Chakapangijihwa 12 - NOVO TESTAMENTO EM NDAU

Mwanakaji no dragoni

¹ No chivoniso chikuru chakaoneka mugore; mwanakaji akasimira zuva, no mweji uri pasi po tsoka jake, no panyezuru po musoro wake payiva no junguja ro ndhondo jiri gumi na mbiri.

² Wayiva no mimba, wakachema, echihwajihwa ngo kubereka, no kuhwajihwa ngo kusununguka.

³ No chivoniso chimweni chakavoneka mugore, vona; dragoni guru rakapshuka rino musoro minomwe no nyanga jiri gumi, no panyezuru pomusoro yaro no majunguja manomwe.

⁴ No mwishe waro unokweva rupande rwo chitatu rwo ndhondo jo mugore, rikajikandira panyika; no dragoni rakayima pamberi po mwanakaji wayinga woda kubereka, kuti rihe mwana wake aberekwa.

⁵ Naye wakabereka mwana, mwana wo rume, unozotonga majinja ese ngo ndonga yo simbi: No mwana wakakwijwa kuna Mwari, no kudendemaro rake.

⁶ No mwanakaji wakatizira mu bani, apo payiva no ndau yakanasirihwa ndi Mwari, kuti vamurere apo mazuva ari chiuru chimwe no mazana maviri no makumi matandhatu (1.260).

⁷ Kwakavapo kurwa mugore: Mikaeri pamwepo no ngirosi jake jechirwa no dragoni; no dragoni naro rakarwa pamwepo no ngirosi jaro.

⁸ Jakanyiswa, no ndau yajo aizivi kuchazovapo mugore.

⁹ No dragoni guru rakakandihwa pasi, iyo nyoka sharuka, inozozwi ndi Dhiabhorosi, na Sathani, muchengeji wo nyika yese; iye wakakandihwa pasi mu nyika, no ngirosi jake jakarashwa pasi pamwepo naye.

¹⁰ Neni ndakazwa izwi guru rechibva mugore, rechiti: “Zvino rwaguma ruponeso, no simba, no umambo, zva Mwari wedu no simba ra Kristu wake: Ngokuti mupumbhi wo hama jedu wakandihwa pasi, uwo unovaitira ndava pa mberi pa Mwari wedu masikati no usiku.”

¹¹ Navo vakamunyisa ngo ngazi yo Bvuta, na ngo izwi ro uchapupu hwavo; navo avazivi kuda kupona kwavo mbhera mukufa.

¹² Ndizvo dakaranyi imwimwi matenga, nemwi munogara mukati mwao. Ihehe ku nyika no kujombe; ngokuti Dhiabhorosi wakajaka kwomuri, ano ushungu hukurutu, ngokuti unoziva kuti nguva yake yaafupi.

¹³ Naapo dragoni rayinga ravona kuti rakakandihwa pasi, rakatambuja uwo mwanakaji wakabereka mwana wo rume.

¹⁴ Mwanakaji uwo wakapuwa mapapiro maviri ogoji guru, kuti amburuke kuenda mu bani kundau yake, paanorehwa mukuvo no mikuvo, no bindikati ro mukuvo kubva mu hope yo nyoka.

¹⁵ No nyoka yakabudisa kumwa mumuromo wayo kudari ngo murambo, sure kwo mwanakaji kuti atohwe ngo murambo.

¹⁶ No nyika yakabetsera mwanakaji, ikabewura muromo wayo, no kumija murambo, uwo wakabudiswa ngo dragoni mumuromo waro.

¹⁷ No dragoni rakachenekera mwanakaji, rakaenda, rikaambana no vamweni vana vake vanongwarira mipango ya Mwari, vechibata uchapupu hwa Jesu:

¹⁸ No dragoni rakayima panyezuru po musanga wo jombe.