Chakapangijihwa 14 - NOVO TESTAMENTO EM NDAU

Nduyo yo vakasaniwa

¹ Neni ndakaringira, ndikavona Bvuta rakayima pa dundhu ro Zioni, rinavo vari zana no makumi marongomuna na marongomuna wo zviuru (144.000), vano zina rake, no zina ra Baba wake rakatahwa pa huma javo.

² Ndakazwa izwi rakabva mugore rinonga chaungu cho kumwa zhinji, no izwizve ro kutindhira kukurutu: No izwi rendakazwa rayinga rakadari ngo ro variji, vechirija zvidyangari zvavo.

³ Navo vanoimba inonga nduyo ipsha pamberi po dendemaro no pamberi po zvisikwa zvirongomuna zvinopona, no pamberi po vakuru. Apana mundhu waikona kujija nduyo iyo kwega avo vari zana no makumi marongomuna no marongomuna wo zviuru (144.000), vakatengwa mu nyika.

⁴ Ava ndivo vasikazivi kujisvipisa ngo vanakaji, ngokuti vakadari ngo mbhandwe. Ndivo vanotevera Bvuta kwese kwo rinoenda. Vakatengwa pakati po vandhu kuti vayite mitanguro kuna Mwari no ku Bvuta.

⁵ No mumiromo yavo amuzivi kuvoneka kunyepa. Avana ndava pamberi po dendemaro ra Mwari.

Masoko o ngirosi ndhatu

⁶ Neni ndakavona ngirosi imweni yechimburuka pakati po denga, ino vhangeri ro mbhera narini, kuchumayira kwavari vanogara mu nyika, no ku majinja ese, no marusinga ese, no kundimi jese, no ku vandhu vese.

⁷ Yechiti ngo izwi guru: “Mutyenyi Mwari, mumukuje, ngokuti mukuvo wo kutonga kwake waguma; mumudire uwo wakayita denga, no nyika, no jombe, no zvinyuka zvo kumwa.”

⁸ No imweni ngirosi yochipiri yakatevera, yechiti: “Rawa, rawa, Bhabhurona guru, rakaita kuti majinja ese amwe vhini ro ushungu hwo kuomba kwaro.”

⁹ No ngirosi yechitatu yakajitevera, yechiti ngo izwi guru: “Kuti aripo mundhu unodira chikara no muezaniso wacho, no kuashira chivoniso pa huma yake, nokuti pa nyara yake,

¹⁰ iye unozomwa vhini ro ushungu hwa Mwari, rinonasirihwa risikazivi kuvhenganijwa mutsani yo ushungu hwake; naye unozotambujwa ngo muriro no sorufa pamberi po ngirosi jakachena no pamberi po Bvuta.”

¹¹ No usi wo kutambujwa kwavo unozopwititika mbhera narini, navo avana kuzorora masikati no usiku vanodira chikara no muezaniso wacho, no uwo unoashira chivoniso cho zina racho.

¹² Pano ndipo pano kusengerera kwo vakacheneswa, vanongwarira mipango no kugonda kuna Jesu.

¹³ Ndakazwa izwi rechibva mugore, rechiti: “Tara: Vanomuchena vakafa, vanofira kuna Mambo, kubvira zvinopano.” Eya unonanga Mweya, kuti: “Vazorore kubva kumishando yavo, ngokuti mishando yavo inovatevera.”

Kukotora muvhini munyika

¹⁴ Ndakaringira, ndikavona gore rakachena no panyezuru po gore ndakavona umwe wakadari ngo Mwana wo Mundhu, echigara apo, ano junguja ro mukore pa musoro wake, no munyara mwake ano sikeyo inopinja.

¹⁵ No ngirosi imweni yakabuda, muthemperi yechidanijira ngo izwi guru kwaari wakagara panyezuru po gore, yechiti: “Tuma sikeyo yako, ucheke, ngokuti mukuvo wo kucheka waguma; ngokuti zvokukotora zvo nyika zvayibva.”

¹⁶ No uwo wakagara panyezuru po gore wakakandira sikeyo yake no nyika, yakakotohwa.

¹⁷ No ngirosi imweni yakabuda muthemperi riri mugore, nayo yayiva no sikeyo inopinja.

¹⁸ No imweni ngirosi yakabuda kubva paaltari, ino simba panyezuru po muriro; yakadanijira ngo izwi guru kuno iyo ina sikeyo inopinja, yechiti: “Tuma sikeyo yako inopinja, uunganije zvikore zvo mivhini yo nyika; ngokuti mavhini ayo aibva aembho.”

¹⁹ Ngirosi yakakandira sikeyo yayo mu nyika, ikaunganija mavhini onyika, ikaakandira muchisviniro cho vhini, cho ushungu hwa Mwari.

²⁰ No chisviniro cho vhini chakatsikwatsikwa kunja kwo dhoropa, kwakabuda ngazi kubva muchisviniro cho vhini, ikagumira kumatomu omahachi, no kureba kwayo kwayita makiromitha mazana matatu (300).