Chakapangijihwa 10 - NOVO TESTAMENTO EM NDAU

Bhuku doko

¹ Neni ndakavona ngirosi imweni yakagwinya yechibzuka kubva mudenga, yakafuka gore; no utawahumbe hwayiva panyezuru po musoro wayo, no hope yayo yayinga yakadari ngo zuva, no tshoka jayo jayiva jakadari ngo mirazvu yo muriro;

² inga yakabata munyara yayo chibhuku chakabeuka. Yakatsika tshoka yayo yo kumuho panyezuru po jombe, no yo kuboshwe panyezuru po nyika.

³ Yakadanijira ngo izwi guru, kudari ngo kurira kwo mbhondoro; naapo yadanijira, kutindhira kunomwe kwakatindhira.

⁴ Naapo kutindhira kunomwe kwayinga kwatindhira, ndayinga ndooda kutara, ndakazwa izwi rechibva mugore, rechiti: “Konya izvo zvakavereketwa ngo kutindhira kunomwe, usazvitara.”

⁵ No ngirosi yo ndakavona yakayima panyezuru po jombe no po nyika, yakamusa nyara yayo yo kumuho mugore,

⁶ ikapika ndiye unopona mbhera narini, uwo wakasika denga no izvo zvirimwo, no nyika no izvo zvirimwo, no jombe no izvo zvirimwo kuti kusachazovapo mukuvo wo kunonoka.

⁷ Asi Ngo mazuva o izwi ro ngirosi yo chinomwe, apo yayinga yoda kurija, ngo uwo mukuvo chakafishika cha Mwari chinozopera kudari ngo zvaakananga kuvaranda vake vaprofeti.

⁸ No izwi ro ndakazwa rechibva mugore, rakavereketazve neni, rechiti: “Endai utore chibhuku chakabeuka chiri munyara yo ngirosi yakayima panyezuru po jombe no panyezuru po nyika.”

⁹ Ndakaenda kuno ngirosi iyo, ndikati kweiri: “Ndipe chibhuku. Nayo yakati kwendiri, chitore, uchihe; kunozoita kuti ndani yako ivave, asi mumuromo wako chinozotapira kudari ngo uchi.”

¹⁰ Ndakatora chibhuku munyara yo ngirosi, ndakachiha mumuromo wangu chaitapira kudari ngo uchi; naapo ndakaha, ndani yangu yakavava.

¹¹ Jakati kwendiri, Kunosisira kuti uprofetezve ngo ndava yo vandhu vazhinji, no majinja, no ndimi no majimambo.