2 VaK. 6 - NOVO TESTAMENTO EM NDAU

¹ Nesu techishanda pamwepo naye, tinomupota kuti musaashira nyasha ja Mwari kusina shwiro,

² ngokuti iye unoti: Ndakakuzwa ngo nguva inoashirika, na ngo zuva rokuponeswa ndakakubesera; vonanyi zvino inguva inoashirika; vonanyi zvino riri zuva rokuponeswa.

³ Tisikaiti ndava yo kukhugunyisa nokuti chiri chakadini, kuti kushandira kwedu kusazoshohwa.

⁴ Asi ngo zviro zvese tiite vanotendwa kudari ngo zvinosisira vashandi va Mwari, mukusengerera kukurutu, mukutambujika, mukutama, mukusururika,

⁵ mukurohwa, mukufungihwa muguniya, muhohoho, mukushanda, no kurinda, no mukuera kuha;

⁶ mukucheneswa, mukuziva, mukusengerera, mukuitirwa nyasha, mu Mweya Wakachena, ngo rudo rusikajiitisi,

⁷ ngo izwi ro gwinyiso, ngo simba ra Mwari; ngo zvokurwa ndizvo zvo kururama ngo kumuho no kuboshwe.

⁸ Mukukujwa nokuti mukusikakujwa, mukureviwa no mumbiri yakanaka; kunonga tiri vachengeji, asi tiri vo gwinyiso;

⁹ kunonga tiri vasikazivikani, asi tiri vanonasa kuzivikanwa; kunonga tiri vanofa, asi vonanyi tinopona; kunonga tinotambujwa asi atiurawi;

¹⁰ kunonga tinosvipa mwoyo asi tinogara techidakara; kunonga tiri varombo, asi tiri tinopfumisa vazhinji, kunonga tisina chetinacho, asi tinazvo zvese.

¹¹ Muromo wedu wakabewuhwa kwomuri, imwimwi vaKorinte, mwoyo yedu yakuriswa.

¹² Amumanikijwi ndisu, asi munojimanikija murudo rwenyu.

¹³ Zvino ngokuhwirijira kwakatojana, ndinovereketa kunonga kuna vana vangu, itanyi vanokuriswavo.

Themperi ra Mwari unopona

¹⁴ Musaita vanosungirwa ngo kusikasisirani pamwepo no vasikatendi. Ngokuti kuri kwapi kuzwana kwo kururama no kushata? Nokuti kuri kwapi kuiyana kwo kujeka no chidima?

¹⁵ Nokuti kuri kwapi kutenderana kwa Kristu na Bheriari? Nokuti mutendi uno chikovaniswa chenyi no usikatendi?

¹⁶ Kuri kwapi kutenderana kwo themperi ra Mwari no miezaniso yo kudira? Ngokuti isisu tiri themperi ra Mwari, kudari ngo zvaakavereketa Mwari: “Ndinozogara mukati mwavo, ndifambe mukati mwavo; neni ndinozoita Mwari wavo, navo vanozoita vandhu vangu.

¹⁷ Ndizvo, budanyi pakati pavo, muite vakaparajana, Mambo unoti, musapshasa chiro chinosvipisa; neni ndinozomuashira;

¹⁸ neni ndinozoita Baba wenyu, nemwi munozoyita vana vangu vorume no vokaji, unonanga Jehovha Unosimbarese.”