2 VaK. 7 - NOVO TESTAMENTO EM NDAU

¹ Ndizvo vanodikana, kudari ngozvotinazvo izvi zvigondiso, ngatijichenese kubva kwo zvinosvipisa zvese zvo nyama no zvo Mweya, techiperera mukucheneswa mukutya Mwari.

Kudakara kwa Pauri ngo Korinte

² Tiashirenyi ngo rudo; atizivi kushaishira mundhu, atizivi kusvipisa mundhu, atizivi kupunya mundhu.

³ Andinangi izvi kumuitira ndava; ngokuti ndakananga kare kuti muri vo pa mwoyo yedu, kuti tife pamwepo no kupona pamwepo.

⁴ Kuvereketa kwangu kwomuri kuri kwo kushinga kukurutu, no kuganza kwangu ndimwi kukuru: Ndinozara ngo kuembezehwa, ndinodakara kakurutu mukutambujika kwedu kwese.

⁵ Ngokuti taguma Makedhoniya, nyama yedu aizivi kuva no kuzorora, asi takatambujwa kumativi ese; ngo kunja kwaiveyo kuambana, ngo mukati kwaiveyo kutya.

⁶ Asi uwo unoembezera vakasvipa mwoyo, ndi Mwari, iye wakatiembezera ngokuguma kwa Titosi;

⁷ haiwa ngokuguma kwake kwega, asizve ngo kuembezehwa kwaakaembezehwa ndikwo ndimwi, achitiverengera ngo chisuwo chenyu, no kudemba kwenyu, no kushingirira kwenyu ngo ndava yangu ndizvo ndakapindisisa kudakara.

⁸ Ngokuti pikija ndakamusururisa ngo tshamba yangu, andithimwi-thimwi ndizvo pikija ndakathimwa-thimwa ndizvo ngokuti ndinovona kuti iyo tshamba yakamusururisa, asi kwega kwo mukuvo mufupi.

⁹ Zvino ndinodakara, haiwa ngokuti mwakasururiswa, asi kuti mwakasururiswa kwokuti mutenderuke; ngokuti mwakasururiswa ngo ndava ya Mwari, kuti musarashikirwa ngo chiro ndisu.

¹⁰ Ngokuti kusururika kunobva kuna Mwari kunovisa kutenderuka kwo kuponeswa, kuri kutenderuka kusina kusururika; asi kusururika kwo mu nyika kunopara kufa.

¹¹ Ngokuti vonanyi ichi chiro kuti imwimwi mwakasururiswa ngo njira ya Mwari! Kwakashandwa kutsamwirira kwakaitawani kukura mukati mwenyu? Eya no kujirwira, no kunengwa, no kutya, no chisuwo, no kushingirira, no kuhwirijira! Ngo zviro zvese mwakajipangijira kuti muri vasina ndava kune izvi.

¹² Ndizvo pikija ndakatara kwomuri, andizivi kutara ngo ndava yo uwo wakayita kushata ukwo, nokuti ngo ndava yo uwo wakashaishihwa, asi kuti kutsamwirira kwenyu ngo ndava yedu kupangijihwe kwomuri pamberi pa Mwari.

¹³ Ndizvo takaembezehwa. No mukuembezehwa kwedu takadakara kukurutu aembho ngo ndava yo kudakara kwa Titosi, ngokuti mweya wake wakagwinyiswa ndimwi mwese.

¹⁴ Ngokuti kudari chaivapo chiro chondakaganza kwaari ndimwi, andizivi kupsheruka; asi kudari ngo zvotakavereketa zviro zvese kwomuri ngo gwinyiso, kwakadarozve no kuganza kwedu, kwendakaita pamberi pa Titosi, kwakavoneka kuti kune gwinyiso.

¹⁵ No rudo rwake rwo mwoyo unopinda kuwanjwa kwomuri, apo okarakaja ngo kupurutana kwenyu mwese, kuti mwakamuashira ngo kutya na ngo kuhuta.

¹⁶ Ndinodakara kuti ngo zviro zvese ndinogonda ndimwi.