2 VaTes. 3 - NOVO TESTAMENTO EM NDAU

Mukumbiro no kugonda

¹ Pakugumisira, hama, tikumbirirenyi kuti izwi ra Mambo riparajihwe no kukuriswa, kudari ngo zvorinoitazve kwomuri;

² zve kuti tinunurihwe kubva ku vandhu vasikazivi kururama no vakashata; ngokuti andivopi vese vanokugonda.

³ Asi Mambo unogondeka; unozomugwinyisa, no kumungwarira kubva kuno uwo wakashata.

⁴ Nesu tine gonda kuna Mambo ndimwi, kuti munoita, munozoyitazve zvotinomupanga.

⁵ Mambo ngaatungamirire mwoyo yenyu kuno rudo rwa Mwari, no kuno kusengerera kwa Kristu.

Kunodikana kushanda

⁶ Zvino tinomupanga, hama, ngo zina ra Mambo wedu Jesu Kristu, kuti mupauke kubva kuno hama yese ine nungo, isikafambi kudari ngo mipango yo mwakaashira kwetiri.

⁷ Ngokuti imwimwi pachenyu munoziva njira yo kutitevejera ndiyo isisu, ngokuti atizivi kuyita nungo pakati penyu;

⁸ zve, atizivi kuha chimanda cho mundhu nokuti ngouri tisikazivi kuchitenga, asi takashanda techitambujika usiku no masikati kuti tisazoita mutwaro kuno umwe wenyu;

⁹ haiwa kwokuti atina simba, asi kujiita chivonero, kuti imwimwi mutitevejere.

¹⁰ Ngokuti apo tichinemwi takamupanga, kuti, kudari aripo mundhu usikadi kushanda, asazohazve.

¹¹ Ngokuti tinozwa kuti vamweni vanofamba pakati penyu vano nungo, vasikashandi, asi vari vanokangaija vamweni.

¹² Zvino avo vakadaro tinovapanga no kuvapota ndi Mambo Jesu Kristu, kuti vashande ngo kunyarara, vahe chimanda chiri chavo.

¹³ Asi imwimwi, hama, musazoremba kuyita zvakanaka.

¹⁴ No kudari aripo mundhu usikapurutani izwi redu ngo iyi tshamba, muringisisenyi mundhuwo, kuti musazwana naye, kuti iye apsheruke.

¹⁵ Musazomuverenga kuti ibandu, asi mumupange kudari ngo hama.

Muchungamijo yokugumisira

¹⁶ Zvino Mambo wo kunyarara wambwine ngaamupe kunyarara ngo nguva jese, na ngo njira jese. Mambo ngaave nemwi mwese.

¹⁷ Kutambisa kwangu inini Pauri ngo nyara yangu, ukwo kuri chivoniso kutshamba jese; ndizvo ndinotara kudaro.

¹⁸ Nyasha ja Mambo wedu Jesu Kristu ngajive nemwi mwese. Ameni!