Chakapangijihwa 13 - NOVO TESTAMENTO EM NDAU

Zvikara zviviri

¹ Ndakayima panyezuru po musanga wo jombe. Ndakavona chikara chechibuda mujombe, chino nyanga jiri gumi, no musoro munomwe, no panyezuru ponyanga yacho payiva no majunguja ari gumi, no panyezuru po musoro yacho payiva no mazina okutuka Mwari.

² No chikara chendakavona inga chakadari ngo khamba, no tshoka jacho jayiva jakadari ngo beya, no muromo wacho wayinga wakadari ngo wo mbhondoro; no dragoni rakachipa simba raro, no dendemaro raro, no kupanga kukuru.

³ Ndakavona umwe wo musoro wacho, kudari inga wakarohwa mbhera ufe; no vonje rokufa kwacho rakapora: No nyika yakashamiswa ngo ndava yo chikara,

⁴ navo vakadira dragoni ngokuti ndiro rakapa chikara simba raro; vakadira chikara, vechiti: Ndiyani ungaezaniswa no chikara? Ndiyanizve uno simba ro kurwa nacho?

⁵ Chakapuwa muromo wo kuvereketa zvakakura no kutuka; chakapuwazve simba rokuti chiite mishando yacho mweji iri makumi marongomuna na miviri.

⁶ Nacho chakabewura muromo wacho kutuka Mwari, no kutuka zina rake, no tende rake, navo vanogara mugore.

⁷ Chakapuwazve kuambana no vakacheneswa, no kuvanyisa, chakapuwazve simba panyezuru po marusinga ese, no vandhu, no ndimi, no majinja,

⁸ vese vanogara panyezuru po nyika vanozochidira, vano mazina asikazivi kutahwa mubhuku ro kupona ro Bvuta rakaurawa kubvira mukuemeswa kwo nyika.

⁹ Kuti aripo uno njeve ngaazwe.

¹⁰ Kuti aripo unoda kukwevera mundhu mukusungwa, iye unozoendavo mukusungwa. Kuti aripo unouraya ngo shoti, iye unozourawavo ngo shoti. Pano ndipo panokusengerera no kugonda kwo vakacheneswa.

Chikara chakakwira kubva mu nyika

¹¹ Ndakavona chikara chimweni chechikwira kubuda mu nyika; chayiva no nyanga mbiri jakadari ngo jo bvuta, chakavereketa kudari ngo dragoni.

¹² Chinoshandisa simba ro chikara chokutanga mukuvona kwacho, chinoyita kuti nyika navo vanogaremwo vadire chikara chokutanga, chayiva no vonje ro kufa rakapora.

¹³ Chinoyita mivoniso mikuru, kuti murirozve ubzuke panyezuru po nyika wechibva mugore mukuvona kwo vandhu.

¹⁴ Nacho chinochengejera avo vanogara mu nyika, ngo ndava yo mishamiso yakapuwa kwechiri kuti chiite pamberi po chikara; chechinanga kwavari vanogara mu nyika kuti vayite muezaniso wo chikara, chakabaiwa ngo shoti chikapona.

¹⁵ Chakapuwa simba ro kupa mweya kumuezaniso wo chikara kuti muezaniso wechikara uite zvese, kuvereketa, no kuyita kuti vese vasikadiri muezaniso wo chikara vaurawe.

¹⁶ Chinoyita kuti vese vadoko no vakuru, no vapfumi, no varombo, no vakasununguka, no varanda, vapuwe chivoniso ku nyara yavo yo kumuho, nokuti pa huma javo;

¹⁷ zve kuti mundhu mumwe asazokona kutenga nokuti kutengesa kwega uwo uno chivoniso, kunoti zina rechikara, nokuti chiverengo cho zina racho.

¹⁸ Pano ndipo pano ungwaru. Iye unozwisisa ngaaverenge chiverengo cho chikara; ngokuti chiri chiverengo cho mundhu: No chiverengo chake chiri mazana matandhatu no makumi matandhatu na matandhatu (666).