2 VaK. 8 - NOVO TESTAMENTO EM NDAU

Kupa kwo vakristu

¹ Ndizvozve, hama, tinomuzivisa ngo nyasha ja Mwari jakapuwa kuzviara zviri mu Makedhoniya;

² kuti, mukuejwa kukuru kwo kutambujika, no uwandu hwokudakara kwavo, no kujika kwo urombo hwavo, zvakawandisa upfumi hwo kupa kwavo.

³ Ngokuti ndinoita chapupu ndivo, kuti kudari ngo zvovaikona, eya, no kupinda zvovaikona, vakapa ngo kuda kwavo.

⁴ Vechitipota ngo kunyengerera kukuru, kuti tiashire ichi chipo no ukama mukushandira vakacheneswa.

⁵ Navo vakayita ichi, chisiripi chotaigarira, asi kutanga vakajipira ngo kwavo kuna Mambo, no kwetirizve ngokuda kwa Mwari.

⁶ Ngokudaro kudari ngo zvotakakumbira Titosi, kuti iye kudari ngo zvayinga aamba, ngokudaro apejisevo kwomuri iji nyasha.

⁷ Ndizvo kudari ngo zvo munowandisa kune zviro zvese, mukugonda, no mukuvereketa, mukuziva, no mukutsamwirira kwese, ngo rudo rwenyu kwetiri, ringiranyi kuti muwanjezve kune iji nyasha.

⁸ Andivereketi ngo kumupanga, asi ngo kutsamwirira kwevamweni kuti ndieje gwinyiso ro rudo rwenyuzve.

⁹ Ngokuti imwimwi munoziva nyasha ja Mambo wedu Jesu Kristu, kuti pikija iye wayiva mupfumi, asi ngo ndava yenyu wakayita murombo, kuti imwimwi ngo urombo hwake muite vapfumi.

¹⁰ Kune izvi ndinonanga mavonero angu; ngokuti izvi zvakamunakira imwimwi, mwakatangira vamweni mwokoha, musikateveji kuyita kwega, asi kuva no kuda kwokuyita.

¹¹ Asi zvino pejisanyizve kuzviita; kuti kudari ngo zvo kwayivapo kuda kwokuyita pejisanyizve po munokona ndipo,

¹² Ngokuti kudari kuripo kuda kwokuyita, kuri kunoashirika kudari ngo zvaanazvo mundhu, haiwa kudari ngo zvaasina.

¹³ Ngokuti andinangi izvi kuti vamweni varerukihwe, nemwi mwechitambujika;

¹⁴ asi ngo kuezanisa; kuti kuwandihwa kwenyu ngo nguva iyi kukwanise kutama kwavo, kuti kuwanda kwavozve kukwanise kutama kwenyu; kuti kuvapo kuezanisana.

¹⁵ Kudari ngo zvakatahwa: “Iye wakaunganija zvakawanda aazivi kusara no chiro; no uwo wakaunganija zvishomani aazivi kutama chiro.”

Vabeseri va Pauri

¹⁶ Asi ngaabongwe Mwari uwo wakadira mu mwoyo mwa Titosi ukwo kutsamwirira ndimwi.

¹⁷ Ngokuti ngo gwinyiso iye wakazwa kupota kwedu; asi iye ambhwine, echichungirira kakurutu, wakabuda kuenda kwomuri ngokuda kwake.

¹⁸ Nesu takatuma pamwepo nayo hama iyo yaitendwa kuzviara zvese;

¹⁹ andizvopi zvega, asi uri uwo wakaemeswazve ngo zviara kuti afambe nesu ngo ndava yo ichi chipo chinoshandwa ndisu, kuyita kuti Mambo airikijwe, no kupangijira kutendera kwedu.

²⁰ Techingwarijira kuti mundhu asatiitira ndava ngo uwandu hunoshandwa ndisu;

²¹ ngokuti tinongwarijira kuti zviite zvinoreremejeka, haiwa kwega mukuvona kwa Mambo, asi no mukuvona kwo vandhuzve.

²² Nesu takatuma pamwepo navo hama yedu, yotakaeja nguva zhinji tikavona kuti inochungirira ngo zviro zvizhinji, asi zvino iri inopindisisa kuchungirira, ngo ndava yo gonda guru roinaro kwomuri.

²³ Kudari aripo unobvunjisa ndi Titosi, uri mubeseri wangu no mudoni wangu mumushando unoitwa kwomuri; nokuti vechibvunjisa ngo ndava yo hama jedu, jiri ndhumwa jo chiara, no jo uthende hwa Kristu.

²⁴ Ndizvo pangijiranyi kwavari chivoniso cho rudo rwenyu, no cho kuganza kwedu ndimwi, mukuvona kwo zviara.