Chakapangijihwa 16 - NOVO TESTAMENTO EM NDAU

Mikheyo yo ushungu hwa Mwari

¹ Neni ndakazwa izwi guru rechibva muthemperi rechiti, kuno ngirosi nomwe: “Endanyi mwodururira mikheyo minomwe yo ushungu hwa Mwari mu nyika.”

² No yokutanga yakaenda, ikadurura mukheyo wayo mu nyika; kwakavapo mavonje akashata naanohwaja panyezuru po vandhu vayiva no chivoniso chechikara, vakadira muezaniso wacho.

³ No yochipiri yakadururira mukheyo mujombe; rakaita ngazi inonga yo mundhu wakafa; no zviro zvese zvayiva mujombe zvakafa.

⁴ No yochitatu yakadururira mukheyo wayo mumurambo no zvinyuka zvo kumwa, nazvo zvakaita ngazi.

⁵ Ndakazwa ngirosi yo mukumwa, yechiti: “Wakarurama, iwewe uripo no waindovapo, iwewe Wakachena, ngokuti wakatonga kudaro.

⁶ Ngokuti vakaparaja ngazi yo vakacheneswa no yo vaprofeti, wakavapa ngazi kuti vamwe; ngokuti vanosisihwa ndizvo.”

⁷ Ndakazwa izwi rechibva paaltari rechiti: “Eya, A Mwari Unosimbarese, zvitongero zvako zvino gwinyiso no kururama.”

⁸ No yo chirongomuna yakadururira mukheyo wayo panyezuru po zuva; rakapuwa simba ro kupisa vandhu ngo muriro.

⁹ No vandhu vakapiswa ngo kupisa kukurutu: Vakatuka zina ra Mwari uno simba panyezuru po aya matambujiko. Avazivi kutenderuka kuti vamukuje.

¹⁰ No yochishanu yakadururira mukheyo wayo panyezuru po dendemaro rechikara; no umambo hwacho hwakasvipiswa, vakachenga marurimi avo ngo ndava yo kuhwajihwa kwavo.

¹¹ Vakatuka Mwari wo mugore ngo ndava yo kuhwajihwa kwavo, no mavonje avo; avazivi kutenderuka kubva kumishando yavo.

¹² No yochitandhatu yakadururira mukheyo wayo panyezuru po murambo mukuru, Ufrati: No kumwa yawo yakapwa, kuti njira inasirihwe yo majimambo aibva kumabvazuva

¹³ Ndakavona mweya mitatu yakasvipiswa yakadari ngo machehe, yechibuda mumiromo wo dragoni no wo chikara, no wo muprofeti wo kunyepa.

¹⁴ Ngokuti ndiyo mweya yo mabzoka inoita mivoniso, inobuda kuenda kumajimambo onyika jese, kuaunganija pamwepo kuenda ku imbi yo zuva guru ra Mwari Unosimbarese.

¹⁵ Vonayi, ndinoviya kudari ngo mbavha, unomuchena unorinda no kungwarira zvo kusimira zvake, kuti asazofamba ari mitu, no vandhu vavone kupsheruka kwake.

¹⁶ Nayo yakavaunganija pamwepo kundau inozwi ngo chihebheru, Hamagedhoni.

¹⁷ No yochinomwe yakadururira mukheyo wayo mumweya; kwakabuda izwi guru muthemperi, rechibva kudendemaro, rechiti, zvapera.

¹⁸ Kwakavapo kurazva kwo mbheni, no mazwi no kutindhira, kwakavapozve kuzungunyika kukurutu kwo nyika, kusikazivi kumbovapozve kwakadaro kubvira pakusikwa kwo vandhu panyika, no kuzungunyika kwakakura kwo nyika kwakadari.

¹⁹ No dhoropa guru rakaguhwa kuyita marupande matatu, no madhoropa ovomajinja akawa: No Bhabhurona guru rakacherechejwa pamberi pa Mwari, kuti ripuwe tsani yo vhini rokutyisa kwo ushungu hwake.

²⁰ No zvirundu zvese zvakatiza, no matundhu aazivi kuvonekazve.

²¹ No matarara makuru akabva mugore akawira panyezuru po vandhu no kurema kwao inga kwakadari ngo tarenta, no vandhu vakatuka Mwari ngo ndava yo dambujiko ro matarara; ngokuti dambujiko rao inga rakakura kakurutu.