Chakapangijihwa 11 - NOVO TESTAMENTO EM NDAU

Zvapupu zviviri

¹ Ndakapuwa njanga yakadari ngo mudondoro, kukazwi: “Muka, uende, upime kukura kwo themperi ra Mwari, no altari, naavo vanodiremwo.”

² Asi ruvanje ruri kunja kwo themperi ruregere, usaripima; ngokuti uhwo hwakapuwa kuno vo majinja: Navo vanozotsikatsika pasi ngo tshoka javo dhoropa rakachena mweji iri makumi marongomuna na miviri.

³ Ndinozopa simba kuzvapupu zvangu zviviri, kuti zviprofete mazuva ari chiuru no mazana maviri, no makumi matandhatu, (1.260) zvakasimira machira omasaku.

⁴ Ava vari miti muviri yo maorivhe, no zvigajikiro zviviri zvo zvibani zvinoyima pamberi pa Mambo wo nyika.

⁵ Kuti aripo mundhu unoda kuvaremaja, muriro unobuda kumuromo yavo wechiuraya mapandu avo; kuti aripo mundhu unoda kuvaremaja, ngo iyi njira kunosisira kuti aurawe.

⁶ Ava vano simba ro kukonya denga, kuti isazona mvura ngo mazuva okuprofeta kwavo, navo vano simba panyezuru po kumwa kuitsanduja kuti iite ngazi, no kurova nyika ngo matambujiko ese, ngo nguva jese jo vanoda.

⁷ Naapo vapeja uchapupu hwavo, chikara chinokwira kubva murindi rakajikisisa chinozoambana navo, no kuvanyisa, no kuvauraya.

⁸ No miviri yavo yakafa inozorashwa mugwanja ro dhoropa guru, rinozwi ngo kuezanisira kuti, Sodhoma no Egipite, paakakohomehwavo Mambo wavo.

⁹ Navo vanobva ku vandhu, no marusinga, no ndimi, no majinja, vanozoringira miviri yavo yakafa, mazuva matatu no bindikati vasikatenderi kuti miviri yavo yakafa ivigwe mu maiba.

¹⁰ Naavo vanogara mu nyika vanodakara ndivo, no kupembera; vanozotumirana zvipo umwe kwo umweni; ngokuti ava vaprofeti vaviri vakatambuja ava vanogara mu nyika.

¹¹ Ngosure kwo mazuva matatu no bindikati, mweya wo kurarama unobva kuna Mwari wakanghwina mukati mwavo, vakayima ngo tshoka javo; nokutya kukurutu kwakagumira avo vakavavona.

¹² Vakazwa izwi guru rechibva mugore, rechiti kwavari: Kwiranyi kuno. Vakakwira mudenga vari mugore; no mapandu avo akavaringira;

¹³ ngo iyo nguva kwayivapo kuzungunyika kukuru kwo nyika, no rupande rwo gumi rodhoropa rakawa vakaurawa vandhu vari zviuru zvinomwe (7.000) mukuzungunyika kwo nyika; no vamweni vakatya, vakairikija Mwari wo mugore.

¹⁴ Dambujiko ro chipiri rapinda, vona, dambujiko rechitatu rinokasira kuviya.

Mbhayapaya yo chinomwe

¹⁵ No ngirosi yo chinomwe yakarija mbhayapaya; kwakazwika izwi guru mugore rechiti: “Umambo hwo nyika hwayita hwa Mambo wedu, no hwa Kristu wake, naye unozotonga mbhera narini.”

¹⁶ No vakuru vari makumi maviri na varongomuna, vanogara pamberi pa Mwari, panyezuru pomadendemaro avo, vakawa ngo hope javo, vakadira Mwari,

¹⁷ vechiti: “Tinokubonga, A Mambo Mwari, Unosimbarese, uwo uripo, no wayivapo, ngokuti wakajitorera simba rako guru, ukatonga.”

¹⁸ No majinja akatseneka, no ushungu hwako hwakaviya, no mukuvo wo vakafa kuti vatongwe, no mukuvo wo kupa musharo kuno varanda vako vaprofeti, no kuvakacheneswa, no kwavari vanotya zina rako, vadoko no vakuru, no kuuraya avo vonoparaja nyika.

¹⁹ Themperi ra Mwari rakabewuhwa mugore; mwakavoneka muthemperi rake bhokisi ro chitenderano chake; kwakavapo mbheni, no mazwi, no kutindhira, no kuzungunyika kwo nyika, no matarara makurutu.