2 VaK. 9 - NOVO TESTAMENTO EM NDAU

Kubesera vakristu vamweni

¹ Ngokuti azvisisiri kuti nditare kwomuri ngo ndava yo kukovera vakacheneswa;

² ngokuti ndinoziva kutendera kwenyu, kwondinoganza ndikwo ndimwi, kwavari vo Makedhoniya, kwokuti vo Akaya vakapeja kunasirira mwokoha; no kuchungirira kwenyu kwakamusa vazhinji vavo.

³ Asi ndakatuma hama, kuti kuganza kwedu ndimwi kusazoita kusina shwiro ngo iyi ndava; kuti muite vakanasirira kudari ngo zvondakananga,

⁴ kuti kusazoitika, nokuti ngeiri njira, kudari vechiviya neni vamweni vo Makedhoniya, vamuwane musikazivi kunasirira, isisu (ndisikanangi imwimwi), tipsherujwe ngo kugonda uku.

⁵ Ndizvo ndaipinimija kuti kwaisisira kunyengerera hama kuti jitange pamberi kuviya kwomuri, vanasirire kutanga zvakawanda zvenyu zvo mwakagondisa ngo pamberi, kuti izvo zvinasirihwe kuti zviite chidakajiso, andikwopi kwo kuemura.

⁶ Asi ndinonanga izvi: Iye unokusha zvishoma unozokotorazve zvishoma; no uwo unokusha zvakawanda, unozokotorazve zvakawandisisa.

⁷ Mundhu wese ngaaite kudari ngo zvaakaemesera mumwoyo mwake; haiwa ngo ushungu, nokuti ngo kuvangirijwa, ngokuti Mwari unoda unopa ngo kudakarira.

⁸ Na Mwari une simba ro kumuwanjira zvipo zvese; kwokuti imwimwi mwechikwaniswa ngo zviro zvese ngo nguva jese, muwanje kuyita mishando yese yakanaka,

⁹ kudari ngo zvakatahwa: (Iye wakakovera, wakapa varombo; kururama kwake kunozogara mbhera narini).

¹⁰ Iye unopa mukushi mbewu, no chimanda chokuha, iye unozomupa no kuwanja mbewu jenyu jo kukusha, no kuwanja michero yo kururama kwenyu;

¹¹ kuti imwimwi mwechipfumiswa ngo zviro zvese, mupe ngo kusununguka kwese, no kushanda kubudikija ndisu kuti Mwari abongwe.

¹² Ngokuti uku kukovaniswa kwo mushando uwu, akupeji kutama kwese kwo vakacheneswa, asi kunowandisazve kubonga kuzhinji kuna Mwari.

¹³ Kwechivoneka kuti ngo kuejwa kwenyu ngo uwu mushando, ivo vanoirikija Mwari ngo ndava yo kupurutana kwo kutenda kwenyu vhangeri ra Kristu na ngo ndava yo kuwanda kwo zvipo zvenyu kwavari, no kuna vese.

¹⁴ Apo ivo vambhwine, ngo kumukumbirira, vano chisuwo ngo ndava yo nyasha huru ja Mwari jiri mukati mwenyu.

¹⁵ Ngaabongwe Mwari ngo chipo chake chisikabviri kunangwa.