Chakapangijihwa 1 - NOVO TESTAMENTO EM NDAU

Manghwiniro no muchungamijo

¹ Chakapangijihwa cha Jesu Kristu, chaakapuwa ndi Mwari, kuti apangijire kuvaranda vake izvo zvinosisira kuitika ngo kukasira, naye wakatuma, akazvipangijira ngo ngirosi yake kumuranda wake Johani,

² uwu wakapupurira izwi ra Mwari no uchapupu hwa Jesu Kristu, hwo zvese zvaakavona.

³ Unomuchena uwo unojija, naavo vanozwa mazwi okuprofeta uku, no kungwarira zvakatahwa mukati mwao; ngokuti nguva yaaphedo.

⁴ Johani kuzviara zvinomwe zviri mu Aziya: Nyasha ngajive kwomuri no kunyarara, zvinobva kuna uwo uripo, wayivapo, no unoviya; nokubva kumweya minomwe iri pamberi po dendemaro rake;

⁵ nokubva kuna Jesu Kristu uri chapupu chakagondeka, ari dangwe ro kumuka kwo vakafa, no mutongi wo majimambo onyika. Kwaari wakatida, akatisunungura kuzvishaishi zvedu ngo ngazi yake,

⁶ akatiita vo umambo, no vapristi kuna Mwari Baba wake, kwaari ngakuve no uthende no kutonga mbhera narini. Ameni.

⁷ Vonanyi unoviya no makore, no majiso ese anozomuvona, naavozve vakamubaya no majinja ese onyika anozochumba ngo ndava yake. Eya, Ameni.

⁸ Ndiri Arifa na Omega, unonanga Jehovha Mwari, kudaro, Unosimbarese, pakutanga, zvino, no kunguva inoviya.

Kristu unojivonisa kuna Johani

⁹ Inini Johani, hama yenyu no shamwari yenyu mukutambujika no mu umambo, no kusengerera kuna Jesu, ndiri pa chirundu chinozwi Patimosi, ngo ndava yo izwi ra Mwari, no yo uchapupu hwa Jesu.

¹⁰ Ndayinga ndiri mu Mweya ngo zuva ra Mambo, ndakazwa sure kwangu izwi guru rinonga kurira kwo mbhayapaya,

¹¹ rechiti: “Icho chounovona, tara mutshamba, uitumire muzviara zvinomwe: Ku Efesu, ku Semerina, ku Perigamu, ku Tiyatira, ku Saridesi, ku Firadhefiya, no ku Raodhikiya.”

¹² Neni ndakakunukuka kuti ndivone izwi rakavereketwa kwendiri. Naapo ndakunukuka, ndakavona zvigajikiro zvo zvibani zvinomwe zvo mukore;

¹³ no pakati po zvigajikiro zvo zvibani ndakavona umwe wakadari ngo Mwana wo Mundhu, akasimira chokufuka chakaguma kutshoka, no diti rake rakasungwa ngo bhande ro mukore.

¹⁴ No musoro wake no bvuji rake zvakachena kudari ngo mabviri obvuta, zvakachena kudari ngo chando, no majiso ake akadari ngo murazvu wo muriro.

¹⁵ No tshoka jake jakadari ngo thusi rinon'anikira, apo rapiswa muchoto; no izwi rake raidari ngo chaungu cho kumwa yakawanda.

¹⁶ No munyara yake yo kumuho wayinga akabata ndhondo nomwe, no shoti inopinja ino upanga huviri yakabuda kumuromo wake, no hope yake yain'anikira kudari ngo zuva rinojeka ngo simba raro.

¹⁷ Naapo ndamuvona, ndakawa pa tshoka jake inga uwo wafa. Naye wakadira nyara yake yo kumuho panyezuru pangu, echiti: “Usatya; ndiri Muambi no Mugumisiri,

¹⁸ ndiri iye unopona, inga ndafa vonayi ndinopona mbhera narini, neni ndino zvavhi zvo kufa no wo Haidhesi.

¹⁹ Ndizvo tara zviro zvo wavona, no zviripo, no zvinozoitika sure kwa izvi,

²⁰ no chakafishika cho ndhondo nomwe jowavona munyara yangu yo kumuho, no zvigajikiro zvo zvibani zvinomwe zvo mukore. Ndhondo nomwe, ingirosi jo zviara zvinomwe, no zvigajikiro zvo zvibani zvinomwe zviri zviara zvinomwe.”