika.