3 Joh. 1 - NOVO TESTAMENTO EM NDAU

Muchungamijo

¹ Musharuka kuna Gaiyo unodikana wo ndinoda ngo gwinyiso.

² Unodikana, ndinokukumbira kuti ngo zviro zvese ubudirire ugwinye, kudari ngo zvo unobudirira mweya wako.

³ Ngokuti ndakadakara kukurutu, apo hama jakaviya jechipupura ngo gwinyiso rako, kudari ngo zvo unofamba mugwinyiso.

⁴ Andina kudakara kunopinda kukura kuno uku, kuzwa ngo kufamba kwo vana vangu mugwinyiso.

Vabesejeri no varwisi mukuchumaira gwinyiso

⁵ Unodikana unoyita mushando unogondeka, ngo izvo zvo unoitira hama no vapfumba;

⁶ avo vakapupura ngo rudo rwako pamberi po chiara: Uchanasa kuti wechivaperekeja mumuhambo wavo ngo njira inosisira Mwari;

⁷ ngokuti ngo ndava yo iro zina, vakabuda kuenda, vasikatori chiro kubva kuno vo majinja.

⁸ Ndizvo tinosisira kuashira vakadaro, kuti tiite vashandi pamwepo navo mugwinyiso.

⁹ Ndakatarira zvakatikuti kuchiara, asi Dhiotrafesi, uwo unoda kuyita mukuru pakati pavo, aatiashiri.

¹⁰ Ndizvo, kudari ndechiviyeyo, ndinocherecheja mishando yake yaanoita, echitireva ngo mazwi akashata; asikakwaniswi ngo ukwo, zve, iye pachake aashiri hama, naavo vanoda kuvaashira, unovarambija, no kuvambirimbija muchiara.

¹¹ Vanodikana, musaejerera icho chakashata, asi icho chakanaka. Iye unoyita zvakanaka ngo wa Mwari; asi uwo unoyita zvakashata aazivi kumuvona Mwari.

¹² Dhemetriyo unopupurihwa ngo vandhu vese, na ngo gwinyiso pacharo naro; eya, nesu tinopupuravo, newe unoziva kuti uchapupu hwedu huno gwinyiso.

Mazwi okupejisira

¹³ Ndina zvizhinji zvo kutara, asi andidi kuti ndizvitare kwomuri ngeinki no peni:

¹⁴ Asi ndinogonda kuti ndinokasira kukuvona, nesu tinozovereketa kupingurana ngo muromo.

¹⁵ Kunyarara ngakuve kwouri. Shamwari jedu jinokutambisa. Chungamija shamwari imwe ngaimwe ngo zina rayo.